Ch'tait l'huit dé Mai, mil neuf chent quarante-chinq. P'pée èrvenait d'l'office dé bouonne heuthe et quand i' passit la grand' ferme, son couosin Hedley vint couorrant à la route.
'J'avons dêhallé not' vier 'lorry' de souos l'êtrain,' i' dit, 'vint-t-en vaie.' Et là dans l'bel, l'engin couorrait bein - i'n' fallait pas d'mander éyoù qu'il avait ieu dé la pétrole - et les mousses à Hedley 'taient dans l'driéthe à netti l'êtrain avec les bringes dé l'êtabl'ye.
'Vos en v'nous à ces sé en ville avec nous, j'veindrons vos cherchi,' dit Hedley. Mais P'pée ne 'tait pas seux car sa méthe s'en v'nait pouor la sethée et ou s'en allait rester à couochi siez ieux. 'Mais, i' faut v'nin tous,' dit Hedley et l'affaithe fut decidée. La bouonnefemme arrivit à pid avec san grand pagas et sa bounne câsaque et après l'thée, M'mée, P'pée et la mousse fitent seux qu'i' 'taient bein abriyés car le 'lorry' s'en allait à sept heuthes pour les ramâsser.
'Pourtchi,' dit P'pée à sa méthe, 'que tu as mint ta bouonne câsaque pour aller en ville à ces sé?' 'Eh bein,' s'fit la bouonnefemme, 'j'ai mint ma bouonne robe de souais étout. Moussieu Churchill a dit que j'nos allons être libethés et j'm'en vais montrer ès Allemands que j'sommes pas tous en chiques.' Pas d'ardgument - car Hedley et san 'lorry' 'taient dans l'bel. Le vaisin à Hedley 'tait monte en d'riethe avec sa femme et ses mousses et i'n'y avait présqué pas d'run pouor P'pée, M'mée, la mousse et la bouonnefemme.
Mais il' lus assiévitent sus les câsses à patates et Gladys, la femme à Hedley, avait mint des tchaises dans mitan et ou n'en passit ieune à la grand'méthe. Trais des pus p'tits grimpitent sus lus méthe et la bouonnefemme, qu'aimait hardi l's êfants en print icun dé trais ans et ou l'mint sus ses g'nouors.
Tout l'long du c'min Hedley pimpait et tous l'vaient les bras et criaient ès passants et dans rein d'temps ils arrivîtent en ville. Les casses à patates fîtent eune belle montée et tous dêhallitent sinon la bouonnefemme. 'T'en vas-tu rester là toute la sethée?' dit P'pée. I' viyait qu'ou 'tait toute rouoge.
'Le mousse m'a mouillie' ou dit tout bas. 'Freddie,' s'fit Gladys, 't'éthais deu d'mander.' 'Bah, bah,' dit P'pée. 'Boutonne ta casaque - personne ne s'en vont vaie.'
Ch'tait eune sethée que tous garderaient dans lus mémouaithe pouor tréjous et à dgieux heuthes i' montitent dans l' 'lorry' pour lus en raller siez ieux, lâssés mais heutheux.
Mais pouor M'mée, i' y avait eune petite tâche en rentrant à la maison - i' fallait laver la robe dé souaie à l'ieau fine.
Pouor bein d's années, quand i' faisait bé et que la bouonnefemme mettait sa belle robe, ou s'touonnait en d'vant du mitheux et ou disait, en riant - 'Té rappelle-tu du huit de Mai mil neuf chent quarante-chinq? Sais-tu bein, s'lon éyoù qu'est l'solé, n'ouait acouo la taque.
Viyiz étout: