Dépis bain d's années cha 'té ma couôtume à la fin d'Décembre de consacrer man dernié articlye de l'année à l'expression de touos mes milieurs souhaits à touos mes amins et à mes nombreux lecteurs, aussi bain dans l'île comme à l'êtrangi, que l'année qu'est sus l'point d'êcliore en s'sa iune de bonheur et d'prospethité et si ch'est possiblye, miyeuthe que toutes les siennes qui l'ont précédée.
Tout d'abord je veurs offri ma profonde sympathie à ches membres là des Etats qui pour le moment ne jouissent pas d'une trop bouanne santé, ch'est-à-dithe Moussieu l'Doyen, Moussieu l'Juge Aubin et Moussieu d'Gruchy, le Connaîtablye de St. Brelade. Je lus souhaite un prompt rêtablissement à lus santé ordinaithe, car à part de l'amiêtchi personnelle que touos l's habitants de l'île ont pour ieux, ches mêmes habitants-là ont grand besoin d'lus services comme législateurs, sustout en présence de la grande crise à travers de tchi que j'passons au moment actuel.
Le Caouain souhaite ettou une bouanne année et une miyeu santé à Moussieu W. M. Le Seelleur, notre ancient Maître d'Port.
Tout en r'grettant sa démission je félicite le Comité des Havres et Chaussées d'aver nommé le Cap'taine Allix comme san successeur. Ch'tait une nomination bain populaithe car le grand public était d'opinion que la pliaiche li v'nait et nous aithai 'té surprins et désappointés si ch'avait 'té autrement.
Mes félicitations et une bouanne et heutheuse année au Cap'taine Frainque.
Toutes ches années ilo, j'ai ieu biau souhaiter un miyeu êtat d'choses à nos amins fermiers, lus sort en général ne s'est pas amélioré du tout, et lus prospé, malheutheusement n'est pas bain brilliant. Ils ont toute la sympathie de nos Etats et le Comité pour l'Agritchultuthe est à faithe san possiblye pour trouver une solution du sérieux problème et un r'miède pour la triste position et i' faut espether que l'année 1931 es'sa un mio pus encouothageante que les deustrais dernièthes. Je n'pouvons pas continuer d'même! Les taxes augmentent à la m'suthe que l'industrie décline et chenna ne peut que m'ner à un débaclye complièt. Mais le fermi Jerriais est doué d'une optimisme et d'un couothage merveilleux et peut-être que d'vant long i' verra les choses amender un mio.
Ch'est là le pus sincèthe dési' du Caouain.
Au Connaîtablye de St. Pierre je souhaite, pas seulement une bouanne année mais les treis années d'sa gestion et je félicite les Pierrots sus l'fait qu'il a bain vouler consenti à r'entreprendre la poste onéreuse de Connaîtablye. L'êtat de lus routes li font crédit et si lus couôtage a hallé un mio sus les finances de la pâraisse pour acheteu le bénéfice es'sa resenti pus tard.
I' y a un proverbe Angliais qui dit “qu'i' n'faut pas changi de ch'vaux en crouaîsant la rivièthe,” et évidemment les St. Pierrais ont agi sus chu principe-là en retenant les services de lus Connaîtablye pour une autre gestion. Je les en félicite.
Le Caouain souhaite une bouanne et heutheuse année à Moussieu Fernand Sarrien, Consul de France en Jerri, et veurt s'associer avec toute la populace en exprimant ses pus vifs ergrets qu'i' s'en va nos tchitter au premié jour, i' s'sa même p't'être hors l'île par l'temps que ch't articlye ichin pathaîtra.
Couomme vous l'savez et que vous avez pu le vais sus la Gazette de Mercredi passé, le Syndicat des Fermiers de Jersey ly offrites un bantchet et ly fites une présentation Lundi au sé au Halkett.
Le Chef 'tait parmi les invités et je sai bain qu'il avait dans l'idée que j'n'y aille pas mais je m'y faufilli quand même, car George, le Secrétaithe du Syndicat, et mé j'sommes de grands amins, couomme deux frèthes pouor ainsi dithe.
Etant un miot tchutieux d'ma sorte, j'voudrais bein savèr tchès qu'est l'sien qui acatti les deux jambons de l'histouèthe que l'Jack raconti à nos gens!!
Une séthée comme ch'la ne s'sait pas compliète si l'Caouain n'y était pas.
Dans touos les cas, sachant que Moussieu l'Consul, duthant san séjour parmi nous m'a fait l'honneur de liéthe la pus grande partie de mes humblyes êfforts journalistiques je veurs saisi ch'tte occasion ichin pour l'en r'mercier et li souhaiter, à li et à sa famille une bouanne santé et tout l'bonheur possiblye à l'avenin.
Et bain, mes chiers lecteurs, de peux de fouaîssi l'Chef par otchuper trop “d'espace,” je m'en vais fini par vos souhaiter à tous “Une bouanne et heutheuse année.”
Caouain
1930
Viyiz étout: