Vit sa ptite agée reuque de chinq ans,
Prinse d'une longue et serieuse maladie,
Sans grand souotchen dans autchun temps
Epithotée et fachie d'une bein duthe vie.

Tandit q'la ptite pouorre ptite chiéthe
Sembliait comprendre biau sa jeunesse.
Que la vie tait duthe pour sa pouorre mèthe,
Ses frèthes et soeurs dans lus dêtresse.

Tout ch'qu'ou d'mandait et qu'ou voulait,
Ch'tait d'vais son pèthe qu'oue adorait,
Et qui jouait avec yi devant s'naller
Bein yien ou criyait à travers d'la mé.

Mais ou'est qu'est pepèe donc qu'ou d'mandait.
J'lavons pas veut pour bein longtemps.
Y'n veint pas jouer avec nous comme y soulait.
Oh, memèe, ou demandait : Pepèe s'ra t'il longtemps?

La pouorre mèthe afflygie éprouvait à la consoler.
Ton pepèe est à faithe pour des braves gens,
De grands travaux et bein seux des presents s'en va t'emmener.
Oh memèe, que j'sis contente. Mais pepèe s'ra t'il longtemps?

Les mais lus passaient, trejous la même chose,
Nos soudards avanchaient, 'taient en bataille a Caen,
Mais la petite se fayissait deja dépis une pose,
La vouai dév'nue toute basse d'mandait seulement : Pepèe s'ra t'il longtemps?

Les yiers de la ptite perdaient lus lueur et taient foncés,
Et la ptite fache blanchissait tout l'temps,
Quand l'bouon jour vint et la paie fut annoncèe,
Et la mèthe pryi sincethement que s'n homme ne fusse pas longtemps.

Le Pèthe vit fut appelé par telegramme,
Mais tait t'il trop tard ou tait t'il en temps.
Entrant dans la chambre, y vit a peine a travers d'ses termes
La chiethe petite. qui l'embrechi et dit: Pepèe n'a pas tait longtemps.

Dès l'premier jour l'éfant ramendit ;
La couleur r'vint et nou vit des changements.
Et vite en sanatorium Angliais le pèthe l'accompagni,
Bein r'merciant d'penser qu'i 'n'avait pas tait trop longtemps.

Acheteu ou joue avec ses frèthes et soeurs.
Heutheuse et gaie, sauvèe par ptite temps,
Et ses yiers on r'print lus vieille lueur,
Car comme ou dit es gens: Pepèe es avec mai pour tout l'temps.

J.L.M.