Allons avec mé là-bas sur la miell',
Et d'chu roquit-là j'racontrai merveill',
Si vos piês j'nos assiérons bain ilo.
Ecoutez-mé - j'veux vos pâler un mio:
- Si faut en crair' les viers du temps jadis.
Ch'tai ichin qué v'naient les pervers esprits:
Les r'vénans et les Chorchiers - chais vilains,
Qui n'cessaient d'enchorchéler les anciens!

- Bon, bon, chêqu' tu veux nos l'fair' à craire......
Et, j'ten prie, qui donc qui l'y v'naient faire?

Là, touots les Vendrédis, nou donnait Bal
Au Piton et à sa band' infernal'!
Ch'tait un véritable rendez-vous d'malins;
Satan, Chorchiers, Démons ou Dgiablotins;
Tous sus l'coupé du roc - chose êfriable -
S'êbattaient en dansant les Rond's du Dgiable.
- Ah! pardingue! chêqu' lus guérets agils
Né t'naient, dam, ni à clyous ni a qu'vill's!

- Dé vrai! nen-gua, i n'y a pas d'dout' de chlà;
Mais j'ai d'la pein' à crair' che qu'tu m'dis là!

Chutt' troup' dânale', dans chais tripots maudits,
S'y rencontrait sans caûcheur's ni habits;
Et dans chutt' mod' par yis adoptée,
Faisait des heurl's à goul' dèsmachonnée!
- Ou m'crérais p'têtr' pas - ou allez en rire',
Mais pourtant, chais vrai ché qué j'vais vos dir':
Chêqu' chais mannièr' dé criquets ou bichots
Ont lessi là la form' dé lus ergots!

-Holà! quêqu'tu m'cont', grand doue! Qui d'vis!
Sus chu roquit-la? la merqu' dé lus pis!.......

Oui! nou vé ocquo bain des trac's profond's
Qué firent en sautant chais esprits immond's.
Dé ch'qué j'dis, allons vos en asseurer;
Montons sus l'roquit et v'nez ergarder: -
- Là, viyous! ouêqu'i l'enfoncîrent lus pis!
Dissernous touots chais pâtirons frouquis;
Viyous tout's chais griffes et chais gros ortés?.....
Dé vrai, mes nèrs en sont touots A-J-T!.......

- Ah! j'vé bain, mon dou'! quêqu'ch'est qu' tout chonna!
Mais vair' mâtin! ch'est d'qu'i bain drôll' qué chla,

Dès qu' l'aub' du jeu dissipait la gniet sombr'
La troup' des Willis s'fondait en un ombr';
Dévant qu' quitter la pièch' dé lus ébats
I s'ent'nt consultaient - chais laids sélérats -
A cell' fin de souol'ver quiqu' nouveaux pians
Pour mus t'nin souos lus las chais pouor' èsfans,
Qui n'avaient ni d'fanc' ni d'boud' déhors,
Pour lus r'binfrer et d'fendr' lus corps!

- Est-i possibl'! vlà qui m'afiyz', de vrai.
Ah! vlà qui fait fremi raiqu' d'y penser!

Du roquit i s'n' allaient (s'lon lus routenn')
Courant en touôts sens la campann' vaisinn';
Et r'pendaient partout lus dang'reux vénins,
Augmentant châqu' fais la troup' des malins;
Et nou vit souvant qué l'Bé et la Bell',
Lé Vendrédi v'nant, dansaient à meveill';
Et quand au préchain Bal Satan s'montrait,
Aux sauts des danseurs lé roc r'tentissait!

- I n'y a rain d' êtonnant, nen-gua vraiment...
Ah! chais pouor' chièr's gens du vier St. Cliément!

Mais à ch'teu, - bain-seue, je n'en sis pas mâri,
Nou n'vé pus d'Chorchiers dans l'Il' dé Jerri:
Lé mond' march' la gniet comm' lé jeu sans peux
Et nou n'est pus tint comm' aut'fais, par yeux!
- Car ch'là s'est arrivé: unn' vielll' commèr'
Mé disait l'aut' jeu qué sa grande grand'mèr'
Yavait assisté, qué ch'tait à Rocqu'bert
Qu'l'art dé bain danser à tait découvert!

- En-sa ch' est d'puis! Mais jé sis d'tes idées:
Ah! qué j'somm's bain d'n'êt' pus enchorchélés!

Allons auvec mé là-bas sus la mielle,
Et d'chu rotchi-là j'racont'tai mèrvelle,
S'i' vos pliaît j'nos assiéthons bein ilo.
Êcoutez-mé - j'veurs vos pâler un mio:
- S'i' faut en craithe les vièrs du temps jadis.
Ch'tait ichîn qué v'naient les pèrvèrs esprits:
Les R'vénants et les Chorchièrs - ches vilains,
tchi n'cêssaient d'enchorchéler les anciens!

- Bon, bon, ch'est qu' tu veurs nos l'faithe à craithe......
Et, j't'en prie, tchi don qu'il' y v'naient faithe?

Là, touos les Vendrédis, nou donnait Bal
Au Piton et à sa bande înfèrnale!
Ch'tait un véthitabl'ye rendez-vous d'malîns;
Satan, Chorchièrs, Démons ou Dgiâbliotîns;
Touos sus l'copé du roc - chose êffriabl'ye -
S'êbattaient en dansant les Rondes du Dgiâbl'ye.
- Ah! pardîngue! ch'est qu' lus dgéthets agiles
Né t'naient, dame, ni à clious ni à g'vil'yes!

- Dé vrai! nan-dgia, i' n'y a pas d'doute dé ch'là;
Mais j'ai d'la peine à craithe chein qu'tu m'dis là!

Chutte troupe dânale, dans ches tripots maûdits,
S'y rencontrait sans caûcheuses ni habits;
Et dans chutte mode par lyi adoptée,
Faîsait des hueûles à goule dêmachonnée!
- Ou m'craithez p't-êt' pas - ous allez en rithe,
Mais pourtant, ch'est vrai chein qué j'vais vos dithe:
Ch'est qu'ches manniéthes dé critchets ou bichots
Ont laîssi là la forme dé lus èrgots!

-Hôla! tch'est qu'tu m'conte, grand Doue! Tchi d'vis!
Sus chu rotchi-la? la mèrque dé lus pids!.......

Oui! nou vait acouo bein des traces profondes
Qué fîtent en sautant ches esprits îmmondes.
D'chein qué j'dis, allons vos en asseûther;
Montons sus l'rotchi et v'nez èrgarder: -
- Là, viy'-ous! où'est qu'il' enfoncîtent lus pids!
Discèrn'-ous touos ches pâtithons froutchis;
Viy'-ous toutes ches greffes et ches gros-t-ortés?.....
Dé vrai, mes nèrs en sont touos agîtés!.......

- Ah! j'vai bein, mon Doue! tch'est qu'ch'est qu' tout chonna!
Mais véthe, mâtîn! ch'est d'tchi bein drôle qué ch'là.

Dès qu'l'aube du jeu dissipait la niet sombre
La troupe des Willis s'fondait en un ombre;
Dévant qu'tchitter la pièche dé lus êbats
I' s'ent'-consultaient - ches laids scélérats -
À seule fîn dé souôlever tchiques nouvieaux plians
Pour mus t'nîn souos lus las ches pouôrres êfants,
Tchi n'avaient ni d'fense ni d'boute-déhors,
Pour lus r'bînfrer et d'fendre lus corps!

- Est-i' pôssibl'ye! v'là tchi m'afflyige, dé vrai.
Ah! v'là tchi fait frémi raîque d'y penser!

Du rotchi i' s'n' allaient (s'lon lus routinne)
Couothant en touos sens la campangne vaîsinne;
Et r'pandaient partout lus dang'reux vénîns,
Augmentant châque fais la troupe des malîns;
Et nou vit souvent qué l'Bé et la Belle,
Lé Vendrédi v'nant, dansaient à mèrvelle;
Et quand au préchain Bal, Satan s'mouontrait,
Ès sauts des danseurs lé roc r'tentissait!

- I' n'y a rein d'êtonnant, nan-dgia vraîment...
Ah! ches pouôrres chiéthes gens du vièr St. Cliément!

Mais achteu, - bein seux, jé n'en sis pas mârri,
Nou n'vait pus d'Chorchièrs dans l'Île dé Jèrri:
Lé monde marche la niet comme lé jeu sans peux
Et nou n'est pus tînt comme aut'fais, par ieux!
- Car ch'là s'est arrivé: eune vielle comméthe
Mé disait l'aut' jeu qué sa grande-grand'méthe'
Y'avait assisté, qué ch'tait à Rocque Bèr
Qu'l'art dé bein danser à 'té dêcouvert!

- Assa ch'est d'pis! Mais jé sis d'tes idées:
Ah! qué j'sommes bein d'n'êt' pus enchorchélés!