Dans les touos vièrs temps il avait 'té décidé dé bâti l'églyise tout près un sanctuaithe païen à l'êst des Grèves dé St Brélade.
Bein des viages dé pièrre fûtent tchithiés au lieu chouaîsi et un jour les ouvrièrs, souo-disant, c'menchîtent même ès fondâtions.
Lé lend'main matîn, quand i' r'vîntent sus lus pas, i' restîtent bein confus dé vaie tch'i' n'restait fistuthe dé piérre, matchiéthe ou ôtis. Mais l'aut' but d'la grève, allant ouêst, i' r'trouvîtent toute la pièrre amouochelée et lus ôtis à côté! Et don, dans eune niet, toute la pièrre et tout l'bataclian avaient dispathu. Et qué tout avait prîns bein des s'maines à tchithier en pliaiche! Ché n'tait bein seux pon des gens ordinnaithes tch'avaient enl'vé et r'mué ch'la si vite.
Enfin l's ouvrièrs èrportîtent pièrre et toute la pêque au preunmié empliaichement et dèrché fîtent des prepathâtis pouor quémenchi à bâti cèrtain jour.
Mème turluthe chutte deuxième bordée, i' trouvîtent acouo tout èrtchithié et tâssé au même bord comme dévant! Ch'est en tchi, pensant qué ch'tait lé d'si du Bouôn Dgieu, nou laissit couorre et l'églyise fut bâtie là où'est qu'ou s'trouve à ch't heu.
Mais parmi les p'tits faitchieaux dans l'sanctuaithe païen (lus d'meuthe pouor bein des siècl'yes) y'eut hardi d'rêjouissance. Ches'chîn 'taient raide contents, ieux, quouaiqué bein lâssés d'lus travaux. Ch'tait ieux tch'avaient r'porté tout à bras et sus lus dos au ouêst d'la grève!
FLM
Viyiz étout: