Lé Fort Régent
Dans les septante membres lus réunîtent au Fort Régent jeudi, lé 29 dé mai, pour eune touônnée. I' fûtent rencontrés par lé Conmité. Preunmiéthement, lé Député Jean Le Maistre fit la beinv'nue en Jèrriais et întroduisit les Mêssieux P. Smyth (Directeur), W. Davies (l'Architecte) et deux Mêssieux Fox. Moussieu Smyth dit deux-s-trais mots et pis Moussieu Davies pâlit sus l'histouaithe du fort. Lé Mont de la Ville, coumme il était connu, fut acaté pour £2,780 en 1804. Lé dêveloppement c'menchit en 1805; lé 7 dé novembre, quand lé Lieut.-Général Don, Gouvèrneux d'Jèrri dans chu temps-là, mînt la preunmié pièrre. L'Architecte était Moussieu John Humphrey et lé couôtage finalement pour la construction était dans les £375,203.
L'Armé rédguliéthe fut stâtionnée au Fort jusqu'à 1932. Les seuls boulets à être tithés étaient par les Allémands qu'otchupîtent lé Fort duthant la Deuxième Dgèrre.
Lé Fort fut acaté par les Êtats en 1958 pour £14,500 et il' ont dêpensé hardi d'sou d'ssus; et y'avait hardi d'travas à être fait.
Les membres fûtent divisés en quat' partis et la séthée s'pâssit bein pliaîsamment. I' y'avait l'opporteunité dé vaie lé Musée d'Milice et lé "Palais de Titania" et ch'tait un honne d'aver Mde. Hodgkinson à pâler et explyitchi touos les dêtails.
Les membres fûtent étout dans la grand parade pour vaie le lief se la construction; y'a dans les douze vrégies et lé lief prend dans les sept vrégies.
Y'avait espéthance dé faithe un centre à sport d'un but et dans l'mitan trais êtages pour conféthences, etc; et dé l'aut' but un "piazza", mais au moment tout est arrêté. Les alentours gardîns, etc., prannent du temps à garder en ordre.
I' y'avait eune touônnée de la bagnérêsse et les membres finîtent dans lé "Bistro" où'est qu'lé café fut sèrvi à tous, et il' eûtent l'honneu d'aver lé Président du Conmité du fort, lé Brigadgi Raöul Lemprière Robin, à lus adréchi et explyitchi tchiques dêtails et chein qu'il' avaient espéthance dé faithe si i' 'taient pèrmîns.
1975
Acouo d'tchi
Lé vîngt d'Avri, 1814, lé nouvieau fort fut nommé Lé Fort Régent en l'honneu d'sén Altesse Rouoyale lé Prînce Régent.
Les pièrre dé taille, si bein rangées dans la construction du fort, fûdrent carriées dans la carriéthe du Mont Mado à St. Jean.
Nou's-a bâti eune bangnérêsse et un centre à sport.
Viyiz étout: