Les Jeunes Filles d'Acht-heure

Les Jeunes Filles d'Acht-heure.

Ah, Missis Blo,
Ma Missis Blo,
J'sis fier' d'vo' s rencontrer!
J'veins d'avé bisto ov' ma fille,
A caus' d'la mennier' qu'ou s'habille -
J'voulais vo's en d'viser.
Mondoux, dit's me, au compt' que les chos's vont,
Qu'êch' qu'à la fin des fins fill's deveindront? -
D'être mariêes
I' sont tralêes:
Mais homm' n'est pas si bachouard coumm' nou' crait.
Et - Missis Blo! - la fin du mond' je vai
Si hardell's d'haut ou bas étage
Ne s'rang'nt pon vit' pour le mesnage.
Es fill's d'acht-heure aller s'marier,
Un garçon d' sens peut-i' penser?
Tchah! p'tit n'y peut
Et grand n'en veut!

II.

Ah, Missis Blo,
Ma Missis Blo,
Nos jeun's temps vo's r'venn't t'i'?
Quand j'allaim's tout's deux à journêe
Et, en vier pid d'cauch' chaq' sérêe,
Metteim's c'qu'avions gangni?
Coumm' chest changi dépis! - nou' n'serr' pus rein.
Tout passe en hard's et foll's dépens's a-nien!
Lincheurs et liet, -
N'ya pus dité
Attendant neuch's! - Pus qu'tout saute à s'parer
Pour fair' des quétos d'homm's vo's ergarder. -
Ensin, - qui n'a les yeux freumés
S'raisonn' le nombr' d'aviers trouvés....
Es fill's d'acht-heur', donc, se marier?
Un garçon d'sens peut-i' penser?
Tchah p'tit n'y peut,
Et grand n'en veut!

III.

Et Missis Blo,
Ma Missis Blo, -
Ah! chest ches gens d'boutiques!
Nou' n'vait pus les filles ès compteux;
Chest dev'nu bein au d'sous de liêux....
Que les viers serv'nt pratiques!
I' s'dréch'nt coumm' f'raient les fill's du général, -
Gazuoll'nt - gavach'nt - envient - pâl'nt mal -
Et font des teurs
Coumm' lius millieurs:
Main jamais mett'nt à cauch' ou à castrole,
Et rag'nt si d'lius commerce 'ou dit's parole:
Tout simplement sont buonn's à rein
Sinon à dépenser du bein:
Ditell's fill's, chell's d'acht heur, - marier?
Un garçon d'sens n'peut y penser!
Tchah! p'tit n'y peut,
Et grand n'en veut!

IV.

Et Missis Blo,
Ma Missis Blo, -
Ches autr's.... les fill's qui - sortent!
Qui sembl'nt n'avé 'té mins's en vie
Que pour desm'nin et compagnie -
Ch'est d'vais coumme i' s'comportent!
Miss Sang-sans-sous est partout endettée -
Miss Sou-sans-sang en trais mais fraul' s'n annêe. -
Et! - ch'est d'les ouï'
S'entr' picagni!....
D'les vais, à mus qu'ieux, trousser l'nez!
(Bêt's écônêes aîm'nt bouter - 'ou savez - )
Ou, ov' galoppins, les guetter!.....
Oh! ch'est à en faire Ang's jurer!
Ov fill's coumm' chla, d'acht-heur', s'marier?
Un garçon d'sens peut-i' penser?
Tchah! p'tit n'y peut,
Et grand n'en veut!

Ah! Mad'lon Blo,
Ma Mad'lon Blo -
Ch'tait pas coumm' chla d'nout' temps.
Jenny Crill, qu'est en boutiq', s'rait
En servic': Miss Cliou vit' quitt'rait
D'avé hont' de ses gens.
Les fill's d'Emprunt et d'Orgi, - les Toupet,
Les Miss Parvenu, - sairaient coumm' nou' fait
Pour mesnagi,
Et pot buolli.
Anien? - D'valant d'haut - nou' n'sait que "caster"
(Coumm' nègr's au large ès Ind's,) ou - dépenser! -
Or mé, Souky Aubin, j'vo's l'dis.
Trop tard flioquet s'ront de m'n avis:
Que garçon d'sens ne peut oser
A tell's fill's d'acht-heur' se marier.
Tchah! p'tit n'y peut,
Et grand n'en veut!

VI.

Et Mad'lon Blo,
Ma Mad'lon Blo,
Vous qui payiz des râts,
Dev'rait's-ous pon vais à tout ch'na?
Car faut un pus grand Hopita'
Si chang'ment n'adveint pas.
Là, - ou des Serveillants Guiton r'chéver, -
Pétr's, dev'nues viell's, éront bein à aller!
Ah! combein d'cra
Là finira! -
Et combein d'offreun's - apert's - haut-bottêes, -
En d'mandant s'cours à quiq' bouonn's sociétés! -
Puôr's garc's! - Par avait ch'vaux voulu
D'vanchi! - et d'buon mesnag' fait nu! -
Anchin! Qui' jeun' homm' peut penser
A ches fill's d'acht-heur' se marier?
Tchah! p'tit n'y peut
Et grand n'en veut!