Ch'nest qu'un triste sujèt
Mais ch'est d'actualitè

Ch'est, ma fingre! à n'y pas craithe
Chein qu'nou peut vaie dans la Faithe,
Au Samedi, chès s'maines ichin,
Nou peut à peine en r'vénin!

Pensèz, don', pour une seconde:
- Jamais rein d'patheil dans l'monde! -
Qu'pour un failli p'tit quétot
Les fermièrs d'mandent un prix fo'.

L'temps passè, je m'en rappelle,
Nou viyait une ribandelle
De vans de touos les côtés
Toutes bein pliennes et près à près.

Dans chu temps là, ch'tait facile
De choêsi, ded'dans la file,
Les siens qu'étaient les pus bieaux
Parmi les p'tits animaux.

Les fermièrs ne savaient dgéthe
Comment s'y prendr' pour vos pliaithe;
Et hardi d'ieux vos d'mandaient
Tout d'un coup de baithe une fais!

Nou baivait ensembl'ye un verre,
Nou pâlait d'patates et d'terre,
Mais des faillis p'tits quétots
A peine s'nou disait deux mots!

Nou n'en t'nait quâsi pas d'compte;
Nous en avait pustot honte
Nou disait tréjous Respect
Quand par chance nous en pâlait!

Souvent, nou' n'pouvait pas dithe
- Aussi vrai qu'j'sis à l'êcrithe -
Comment qu'i' s'trouvaient vendus
Quand vos deux verres étaient bus!

Un bieau coupl'ye âgi d'sièz s'maines,
D'appathence bein forte et saine,
N'couôtait qu'un d'mié souverain,
Et l'vendeux pensait faithe bein!

Mais ach'teu' tchi difféthence!
I' sont d'bein pus d'conséquence
Et l'fermi, quand il en vend,
A l'air de faithe de san tchan!

S'nou veur, pour rempl'yi sa cotte,
Un pourché haut comme ma botte,
Faut faithe un tas d'compl'yments
Ou bein nou' s'en r'veindrait sans!

Samedi passè, dans la Faithe,
Ou pouvez fliabl'yément m'craithe!
Nou baillit deux louis, vaithe d'ja,
Pour un seul p'tit anima'.

Le prix d'une cherge d'patates!
Un quétot gros comme une catte!
Jerry est tout chein-d'sus-sous
Quand d'itèt s'fait parmi nous.

Qu'ils aient l'pé su', qu'i' s'saient maigres,
Comme s'i' n'baivaient qu'du vinaigre,
Faut en payer un prix fo:
Trente huit ch'lins pour un fouôgnot!

Elie