Le ciel est nier, les nouages épais,
La fraid est duthe, la glaie nos pique,
Le soleil n'brille presque jamais,
La niet est longue, nôt vie est triste.

Notr' corps est maigre, nôt fache hallée,
Nos pids sont nus, nos habits viers,
Notr' mangi pauvre, notr' biethe passée,
Et j'avons tous d'la peine dans l'yiers.

Nos femmes pélent trejous lus patates,
Pour tuos nos r'pas, ov nôtr' puorre pain,
Et le ptit mio d'beurre que d'sus nou gratte
Esche ravissent q'javons trejous faim.

J'navons pas d'cherbon a faithe de feu,
Le lait q'javons n'a pas grand crème,
Notr' fromage marche trejous tout seu',
La minsethe néthe, est dans son reigne.

Enfin buonnes gens, faut vivre en espethance,
Le ciel ov ses gros nuages, se cliairgitha;
Le soleil se r'montretha ov une brilliance,
Qui la niet r'accourchitha et nos peines abolitha.

Je r'mangeont tous du buan bianc pain,
Sans imiter l'systeme des vaques,
En mangeant tous des brins d'êttrain,
Des gâches ettout, et a notr' faim.

Nos mousses réthont des gâches shucrées,
Tout plein d'chucrins, et d'biaux ribans,
De belles neuve bottes, et d'biaux souliers,
Du chocolat, et d'bouonnes beurrais.

Nos femmes réthont lus cauches de souaie,
D'belles casaques, et d'biaux chapiaux,
De biaux souliers sans s'melles de bouais,
Et tout d'chi neu, et comme y faut.

Les hommes réthont lus cigarettes;
Puorrons r'craitre lus fameuses tomates;
Réthont d'la petrole, pour les tracteurs,
Et du guano pour lus patates.

J'nos r'promenons dans nos motos,
Vaie les course à Pliemont;
J'r'prendront tous des biaux photos,
Ouithont musique su pousse boutons.

A vous? A vous? viers St. Ouennais,
A vous? quils menent trejous partout;
Riez tous d'buon chouex, et tous chantez,
La paix appréche, et vite ettout.

Par J.J. Le M.
Fevrier 1942