La légende tchi siet, tchi n'avait janmais 'té publiée d'vant qu' ou n'mé fûsse racontée par un ancien du vaîsinné d'Sorel (y'a eune trentaine d'années d'chenna), 'tait en grand dangi d'être oubliée tout à fait:-
|
Ch't' histouaithe en est eune tèrribl'ye, bein seux, mais chein tchi pathaît la faithe acouo pus rêelle ch'est les noms d'rotchièrs, etc., dans chu parage. Lé châté 'tait sus la pliaiche tchi s'appelle à ch't heu Lé Gardîn d'Olivet (rein à faithe, sans doute, auve lé chein à La Trinneté), et en d'ssous y'a deux creux ou caves tchi s'appellent La Prînce et La Prîncêsse, et y'a étout La Fontaine dé la Prîncêsse. La machacréthie s'faîthait où'est tchi sont les galots, à La Tueûthie, et l'pits où'est qu' les corps étaient tâssés était L'Pits d'la Tchuette, ou L'Pits d'la Tueûthie. Touos ches noms sont connus acouo d'nouos jours par cèrtains pêtcheurs, et chein tchi fut nommé, y'a bein d's années, "Le Lavoir des Dames" (par des membres dé La Sociêté Jèrriaise, i' pathaît), et pus récemment du nom stupide dé "Venus Bath" est véthitabliément Lé Pits d'la Tchuette ou, dans la langue officielle, Le Puits de la Chuette. |
Y'a bein bein longtemps, dans les temps barbares en Jèrri, un Prînce et eune Prîncêsse et lus siette vivaient dans un châté à l'ést dé la Tête dé Sorel. Il' 'taient bein mêchants et vicieurs dé natuthe, et i' pathaît qué l'pus grand pliaîsi du Prînce était d'attriotchi les batchieaux à tèrre à l'exprès pouor bouocheler les cheins à bord ! Et il s'y prannaient comme chennechîn. Lé Prînce faîthait alleunmer eune fouée sus la falaise, par un mauvais temps, pouor attither naviguants, pêtcheurs ou pirates. Ches'-chîn s'trouvaient bein vite dévant la cour du Prînce, jugis et pis machacrés du coup. Ches tèrribl'yes faits s'donnaient au ras dg'ieau au pid du châté, et pis les corps 'taient fliantchis dans l'pits là tout près et laîssis jusqu'à temps qué v'là tchi d'vînsse tout pliein. Auprès ch'la les corps 'taient transportés en batelées au p'tit port dé Dgilliette en Nouormandie. V'là tchi continnuit pouor longtemps, jusqu'au jour qué les mouaines tchi d'meuthaient dans un monastéthe (souodisant sus l'empliaichement dé "Don Farm" d'à ch't heu) vîndrent et dêtruisîdrent les malfaiteurs et lus châté. Ayant don abattu et extèrminné, les mouaines voulîdrent sé sauver en mé, mais lus baté coulit au mitan d'la baie d'La Houle, entre Sorel et Ronez. Entr'autres choses tch'étaient à bord était l'siège en pièrre sus tchi qu' les pouôrres médgians 'taient jugis et tués. Ch'la coulit étout, sans doute, et est bein seux là au fond d'la mé acouo d'nouos jours.
|
Un tchué est eune toube en bouais - un fût scié en deux, et eune tchue est la même chose mais pus grande qué nou faîthait sèrvi sustout dans l'preinseu. Eune tchuée dg'ieau pouor les pêtcheurs et les gens des côtes est eune mathe dans l'rotchi à bâsse-ieau. Ah ça, eune tchuette es'sait eune mathe pus profonde, ou un pits dans l'rotchi. Et don, la mathe ou tchuette souos la Tête dé Sorel donnit l'nom La Tchuette à chutte partie-là, d'la côte et pis pus tard la mathe èrfut appelée Lé Pits d'la Tchuette. Il est à noter qué du bord dé La Salinne, à St. Ouën, y'a étout eune pliaiche dans l'rotchi tchi s'appelle La Tchuette (souvent prononcé La Dguette), pouor la même raison. |
Viyiz étout: