J'sortais du marchi a paîson ou-ês qu'j'avais 'té faithe un tou vaie si j'trouvrais eunne tête d'andjulle a bouan marchi pour faithe du bouoillon d'poule pour Lonore qu'a des bat-ments d'tcheu toutes les fais qu'sa méthe lis d'mande de y'aidji a faithe le gros travas. J'sortais d'là sans avé trouvé rîn a man gout, tout était trop frais, quand Daniel Duva, qu'etait a êspié par la f'nêtre de haut d'siez Couillard, m'fit sinne se ramonté.
Ils 'taient là un fliotchet a d'visé, a êscrithe, et a consulté les Régliéments d'la Société. Ah ha! Né v'la Piteur, qui s'fites; tu t'en vas nos baillyi un coup d'main. Ch'est nous que j'nos n'allons êsprouvé a capsaïzé les viers Régliéments.
D'vant que d'c'menchi, qué j'dis; j'voudrais savé d'tchi bord est l'Connon? car, dites que j'vos l'dit, ous éthez du fi a r'teurtes - ch'est un fiètre mailin!
L'Conon n'en est pon, qui m'dites. Jommais pus i' né balla d'sa goule dans not' Hall a mains qu'nou n'lis d'mande de r'venin eqprès pour compté les vouaix; et coumme y'en a qui disent qui vé doublye en comptant - tu n'as qu'faithe d'avé peux; l'conon est bosté.
Ch'la etant, j'resti lus aîdji. I' fut conv'nu qu'il 'tait temps qu'y'eusse un chang'ment d'fond-en-combye; y'avait trop longtemps que l's'affaithes 'taient gouvernées par un p'tit Clob, tréjous les mêmes, qui pouvaient faithe des régliéments, dèspensé des sous, entommé des procès - et les perdre - sans jommais consulté les membres. "L'Temps est v'nu, s'fit yun, d'mettre tout l'monde sus l'même pi, dans la Société. Y'a un diton qui veurt "que l'sien qui paie c'mande" et, I'm be-dam! j'nos n'allons c'mandé"
Right! qué j'dit; j'sis d'vot' bord! Mais mêfious! Les autres s'en vont s'teurtre et s'trimoussé pour tâchi d'vos êsmaglyi. Nou vos ditha qu'ous êtes hor d'ordre; qu'vot' Proposition n'est pas bin êscritte, qu'ous êts trop tard, qui vaudrait mus ajourné a l'hivé tchi vint; et tchès qu'j'en sait tchi'l autres triques qui s'en vont êsprouvé pour vos rouôlé. Ous avez a faithe a des des malins qu'ont gouverné touos seurs si longtemps qu'i' aimthaient quazi autant coulé l'navithe que d'en vaie d'autres prendre la barre! Certain'ment qu'ous avez raison! Certain'ment qu'y'à parmi vous tout autant - et pus - d'gens capablyes de gouvérné qu'touos chès viers navigant là! Certain'ment qu'ch'est a vous l'navithe; et certain'ment qu'ous avez grand'ment raison de voulé chouêsi les siens qui gouvernéthont! J'sis d'vot' botd!
"Bin dit, Piteur, s'fit Jim Quénod. Et pis, vé tu, j'soummes ennièz d'vaie tréjous les mêmes juges ès Shows! Coumme si n'y'en avait pon d'tout aussi aufaits parmi les p'tits souscripteurs! Mais nennin! Faut poué affordé a payi un Louis pour se counnaitre en bêtes; et n'y'a, a ch'qui disent, qu'les siens qu'ont un Louis d'èspeigne qui peuvent counnaitre les points d'eunne g'niche!
Slow 'an sure! que j'lus dis. Et prennez bin vos présautions, car le tcheur de l'houmme - du sien qui peut affordé un Louis - est djiantrément malin, et i' vos boul'lont si peuvent. R'gardez dans tchi rage chu saint houmme de Recteu Gruchy s'mint, Sam'di passé, viyant que l'Président t'nait d'vot' bord! Chu pouore Recteu! il est si accouotumé a c'mandé les brebis d'san troupé - i' n'sont fliotchet, a ch'que j'ai oui - qui vos prend tous pour des moutons. J'en ai r'grét pour li, mais si j'avais un avis a lis dounné, ché s'ait d's'otchupé de ch'qui concerne sa profession; ch'n'est pas la pliéche d'un prêcheux d'être a rouâblié dans un clob d'Agritchultuthe.
J'pâslimes oquo eunne pose. Nou n'sattend pon a autchun embaras, Sam'di. Tout a 'té dit pour ou contre; et y'a eunne enorme majorité contre les siens qui voudraient continué a gardé l'Clob dans lus pouchette. Et not gens sont trantchilles sus la comp'tie - tout s'fait 'fair an' above board' a ch't'heu.
Piteur Pain
The Morning News 10/12/1913
Viyiz étout: