lé 22 d'janvyi, 1986.
Chièr Moussieu l'Rédacteu,
Nou sé d'mande combein d'lecteurs dé la Gâzette du Sé tch'ont r'ténu un viage en mé ou tch'ont 'té, ou tchi s'en vont, en avion pouor tâchi d'obténîn eune miyeu veue d'la Conmète à Halley. Autrément, ch'est presque seux qué, dans ches latitudes, auve lé temps încèrtain qu' nou-s-enduthe, i' n'y en a pon fort tch'éthont peu, ou tchi pouôrront, en faithe grand' chose. I' y'en a, sans doute, tchiques-uns, comme lé Sieur Bob Kempster, d'La Rocque, tchi s'èrsouveinnent d'aver veu chutte célébrité cosmique quand ou pâssit en d'dans d'quatorze millions d'milles d'la tèrre la dreine fais l'tou en 1910, à compathaître ès trente-neu millions à san pus près au mais d'mars ch't année. La visite dé 1910, quouaiqué d'sappointante comme spectacl'ye en Angliétèrre, en fut ieune brillante dans bein d'autres parties du monde. Les expèrts s'attendent qué chutte visite pouôrrait être la pus faibl'ye des 30 èrcordées.
Les Jèrriais, sans doute, s'en sont allés d'hors pouor vaie "la" conmète pouor des généthâtions, mais s'ou n'savez pas tch'est qu' "aller vaie la conmète" veurt dithe, j'vos réféthons au "Dictionnaire Jersiais-Français" par lé Docteu Frank Le Maistre, souos "conmète"! (Enfîn, sa conmète d'vait en être ieune des mille ou d'même d'autres tch'ont 'té obsèrvées, car les dates tch'i donne n'accordent pas auve les cheinnes des appathences d'la Conmète à Halley.)
Étout i' peut êt' prétendu qu'la Conmète à Halley eut cèrtaine influence sus la dêterminâtion d'l'histouaithe dé la Nouormandie et don, à cèrtain point, d'la cheinne dé Jèrri. En êffet, dans "Occasional Publication No. 2" par La Sociêté Jèrriaise à Londres (tch'avait dêjà 'té publiée dans "Science Progress" au mais d'févri, 1910), W. B. Brodrick finnit comme chennechin:-
"Comme ch'est" (l'appathition dé 1910) "la preunmié fais qu'la Conmète à Halley r'appathu depis qu'ou fut identifiée comme la conmète tch'inspithit et encouothagit les Nouormands en 1066, est-ch' qué ch'n'est pas naturel qué nous" (il avait donné l'exposé comme discours ès Jèrriais rassembliés à Londres) , "lus d'scendants dévéthions saluer san r'tou? Et est-ch' qué jé n'dévéthions pas la r'garder auve un sentiment quâsiment d'affection respectée? Car ou reste la seule têmoin silencieuse vivante tchi nos rattachent auve nos anchêtres tchi, i' y'a quâsi 850 ans souos Dgillaume Duc dé Nouormandie, ajouôtit un glorieux chapitre à l'histouaithe - pas à l'histouaithe d'un empire mais à l'histouaithe du monde civilisé, un chapitre intitulé la Contchête Nouormande".
Résumant ses faits et ses conclusions. Brodrick dit qué:-
"(i) . . . l'appathition d'chutte conmète a eune période critique des prépathatifs à Dgillaume pouor l'invâsion d' l'Angliétèrre fut probabliément responsabl'ye pouor eune augmentâtion beinv'nue d'ses armées du point d'nombres :
"(ii) . . la conmète cèrtainment remplyi les Nouormands d'confianche et d'couothage, tandi qu'
"(iii) i' y'a raison à craithe qu'ou frappit l'êpouvante dans l'corps des Angliais: et
"(iv) . . . la victouaithe à Dgillaume ne fut remportée qué par eune marge êtraite"
et "qu'la conmète dé 1066 fut un facteur convaintchant en décidant l'résultat dé chutte bâtale historique, la Batâle dé Hastings".
Comme l'est illustré ichîn, l'appathition d'la conmète ch't' année-là fut couôsue dans la fanmeuse Tapiss'sie d'Bayeux, sa preunmié r'présentâtion en portraits. À la gauche dê la conmète et en d'ssous du Latin pouor "l' sont en crainte dé l'êtaile" sont, ch'qué nou suppose, siex Saxons êffrités.
Finnalement, not' poète natif dé l'Île, lé r'nommé Maistre Wace, nos dit chennechîn entouor la conmète dans san "Roman de Rou":-
El terme ke ço estre dut
Une esteile grant apparut,
E quatorze jors respandi.
Ov tres lons rais deverz midi;
Tele esteile solt l'en veir
Quant novel rei deit regne aveir.
Asez vi homes ki la virent,
Ki ainz e poiz lunges veskirent;
Comete la deit apeler
Ki des estailes volt parler.
(Quand ches choses sé pâssaient eune grande êtaile appathu, êbliouissante pouor quatorze jours, auve trais longs rayons pénétrant envèrs lé sud : nou-s-a l'habitude dé vaie eune telle êtaile quand un rouoyaume est sus l'point d'aver un nouvieau rouai. J'ai veu assez d'hommes tchi la vîdrent, des hommes dé cèrtain âge tchi vêtchûdrent bein d's années auprès. Les cheins tchi pâlent des êtailes l'appell'laient eune conmète. )
GRIS VENTRES
Né v'chîn deux poèmes êcrits en 1910 entouor la Coumette à Halley.
|
Bouann' gens, si la mauvaise chance vos sièd, Si vos arrive tchiq'accident, Sav'ous sus tchi renvier l'patchèt, Ch't'annèe ichin, principalement? Dans vos p'tites affaires dé touos les jours, I'n'yià pon d'soin tch'est ch'est qu'ou faîtes, Si tout vos va tout à l'arbours, Mettèz la faûte sus la Coumette!
La cheinne qui veint a un maûvais r'nom,
Eh bein, si nos messieux bein haût piaichis,
Si unn' femme mèt unn' poule à couer,
En Ville tch'est qui pousse un tâs d'drinettes
Quand un' houmme rentréra sièz li,
Les femmes bétôt né sé gênn'ront pas
L'influence dé l'Astre, jutchi là-haût,
J.P.
|
|
L'avous-veue, la boustre d'coumette Qui mèt l'monde chein d'sus d'sous? Av'ous cherchi, ov votr' lunette, A vaie sa tête, san corps et sa coue?
Av'ous 'tè, coumme mé, assez bête
Av'ous marchi, en soupl'ye qu'minse,
Av'ous filè jusqu'à la f'nêtre,
Av'ous, d'une main pon trop certaine,
Av'ous trouvè, dans deux minutes,
Av'ous, alors, la f'nêtre ouverte,
Av'ous r'mertchi d'l'autre' bord d'la route
Av'ous pensè que ch'tait bein drôle,
Av'ous èou dit qu'la Coumette
Av'ous comprins que ch'tait dommage,
Av'ous vill'yi les n'yies sans chance
Av'ous, dé d'pis qu'ch'est l'sé qu'ou s'lève,
Av'ous êtou, par la Gazette, *******
Av'ous bein comprins qu'ou est horte |
S'lon lé docteu Frank Le Maistre dans san Dictionnaire, aller vaie la conmète veurt dithe uriner
Viyiz étout: