La pure, plienne et entièthe véthitèt, chutte affaithe qui s'passi ichin, en Jerri, pendant l'otchupation.
Ch'tait dans le mais de Mai, près du manièth de Samarès, en la paraisse de St. Cliément. Y faisait bé et ieun des grands de l'Ile était dans sa motor avec son secrétaithe. En d'vant y avait un lorry chargi de barils a patates et de hampers vièdes, chein qu'était bein à l'ordinaithe. Il 'tait cachi par un Offici du Connétable.
Notre grand homme fit la r'merque à son secrétaithe que ches barils n'taient pon solidement jutchis les uns sus l's'autres et d'cachi douochement dans l'cas qu'il y en aurait qui pouorraient bein tchès bas dans la route.
Iun de ches barils semblait chatchi d'pus que l's'sautres et être la cause de tout chu dangi.
Deux-trais minutes oprès en aver fait ches r'marques nous juge d'la grande surprinse d'notre grand homme et de son secrétaithe quant y virent tchais hors de chu baril un gentil p'tit moussieu... habillé d'souaie. Et nos gens l'happirent dans lus bras, mais tchi en faithe car nous n'pouvait l'garder dans l'motor viyant qu'avec touot son tintamarre y pouorrait s'faithe que tchique Fritz ou iun des siens de la gestapo voudraient en saver un p'tit pus long.
Donc, nos gens décidithent d'porter l'p'tit Moussieu dans ieunne des maisons du vaisiné et comme il n'y avait pon de cotte, y fut mins dans l'poullayi viède de touote volaille d'pis bein des mais.
N'v'la qu'tait pouor seur l'mus à faithe, mais notre p'tit Moussie de soiaie en d'vint si mârri qui saccachi touot dans l'poullayi et mit en telles l'wire.
Et ch'est qu'il en faisait un tintamarre tant' et si bein qu'l'sien de chutte maison en d'vint apeuré, car pouor seur les siens d'la gestapo n's'raient pon long avant d'v'nir vais chein que chonna voulait dithe.
L'cacheux du lorry, ly, n's'aperchut de rein sinon quand i' arrivi sièz iun des grands d'la paraisse, un Chantgni, à chein que j'crais, des deux p'tits Moussieux qu'il avait mins dans les barils dans l'bel d'un Vingtgni d'une autre paraisse il n'en restait pus qu'ieun.
Il y eut un tas d'vis entre nos gens, car iou qu'tait l'autre p'tit Moussieu, oui, iou qu'il tait? l'cacheux étant bein seur qu'il y en avait deux lorsqu'il tchitchi l'bel de notre Vingtgni.
L'sien qui était dans l'pus grand embarras était l'sien qu'avait donné abri au p'tit Moussieu, pouor seur et tchi faithe, oui, tchi faithe pouor s'débarrasser de chut anima' qui grognait à sa façon. Et tchès que vont en penser les vaisins!
D'l'autre bord, sièz l'Chantgni, sièz l'Vingtgni et sièz l'Offici du Connétable ch'tait une autre histouèthe, car ch'est qu'en s'ra si la gestapo s'otchupe de chutte affaithe?
Mais couomme nous sait, chein qu'nous raconte en secret à ses amins s'répète en grand secret aux amins des amins et ch'est d'antchi que notre Chantgni apprins iou que l'disparu était muchi.
Quant au p'tit Moussieu qui causi tant d'embarras à des gens d'la police, chein qu'il en advint est qu'il servit de fricot de Noué à bein des gens.
1948
Viyiz étout: