Un d'mes amins tchi d'meuthe en Angliétèrre mé racontit chutte p'tit histouaithe d'un încident tchi s'pâssit dreinement. Sa maison est dans la campagne et les ruettes sont bein êtraites; en êffet, près d'sa d'meuthe, il est souvent împôssibl'ye pouor deux vouaithuthes dé pâsser côte à côte.
Eune arlévée i'cachait tout douochement avaû ieune dé ches ruettes quand i'rencontrit eune belle grande vouaituthe. Driéthe la reue i'vit eune ênorme danme tch'avait un ênorme chapê. I'réalisit tout d'suite qu'ou n'avavit autcheune idée d'èrtchuler et, viyant tch'il 'tait lé parfait moussieu, i'n'hésitit pon et èrtchulit chent chînquante vèrgues amont la ruette.
Inutile dé vos dithe qu'oulle éthait peu èrtchuler seulement chînq pids pouor entrer dans eune brecque!
Quand il' arrivîtent touos les deux à l'endrait où'est tch'il 'tait pôssibl'ye dê pâsser, la danme baîssit la f'nêtre dé san moto et m'n amîn fit d'même, pensant tch'i's'en allait èrchéver les èrmèrcîments d'eune èrconnaissante etrangiéthe. A sa grand' surprînse ou n'prononcit qu'eune seule pathole, 'Couochon!' ou lî criyit.
M'n amin est un moussieu bein pacient et compatissant mais chutte fais i'tait pus qu'mârri.
I'haûchit sa f'nêtre, mint san pid bas sus l'accélérateur et cachit avaû la ruette à fond d'train. Au preunmyi dêtou, pus ou mains hors dê contrôle, i'tapit à plien dans un couochon au mitan d'la ruette!
Mes bouonnes gens il est si aîsi dê mal comprendre chein qu'nou ouait et i' n'faut pon pèrdre l'art de la commeunicâtion. Prannez trèjous bouôn soin dé vos explytchi cliathement - autrément i' y'étha acouo bein des couochons ètravelés dans nos p'tites routes dé Jèrri!
BV
Viyiz étout: