Duthant l'Otchupâtion, l's Allemands décidîtent d'bâti un c'mîn d'fé l'travèrs dé l'île, et eune partie crouaîsit l'clios en d'vant d'not' fèrme. Man péthe et ses anmîns avaient l'idée d'èrtèrgi l'travas un mio en èrmuant tchiques'eunes des dormiéthes du c'mîn d'fé la niet pour les faithe sèrvi comme bouais à feu.
Mais i' vînt un jour, quand man grand'péthe 'tait à scier, qu'un Allemand appathut à la porte du hangar. J'tais à r'garder Papa à san travas, mais j'n'pouvais pon li dgèrni viyant qu'i' ouïyait haut. I' continnuit à travailli sans aver appèrchu l'soudard. L's Allemands voulaient prendre l'vièr bouonhomme pour l'întèrrogâtion, mais man P'pèe lus dit qu'ch'tait li tchi 'tait responsabl'ye, et li et ses anmîns fûtent env'yés au College House pour être condamnés. Il' èrchûtent entre deux et trais sémaines châque, mais, viyant qu'i' n'y avait pon d'run dans la prison, i' lus fallait attendre lus tou.
Tandi qu'man péthe 'tait blioutchi, man fréthe et mé 'têmes à jouer iun du bein p'tit nombre dé nos disques sus un vièr gramophone quand ma méthe entrit, l'êraichit et l'fliantchit dans l'feu. J'n'avêmes pon réalisé la sîngnificâtion du titre, tchi 'tait “Acouo onze mais et acouo dgiex jours d'vant qu'j'sorte d'la boête!”
P'pèe èrvînt siez nous à la fîn auprès eune régime dans la prison tchi 'tait sustout des suidiches et acouo pus d'suidiches, et auprès chenna janmais d'sa vie pouôrrait-i' mangi les suidiches acouo.
Joy Fox
Viyiz étout: