Les Tomb'laines sont les falaises à l'êst du Bouôlay, en allant pouor L'Êtacqu'sé (souos l'Gardîn d'Olivet). À un bord dans ches falaises sé trouve un creux tchi s'appelle Lé Creux Bouaîne (ou Bouânne), autrément dit "Lé Creux Maudit".

Y'a dans les chinq chents ans les Français otchupîdrent l'Ile pouor un temps, souos l'Comte dé Maulevrier. Et les gens d'l'Êst sustout eûdrent hardi d'mînséthes à supporter des mains d's envahisseurs tchi pillaient sans cêsse bestchias et récoltes. Ches brigands volaient en partitchulyi des brébis et d'vîndrent connus comme "Les Moutonnièrs'' ou "La C'val'lie", viyant tch'il'allaient tréjous à j'va. Les femmes et l's avièrs en avaient eune mortelle peux et s'muchaient dêliêment en ouïyant pâler d'ieux.

Ch'tait la séthée d'l'assise dé veil'ye siez l'bouonhomme Raulîn d'l'Êcliuse, un fèrmyi au ouêst du Bouôlay. La salle 'tait à san combl'ye, lé crâsset comme leunmiéthe, la jontchiéthe toute flieuthie et les femmes assises dessus à ouvrer, et dans la grand' âtre eune fouée d'vrai. Lé viér Raulîn 'tait iun des pus riches fèrmiêrs dé la pâraisse et chutte séthée-là les gens 'taient seux d'aver un bouôn fricot. Mais étout, nou célébrait les fianchailles du janne Raulîn à Jeanne du Jourdain, la charmante pétite-fil'ye d'un vièr coupl'ye d'la paraisse. Et don, nou b'vait à la santé dé Raulîn et Jeanne. Et pis l's hommes racontaient d's histouaithes d'aut'fais - dé rêvillon, dé propos d'hors pâraisse, et d'chorchell'lie. Et les jannes jouaient à la bague bergère, et dansaient, et chantaient : "Les moutons dans la plaine sont en danger des loups, Et vous, et vous, jolie bergère, vous êtes en danger de l'amour . . . .".

L'affaithe allait comme sus rouelles, quand, tout à co, né v'la un Nouormand tch'entre tout franc et s'met à m'nichi toute la compangnie. Auprès un tas d'hèrtchin et d'rouâbliéthie, lé janne Raulîn rêussit à s'en débarrasser, mais pas d'vant qu'l'autre eusse m'nichi d'ervénîn l'lendemain pouor les pendre tous! Enfîn, lé souper n'mantchit pon pouor autant, car d'ité s'faîsait assez souvent, et les bouonnes gens y'étaient pûtôt à l'habitude. A la fîn d'la séthée - lé tou d'mînniet, ofûche - Raulîn èrcondisit sa janne fil'ye siez yi. I' faîsait un temps péthissabl'ye - tempête et feu et ôrage! En s'en r'vénant, arrivé au Carrefour des Crouaix, il eut l'malheu d'rencontrer La C'val'lie tchi r'vénaient criyant et chantant. Un êpart dé feu lé fit r'connaître et, en lî laîssant couôrre eune lache dé fouet, deux des brigands lî sautîdrent sus l'co et dans un clyîn dg'yi l'amathîdrent et l'fliantchîdrent en travèrs sus la selle dé iun des j'vaux.

I' l'entraînîdrent ava dans la grève, et finnalement l'fliantchîdrent à tèrre dans eune grand' cave qué nou connaît acouo d'nouos jours comme Lé Creux Bouânne. Et pis la racachie d'ches rapacièrs sé mîndrent à goudaller et à gaûdgetter pouor eune partie d'la niet. Auprès ch'la i' r'quémenchîdrent à sé d'menter d'lus prisonnyi tch'avait 'té là d's heuthes en ballot et quâsi sans connaissance. Quand il' eûdrent d's'amathé lé janne Raulîn et qué ch'tî-chin eut r'prîns ses sens et s'èrtrouvit sus ses pids, lé maître d'la bande l'èrconnut comme étant l'janne homme tchi l'avait pourchassé au c'menchement d'la séthée dé d'vant. I' s'mînt à dgeuler d'eune vouaix d'ôrage triomphante, et finnit par ordonner iun d'ses bandits à l'pendre ! Lé malheutheux Raulîn s'vit pèrdu, et, en s'disant deux-trais mots d'priéthe, s'apprêtit à mouothi comme un homme.

Dans l'entrétemps Jeanne, la janne fil'ye, s'était mînse au liet, mais, né pouvant s'endormi, ou voulit s'èrléver au but d'un coupl'ye d'heuthes. Par bonheu ou ouït l'tchian à Raulîn tchi houinnait en d'houors et, rêalisant tch'i' d'vait y'aver tchiquechose dé mal, tout d'un co happe san manté et arroute souotre l'tchian. Par lé Carrefour des Crouaix, avaû les Tchithiéthes du Bouôlay, et jusque souos Les Tomb'laines. Oulle arrivit juste en temps pouor vaie tch'est tchi s'n allait s'pâsser. Sans pèrdre un moment, ou gaffe un couté et cope les amathes à Raulîn. Mais aussitôt l'maître des brigands, futhieux et à maintchi soûl, saute sus l'janne homme et li'enfonce san pouongnard dans l'tchoeu ! Jeanne laîsse couôrre un tèrribl'ye cri, un cri êpouvantant tchi rêsonne hors dé la cave et par sus la mé et la tempête, et, à san tou, s'avole sus l'meurtriyi et lî pouongnarde la gorge !

Tchi machacre ! Tchi tchèrnage ! Affolée par tout ch'la, la janne fil'ye s'êcappe pouor la mé. La bande file souotre, heurlant comme des fos, sans pouver la rattraper. Tchique temps auprès i' l'avisent sus l'haut d'L'Islet, les bras en haut et les g'veux volant au vent. Eune grand' louême s'abat sus L'Islet et acouothe eune fais né v'là chu tèrribl'ye cri assez pouor touônner les sangs - lé Cri des Tomb'laines­ et quand la louême dispathait la Janne fil'ye n'est pus là !

A bein près eune sémaine auprès, lé cadâvre dé Jeanne fut trouvé fliottant dans la mé. Dans ches temps-là étout deux pêtcheurs vîdrent des corbîns sorti du Creux Bouânne. Il' y'entrîdrent par tchuthiosité, et i' restîdrent en hôrreu dé ch' tch'i' y'avait à vaie là. Enfîn il' en fîdrent d'ver, et un coupl'ye d'jours pus tard les deux amouotheurs fûdrent entèrrés ensembl'ye en tèrre sacrée. Quant au maître des Moutonnièrs, les gens laissîdrent les corbîns finni ch' tch'il' avaient c'menchi !

A bein près un an pus tard lé Tchuthé d'la pâraisse fut appelé en hâte pouor vaie un soudard Nouormand tch'était sus san mouothi, à cause d'eune batâle tch'il avait ieu. Ch'tî-chin avait 'té aut'fais iun d'la bande des rapacièrs, et i' racontit toute l'histouaithe dé chutte tèrribl'ye niet dans l'Creux Bouânne ou Creux Maudit.

Et tréjous d'pis ch'la nou ouitha là l'tou, par un temps rude en hivé, lé Cri des Tomb'laines. Cèrtains anciens Trinnetais vouos dithont acouo tch'il' ont ouï ch'la ieux-mêmes tchiquefais.

 

St. Ouonnais