J'taimes a béthe du tée, l'aut' sé. Samuel, d'la Chronique mange avec nous jusqu'a qui sait séttlé - ses gages sont suffisants, qui dit, pour poué nouôrri eunne femme, et il a d'mandé a Lonôre d'li trouvé tchiqu'un parmi ses counaissances. Hé ben, j'taimes a béthe du tée, et Sam en tait a sa quatrième tassée - ch'tait dans les conditions - et s'n avant-dernié morcée d'beurrée quand Lonôre dit tout d'un coup qu'oul avait oui pâslé d'eunne députation d'femmes qui s'n'allait yeunne de ches séthées, faithe visite au Counnèstabye Piné.
Chès hardelles la s'ont mal érchues, qué j'fit, Moussieu Piné n'peut pon les souffri en peintuthe, les Suffragettes; j'ai oui qu'il a un baté amathé souôs l'slip pour poué s'sauvé en mé au preumié signa.
Ch'n'est pon des Suffragistes, s'fit m'n èsfant; en ajouôtant qué quand bin même ch'en s'ai, ou n'criyait pon que l'Counnéstabye couôrrait d'vant; et qu'pour de yi ou n'vé pon sujet d'avé peux d'eunne suffragette, a mains que che n'fusse entre niet et jour. Mais ch'n'est pon pour èsprouvè a s'faithe met' sus la liste du Rât qu'ches femmes la s'en vont en procession a Belle Plage! Ch'est pour lis présenté un Vote de r'mérciments sus parchemin!
Gas-déouelle! ch'est diffethent, que j'fis, en passant ma tasse pour avé oquo un lirmin d'tée. Et tchès qu'il a fait pis qu'd'amor a chès dames la, pour allé d'même le r'mercié?
Ch'est toutes les dames qui prennent des 'paying guests' a l'entou d'la Tour qui s'y'en vont, s'fit Lonôre. Toutes lus maisons sont pliennes de monde qui pâlent d'y tésté jusqu'a Noué, et nou lus èscrit d'partout pour v'nin a nimporte tchi prix.
La d'sus, Laïzé s'fit que si ch'tait d'même, vaudrait p't'être mus tchitté la Gazette et nos mettre a gardé des louajiers par la. V'la tchi paiethait p't'être mus, et not' fille se f'thait counnaitre. Nous en r'pâsl'la qué j'fit, en faisant un clyin a Lonôre d'avé a sérré la gâche ou bin Samuel n'en laissait pon. Mais tchès qu'est la cause de chutte prospéthité la?
Ch'est a cause du Moulin, s'fit alle. D'pis un mais ou d'même, la paraisse a mins eunne musique sus l'djindas au d'sus d'la Tour, et tant qu'touônne la roeue, tant joue la musique! Do, Mi, Sol, Do, Si, Ré, Sol, Fa! Jour et niet, tant qui vente et qui s'aient d'iou qui veullent, la musique joue (ou grînche) et tout 'monde de par là est dans eunne grande jouaie. Nou la oué dans touos les coins et a travers touos les chachés. En chambre, dans la cave, en dormant, en dînant; et jusqué dans l'Eglyise, quand l'Ministre dit: Chantons un Psaume; l'Moulin rèspond: Si, Sol, Si, Do! Tout l'vêzinné est dans la jouée. Les "boarders" tchittent lus r'pas pour allé èsprouvé en faithe des gagâles sus les difféthents "tunes"; et tant qu'duthe a musique y n'pensent pon a mangi. Nous en [????] djix sus un dîné cartchullé pour ching!
Ch'est-tan-tchi les dames du vêzinné s'frottent les mains d'jouée, et coumme j'disais, pâslent d'allé en députation r'mércié l'propriétaithe du moulin à musique. Et j'soummes bin qu'y'éthait érigi un moulin par ichin pour empéchi les gens d'trop manji, qu'ou fit, en rgardant Samuel prendre sa onzième beurée de g'lée.
Piteur Pain
Nou vint justement m'dithe que la musique n'fonctiounne dèja pus. Chose seuthe qui faudra l'envié érgrée en Angliéterre.
Morning News 19/7/1912
Viyiz étout: