|
L'août' jour, comme' n'ou z'tait à tablle A dînné, bein cônfortablles, J'ouîmme' un tèrriblle frédas. I' sembliait qu'tout s'en v'nait bas. Tchiqu'un cliatyait la grand' porte, Et s'êcriait d'unn' vouaîx forte: "Y-a t'i' des gens, par ichin? "Mon péz' bénin! tch'est qu'né v'chin?" S'fit la 'Sté, toute épaeûzèe. – Mais mamman, pûs assaeûzèe, Fut ouvri l'hûs. – Ch'tait l'Richar', Tch'était souos s'n'habit d'soudar' D'un bond, i' s'lânchit dans l'aître. – Dam! comm' s'il avait tè l'maître! – I' s'mînt à saoûticoté, Et pîs à barbélueûté. Il en faîzait des morgaches. En avait-i' unne fache! Tapant sûs l'fond d'sân chapé. S'dît-i: "Ou' voudrait m'happé!' Ah! diâtre sait des hardelles! J'les mèttais toute' en brédelles. Pourtchi en être embâtè? N'ou peut bein s'grès sans ditèt. La paeûx prîns Flip, mân p'tit fréze, Tchi s'saouvit dans la côniéze S'muchi, et n'en r'sortit pon Que l'Richar' n'fûss' hor' pour bon. – - Mân péze, à tyi rein n'êcappe, Le r'gardait tout l'temps souos cappe. - Sus l'but d'la tablle acoutè, Avait veu et êcoutè, - Enfin erlévit la tête Et dît: "Halte-là! Arrête! Ch'est qu'n'en v'là pas mal, valèt! Di': Es-tu enchorchélè? As-tu fini tès sornèttes? Ou est-che un pousso d'linètte, Ou un plaîs'teur pûs-à-co, Tyi t'faoût dans a fôss' du co? S'tu savais comm' tu-as l'air bête. Tout l'train qu'tu faîs nos entête, Sai-tu. – Est-che un coup d'solèt Qu'tu-as eu, par le Portélèt? Ou bein as-tu veu la lunne, Quand tu t'proum'nais sûs la dunne? - Ch'est qu'tu-as l's'yièr' bein êdyézès, Et les traits touôs ertizès! Ah! s'tu n'as ponla caboche Chan' d'sûs-d'sous, oui!qu'n'ou m'êcorche, Et qu'n'ou m'pende par un pid! - Mais n'en v'là bein assèz d'dit. - Tch'est qu'tout chonna sinifie? - Vé-tu ta tante Sophie? Oul' est prête à s'êvanni. Pas d'août' gnolin! – J't'ai djèrni! - I' n'avait pas fini d'dize, Que la tante s'mînt à rize. – S'fît-alle au Richar': Di'-nous, Mân garçon. – Est-che entre-vous, Soudar', tchi y-a ieu frédainne, Pour l'amour de chès dôndainnes? Ch'est qu'vraîment i' l'pazaîtrait. Hein? – Di', est-ch' que ch'n'est pas vrai? - Assied-té, et nos raconte Tout. – Y-en a un biaoû but, j'compte. - Oui, y-avait du cotiyon, Et y-a ieu du câriyon. Ou z-avèz d'vinè, ma tante. J'vos dizai – J'tion' bein quarante. Je v'nion' d'tchitté les Tyen'vais Chantant. Mais ou' z-allèz veis Que d'tout, i' faoût qu'n'ou s'mêfie. - En aoûtchun jé n'mé cônfie; Mais à vos daeûx j'dizai tout. - Y-a t'i' tchiqu'uns à l'êcout? Nennin! – Eh bein, où-est qu'la route S'en va teurtant, et fait l'coute, Unn' vouaix nos dit d'arrêté Un p'tit brin. – J'ouiyion' caq'té. Bétôt tch'est qu'né v'lo qu'appréche, Et s'apique auprès la héche, Dans l'dêtou', à nos byintyi? - J'sézon' en l'heuze pourtyi. – La grand' haîngre de Mèrdyitte! Ah! la bigre! ou n'est pis tyitte! – Ni l's'aoûtres tch'étaient ov' lyi. N'ou s'en va les survillyi. - Pensèz don, qu'chutte bélètte, Ty'avait un touffèt d'violèttes – Veint mé l'pitchi souôs l'mêzé, Et mé d'mande d'la mazié!!! - Et oprès? s'lî fît mân péze, Tchi r'gardait d'travèr' ma mézé. - S'fît l'aoûtre: Mais j'ai restè Comme un bouigre d'tchan fouôttè! Et pis d'ouï toute la race De chès garçons et d'chès garces Rize et faize lûs ha-hâs! Véz', j'en ai quâzi tcheîs bas. Mais chein tyi m'a fait l'pûs d'honte – Rein qu'd'y pensé' l'sang m'en monte – Ch'est quand il' ont fait un rond Et pîs tchi m'ont fait l'affront D'm'y poussé ov' la Mèrdyitte, Et pîs de s'mèttre bein vite A dansé, fille' et garçons, Que ch'tait comme un tas d'démons: Et à heurlé touôs ensemblle, Qu'à vos l'diz, ma foué, j'en tremblle. – Jé n'crai pon qu'j'en r-êzai d'bein. Faoûdra qu'j'aill' sièz l'docteu' d'main, Tchi m'baille unn' drogue et me r'mètte. - Jé n'sîs pon dans mes cannèttes! Et ch'n'est pas occouo là tout. Car i' m'en ont jouè – un tou'! – Il' ont fait la grand' hardele, Ty-a des dents comm' des madelles, M'embrachi, - et pûs d'unn' feis Et pûs d'daeûx. Fallait la veîs! – Iun d'iaeûx m'a dit: V'là t'n'êpoûse! - J'l'î fiânque unn' raidde talmoûse. I' fait un brait si âffraeûx, Qu'les hardelle' en ont ieu paeûx, Et ont dêfilè si vite, Qu'iunne en tyèt en pèrpétuite. Ou' s'tait êteurt un dyézèt – Car sân saoûlé 'tait ûsè. Et oul' allait d'unn' tèlle ièrre, Qu'oul' a drotyi sûs unn'pièrre. – Mé èttou, m'sîs êcappè. J'ai bein vite dêcampè. Là, fît Richar', v'là m'n'histouaize! Tch'est qu'ou' dites d'la manniéze Qu'chu peltâs-là m'a traitè? Avi-ous jammais ouï ditèt? - Mais chonna n'peut resté d'maîmme. Est-ch' pas m'n'onclle? Eh! mân pouôr trouaîmme Tch'est qu'tu cré qu'tu pouorrais faize? Lî rêpond sèq-ment, mân péze. Faoût qu'jé l'diche, mân Richar', Tu-es un sacquéti bachouar. Si ch'n'est pas vrai, qué n'ou m'tize. Eh! n'ou n'a qu'd'en crévé d'rize. Pouôr' bestiol! tu n'sai' dôn pas – Tch'est qu'ch'est qu'l'înnocence, hélàs! – Qué ch'tait un fliotyèt d'privèttes, Tyi s'appellent suffragèttes. – I' t'ont donnè unn' léçon, Pour té môté, mân garçon, Qué tu dev'zais prendre famme. Comprends-tu? Ch'tait-là lûs gamme, I' t'tchèrront à-ch't'heu sûs l'dos, Et n'té bâdront pûs de r'pos. Dôn si ch'tait mé, à ta pièche, J'prendrais un p'tit mio d'hardièche, Et tout d'un coup f'saîs mân chouaîs. - Mais bah! tu n'es qu'un but d'bouais! Un pouôr' bouigre d'empôteume, Tyi s'tient sièz li, et s'enfrumme, A rueûtyi au pid d'sân feu, Et là sônge à sân tout seu. - Tu n'sai' dôn pas qu'les hardelles S'en vont ôté lûs cotelles Pour mettr' des braies! – Où-est qu'tu-en s'sâs? Dam', alor', tu t'ramâs' s'âs! -Unn' feîs les famme' à la tête, Té, et touôs l's'aoûtres pouôr' bêtes D'vièr' garçons, ou' s'sès taxès. Ou' z-en s'sèz bétôt lâssès. Faoûdra qu'tu dêhall' ta bourse, Ou bein, bigre! qu'tu dêbrousse. Si tu r'fûse l'préchain coup I' dêmouôzizons tes sou'. - Ah! ch't'annèe est bissecstile; J'oubliais: Ch'est l'tou' d'la fille De tâchi d'happé l'paîsson, Et ou' propôse au garçon. Richar' sans diz' bouf ni baffe; Comm' s'il avait r'chu unn' paffe, S'lèv; fil' drait sièz sân vaîzin, Et lî d'mânde sa Djénin. Y-éza, d'vant long, un maziage, D'la gâche et du vin, j'en gage. – Richar', couozant, r'veint sièz nous, (Et nos fait tressaoûte tous), Houâlant: "Fich' des suffragèttes, D'touos lûs teur' et d'lûs lichouèttes! Mazié titèt! mais nennin! Moué! j'êpoûzérai Djénin!!!"
Bèrnabè |
Viyiz étout: