Savous-bain, garçons que la séthée de Dimanche le prumi d'Févri, j'étais jutchi sus la héche d'un clios à djetter un mulot.
Quand vint un temps je ouï tchiquechose qui s'en v'nait sillant le long d'la route sans faithe quâsiment autchun brit. Ch'tait une “bike.” Et chute “bike” là n'avait pas d'lampe malgré qu'i' y avait déjà tchique temps qu'i' faisait nièt.
Ou passi tout près d'mé et je r'connu la personne qui la “ridait.”
Ch'tait la fille de iun d'nos Juges!
“Ah,” j'pensi, “si tan pépée savait chenna, li qui a aidgi à faithe la Louai, ch'est qu'i s'sait bain mârri!”
Et je r'touâni à man mulot.
Bon! deux minutes opprès, v'là-t-i' pas un aut'e machine qui passe!
Et chette-là n'avait pas d'lampe ninnetou lyi!
Je r'gardi l'moussieu qu'était sus la selle, et j'faîli d'tchêt à la renverse.
Ch'tait l'Juge li-même, sapresti!
Je dis à mé-même, “Tout che que l'Caouain vos souhaitte à touos les deux, ch'est qu'ous arriviez siez-vous sans rencontrer la police. En même temps je sis d'opinion que les siens qui font des Louais, dév'thaient être les prumiers à les observer.”
Lé Caouain
Les Chroniques de Jersey 21/2/1920
Viyiz étout: