Iun d'nos vièrs Jèrriais tchi veint rédguliéthement au café les Jeudis au matîn nos racontit tchiqu's'eunes dé ses mémouaithes dé la Libéthâtion en 1945. I' nos dit qu'lé Jour d'la Libéthâtion fut la preunmié fais qu'il avait ouï un radio. Les radios avaient 'té confistchis par l's Allemands et les Jèrriais n'taient pon alloués d'êcouter l'radio (bein seux qu'i' y'en avait tch'êcoutaient en s'gret épis cirtchulaient les nouvelles ès anmîns). Chu moussieu tch'avait chînq ans à la Libéthâtion n'avait janmais ouï un radio, mais l'Jour d'la Libéthâtion, l'9 d'Mai 1945, sa péthe l'emm'nit en halant un p'tit tchéthiot amont l'mont d'où'est qu'i' d'meuthaient à eune fèrme où'est qu'il avait un shed. I' montit amont eune êtchelle et halit d'parmi les poutres un radio muchi. I' raboulit l'radio siez sé et, l'moussieu nos dit qu'il avait tréjous gardé la mémouaithe dé chutte preunmié fais qu'il êcoutit un radio.
Chu jour-là étout, ch'fut la preunmié fais qu'il avait mangi un chucrîn. I' 'tait là dans chein qu'est achteu la Pièche dé la Libéthâtion, l'avant à la Pomme d'Or, quand les soudards Britanniques arrivîtent à la caûchie et pitchîtent des chucrîns à la gliaine ès mousses.
Viyiz étout: