Un baté d'pêque, la propriété dé deux hommes, un Jèrriais du nom dé Doughton et un Nouormand qui s'app'lait Dansie, avec deux matelots Jèrriais à bord étout, faîsait la pêque dans la Baie d'Grouville quand, tout d'un coup, dans les mînniet, i' vîtent chein qui s'app'lait "Lé Feu dé St. Anthoine" (comme un globe dé feu dans lé ciel causé par l'êlectricité là d'dans). V'là tchi s'en allait dans la direction d'la côte dé Jèrri, et lus pathut s'arrêter en d'ssus d'un rotchi au pid du Châté d'Gouôrray. I' pensaient qué ch'tait un avèrti dé mauvais temps à suivre et Dansie, qu'avait ses doutanches quant à la chance dé happer du paîsson où'est qu'il' 'taient, suggéthit ès autres qu'i' dév'thaient l'ver lus drannets qu'il' avaient laîssi couôrre dans l's alentours d'un vièr naufrage.
Les v'là en train dé l'ver lus drannets mais iun pathaîssait être crocheté sus tchiquechose et i' né v'nait pas du tout. À forche dé haler d'ssus i' s'en vînt et i' trouvîtent qu'i' y'avait eune trillache dédans qu'était au mains eune vèrgue dé long. Tchuthieurs dé saver comment qué ch'la s'était arrivé, i' pitchîtent deux ancres à l'ieau, espéthant dé crocheter chein qu'était là et dé l'am'ner à haut. I' n'pouvaient pas l'craithe quand, crochetée sur les ancres, i' sortit dé la mé eune înmense tchaise en or. Oulle 'tait grande dé châque but et pus p'tite au mitan, lé fond en' 'tait rond et sus l'dos et les côtés y'avait un tchuthieux dessîn dé creux et dé branques.
Înmaginn'ous la surprînse des quatre pêtcheurs en viyant chein qu'il' avaient happé! I' pouvaient bein vaie que ch'tait d'l'or et i' n'avaient janmais ouï d'eune telle happe ! Mais comment diviser lé butîn?
Doughton et Dansie étaient dé l'idée dé coper la tchaise en p'tits mios et d'les vendre pour aver des sou, car Dansie était pour donner chent louis châque ès deux matelots Jèrriais à condition qu'i' n'en pâlaient pas à un âme! Doughton pensait à li-même qué ch'tait trop à lus donner.
Les deux Jèrriais, qu'avaient ouï la convèrsâtion, étaient îndîngnis qué lus maîtres voulaient lus donner qu'eune toute pétite partie dé la trouvaille. Iun d'ieux, un grand fort gas, dit qué d'pis qué l'Bouân Dgieu lus avait env'yé la tchaise, i' dév'thaient en aver la valeu d'un quart châque, car il' avaient aîdgi touos les deux à la haler à bord du baté. Sans ieux, v'là tchi n'éthait pas 'té pôssibl'ye. Il avait l'idée qué si l'autre voulait prendre s'n avis i' pouôrraient finni d'aver la tchaise entre les deux d'ieux. L'autre, li, qu'était têtu, fit ni ieune ni deux - il empouongnit eune gaffe et assommit Dansie si dû avec qu'i' tchit sus pliaiche. Il en fit autant à Doughton et, avec l'aide dé san parchounnyi, il' env'yit les deux vièrs à l'ieau.
Les deux matelots, pensant qué l'butîn était l'leu, 'taient enjoués dé lus bouanne chance, mais tchi faithe dé la tchaise? I' n'pouvaient pas lus en r'aller en Jèrri, car lé monde voudraient saver tch'est qu'était dév'nu dé Doughton et Dansie. Et pis tchi faithe dé la tchaise? Les gens dé l'Île étaient bein pauvres et tchi en Jèrri éthaient les sou pour acater eune chose dé telle valeu?
I' pensîtent dé viagi en Angliétèrre, mais il' avaient peux qué lus p'tit baté né duth'thait pas un 'té long et dangereux viage. Dé même, i' décidîtent dé faithe vaile pour La Nouormandie, viyant qu'i' n'yavait pas liain à aller.
Si l'vent avait 'té favorabl'ye i' y'éthaient arrivé lé lendemain, mais la mé était dév'nue comme des montangnes et i 'taient en dangi d'lus vie; lé baté n'avanchait pas et i' pensaient vaie lus fîn l'avant à ieux.
Tandi qu'il' 'taient là au m'sespé, i' s'apèrchûtent qu'un grand cotteur appréchait d'ieux. Y'avait seize hommes à bord et jé n'sai pas si ch'tait d'pitchi qu'il' appréchîtent, ou si ch'tait pour vaie si y'avait dé tchi à bord qui valait la peine dé voler. Quatre dé l'êtchipe montîtent à bord; les Jèrriais èrfusîtent dé lus pâler et i' s'mîntent à lus entre-battre. Deux des matelots du cotteur fûtent tués et iun des Jèrriais étout. Quand l'autre Jèrriais vit ch'qu'i' s'arrivait i' s'en fut à la tchaise en or, qu'était couvèrte avec eune vaile, et l'env'yit à l'ieau, et, sautant souotre, se mînt à nagi à tigue dé corps pour la côte dé La Nouormandie.
Il avalit un tas d'ieau d'mé en route et sé bliessit séthieusement sus des rotchièrs qu'étaient justément souos l'ieau, ayant la chance d'arriver à la côte. G'lé et failli par aver pèrdu tant d'sang, avec l'ieau qu'il avait avalé et la manniéthe qu'il avait 'te sécoué par les grand's louêmes, il 'tait dans un triste êtat.
Les gens qui l'trouvîtent au bas d'l'ieau fîtent chein qu'i' pouvaient pour li, mais ch'tait en vain. Sé trouvant si malade, il avouit qu'il avait tué Doughton et Dansie, en priant au Bouân Dgieu dé l'pardonner.
I' vêtchut trais jours et dans chu temps-là i' racontit l'histouaithe dé la tchaise et tout qui s'tait pâssé.
Racontée par lé Sieur Philip Ahyi (Ahier) dans l'preunmié neunmétho dé "Stories of Jersey Seas, of Jersey's Coasts and of Jersey Seamen", et traduite par Amelia Perchard, chutte histouaithe ichîn fut publiée à Londres la preunmié fais en mil chînq chent nénante-chînq, duthant lé règne dé la Reine Élizabé I, dans un p'tit livre qui fut acaté en mil neu chent trente-six, d'un Dgèrnésiais, par La Société Jèrriaise. Les noms des hommes, Doughton et Dansie, fûtent probabliément anglyicisés d'même quand l'histouaithe fut écrite.
Comment qu'eune histouaithe tellement extraordinnaithe se trouvit à Londres duthant lé règne de la preunmiéthe Élizabé? Nou peut rein qu'supposer qu'ou fut racontée en Jèrriais ou dans l'Français fanmilyi, et qué tchique Angliais qui d'meuthait en Nouormandie en ouït pâler et i' la racontit, sans doute en Angliétèrre quand il y fut la préchaine fais.
Viyiz étout: