Eune nénantaine dé membres lus rêunîtent vendrédi l'19 dé mai, au Mangni d'St. Ouén pour la rêunion mensuelle. Les membres fûtent bein èrchus par lé Seigneu, lé Juge G. Malet de Carteret, qui parlit en Angliais.
I' dit qué ch'tait un grand pliaîsi pour li d'èrchéver L'Assembliée et fit des apologies qu'i' n'y'avait pas assez d'run pour tous à lus assiéthe et qué l'appartément 'tait p't êt un mio fraid.
Moussieu d'St. Ouën dit étout qu'i' 'tait bein content qules membres avaient lé Sieur Green à lus faithe lé discours entouôre lé Mangni, et qu'auprès il' îthaient dans un autre appartément vaie les portraits de ses anchêtres George et êlizabeth, la derniéthe née dans l'Mangni.
Lé Sieur Green racontit l'histouaithe du Mangni et d'la fanmille dé Carteret du preunmyi r'cord en 1130 jusqu'au présent. Ch'tait eune histouaithe auvec bein des tragédies.
Lé Mangni n'a janmais sorti d'dans les mains dé la fanmille dé Carteret.
En 1500 i' n'tait pas bein grand; les tours avaient 'té bâties mais les ailes y fûtent ajouôtées par Philippe dé Carteret dans les 1600. La partie qué les membres fûtent dédans 'tait du Vièr Mangni. Pour bein d's année lé Mangni fut laîssi aller mais au dgiêx-neuvième siècl'ye le Colonel Malet dé Carteret héthiti la propriêté et fit hardi dé r'pathâtions, coumme j'viyons lé mangni au jour d'aniet. La Chapelle dé Ste. Anne, dans les 1300, fut endommagie plusieurs fais. Duthant l'Otchupâtion les Allemands la faîsait sèrvi pour garder lus provisions. Le colombyi est pus modèrne. La position du vièr bâtisse n'est pas certain.
Auprès l'histouaithe du Mangni, lé Sieur Green pâlit dé la fanmille. Les dé Carterets ont tréjous 'té eune fanmille loyale à la Couronne et ont rendu bein des sèrvice à l'Îles, et i' racontit chein qu'avait arrivé à plusieurs dé ieux. Par exemplye, quand les Français otchupîtent Jèrri pour sept ans en 1461, Philippe dé Carteret 'tait souos soupçon d'être à travailli contre ieux. I' 'taient dêtèrminés dé l'arrêter, et un jour il 'tait à sa Mathe tout près d'la
Baie d'St. Ouën et les Français pensaient dé lé surprendre. Mais il avait un hardi bieau nièr chéva (lé portrait dans la salle) qu'i' montit d'sus en route pour lé Mangni. Au haut du mont y'avait eune troupe dé soudards et i' crouaîsit par lé Vaû d'Tchithiéthe (Le Val de Charrière) et lé ch'va eut à sauter 22 pids pour crouaîsi eune fôsse, et en arrivant au Mangni tchit mort souos li, et i' fut entèrré dans les tèrres du Mangni.
Un autre Philippe dé Carteret mathyit Marguérite Harliston, la fille du Gouvèrneux, et s'mînt à r'graie lé Mangni. Y'avait d'la haine entre lé nouvieau
Gouvèrneux Baker et dé Carteret. Un d'saccord dé neuf ans finit entre les deux quand un plian fut mîns en marche et eune lettre souôdisant êcrite par Philippe dé Carteret fut trouvée sus la route disant qu'il avait offèrt dé trahi Lé Mont Orgueil ès Français. Philippe tout d'suite dit qué ch'tait pas vrai mais i' fut emprîsonné, auvec rein qu'du pain et d'ieau. Sa femme Marguérite v'nait dé donner naîssance au 21ème êfant; ou s'en fut en Dgèrnésy et dé d'là au port dé Poole pour vaie lé Rouai. Lé Gouvèrneux entendit les nouvelles et 'tait en route pour l'arrêter, mais oulle eut la chance d'aver s'n audience, et en sortant du Palais lé rencontrit sus les d'grés. I' n'fallait pas pèrdre d'temps pour r'arriver en Jèrri d'vant lé jour arrangi pour la bataille; ou r'vînt lé sé dé d'vant et lé Bailli n'pouvait pas d'sobéi lé Rouai et Philippe dé Carteret fut env'yé à Westminster pour être jugi et i' fut honorabliément clièrgi.
Messire George dé Carteret fut en chèrge dé l'Île pour neuf ans et rendit d'grands sèrvices au Rouai Charles Deux. quand Charles pâssit siex mais en Jèrri i' visitait lé Mangni, et y'eut eune lettre dans s'n êcrituthe adréchie à la fanmille.
Lé Sieur Green finit san discours auvec l'histouaithe d'un janne Français, Françous Scornet, un garçon dé 20 ans qu'avait êcappé dé Brétagne auvec 16 autres Français duthant l'Otchupâtion par les Allemands et avait attèrrit en Dgèrnésy criyant qué ch'tait l'Île dé Witte et fûtent env'yés en Jèrri pour être jugis. I fut tithé dans les tèrres du Mangni et y'a eune pliaque en granit à sa mémouaithe dans l'gardîn.
Les membres s'en fûtent dans eune autre appartément pour vaie les portraits et le "oui-tchi".
Lé Président, l'Sénateu P.J. Romeril, èrmèrcyit lé Seigneu pour sa beinv'nue et lé Sieur Green pour san discours.
L'Assembliée d'Jèrriais
JEP 17/6/1972
Viyiz étout:
