Contre la fîn d'l'année 1495, i' s'fit eune grand' tempête - eune tempête futhieuse du ouêst. Et ou s'abattit sustout sus les Grèves dé St. Ouën, duthant trais jours et trais nyits. La traîsième séthée d'chutte grand' tempête y'eut eune accalmie, et un troupé d'hommes sé trouvaient sus La Campangne en d'sus des Hanniéthes, r'gardant en mé les veues dé chînq grands navithes à la d'rive tchi s'en v'naient comme pouor s'êchouer. Les vailes en chitchettes, les navithes donnaient des sîngnaux d'dêtresse mais sans r'chéver autchun sîngna en rêponse dé la côte. Nouos pilieurs (car né v'là chein tch'il' 'taient) sûdrent bein vite qué ch'tait des navithes espangnos et, s'doutant tchi d'vaient être clièrgis d'trésors, il' arrêtaient tch'i' fûssent naûfragis et êchoués sus les grèves pouor pouver l's aborder et les pilyi. Mais, viyant qu'les navithes né s'êchouaient pon vite assez, les pilieurs s'mîndrent à alleunmer des feux sus eune partie d'la grève où'est qu'i' y'avait l'pus d'rotchièrs - pus du côté d'L'Êta. Les batchieaux au m'sespé, pensant qué ch'tait là l'havre, sé laîssîdrent attither et, trop tard, prendre au piège. Les pilieurs dansaient sus la grève, dé jouaie, sachant à ch't heu pouor seux qu' lus ji avait rêussi. Tout d'même, quatre des navithes coulîdrent et tout l'monde à bord fûdrent pèrdus. Mais l'chîntchième, lé pus grand d'la fliotte, sé louogit dans les rotchièrs pouor être tempêté qué d'pus bé. Sus l'pont un vièr homme et une janne fil'ye sé mîndrent à prier. "Sauvez ma fil'ye, et j'vouos bénithai!", criait l'vieillard. "Sauvez-la, et j'vouos donn'nai mes côffres plieins d'or et tout ch' que j'possède!". Mais la mé n'fut pon longtemps d'vant pâsser par sus l'navithe et emporter la janne à fond. Ah ça, d'vant la préchaine louême, nou vit l'vièr homme sé butter sus l'pont et prononcer ches patholes : “J'vouos ai offert ma bénédiction et tout man bein, et ou vouos êtes motchis d'mé ! A ch't heu donne eune malédiction - j'vouos condamne à mouothi d'la même mort cruelle et à m'rencontrer d'ichîn un an souos l's ieaux d'chutte baie!” Là-d'ssus i' s'trouvit emporté étout.
Juste un an auprès, les pilieurs dé navithes sé trouvaient dans les mêmes parages, et fêtaient acouo, sus du vîn, lus êtchête dé l'année dé d'vant et riaient acouo d'la malédiction du vieillard. Mais, bein vite, à maîntchi souards, les v'là prîns d'peux. Car né v'là qu'eune ôrage se lève, et d's êparts dé feu tèrribl'yes, et des coups d'foudre, et pis eune tempête comme janmais pèrsonne n'avaient veu d'vant - eune tempête tch'abattait bouais et maisons et saccageait tout et m'ttait tout en mînchons ! Les gens avaient bieau fithe l'avant à la mé, terrifiés, êpouvantés - pas mouoyen d'êcapper à lus sort! Et la drôle dé chose 'tait qué-tch'i' filîssent à drouaite ou à gauche, i' lus sembliait qu'un fantôme dé navithe 'tait là d'vant lus ièrs êchoué sus l'rotchi auve un vieillard à barbe grise sus l'pont ! Et ouaithe tch'i' s'èrfugyissent sus la toute pus haute tête, la mé finnit par les engaûmer tous d'vant solé l'vant du préchain jour.... Ch'est en tchi, les ieaux envahîdrent tout chu tèrrain à janmais, à cause des méfaits d's habitants et par la malédiction du vieillard dé l'année dé d'vant !
F. L. M.
Viyiz étout: