Dépis la deuxième maîntchi du 16e. siècl'ye même jusqu'à nouos jours, eune tchuthieuse supèrstition pathaît aver dominné les naviguants Jèrriais. Et ch'est, qué lé naviguant tch'avait l'malheu d'ouï la sonn'nie d'clioches v'nant dé d'souos la mé, entre l'Hâvre d'St. Hélyi et Les Mintchiers, n'èrvèrrait dgéthe la tèrre - ­ch'est à dithe, n'èrattèrr'rait pon ni en Jèrri ni ailleurs. Quand des pouorres corps s'adonnaient à êt' n'yés dans ches parages-là, nou disait : "Il' ont ouï les clioches des églyises dé pâraisse".

Nou-s-appelle chenna étout "Ouï les clioches au vent". Et les pêtcheurs aut'fais d'valaient tréjous sus la grève à écouter pouor lé son d'ches clioches. S'i' les ouiyaient i' n'embèrtchaient pon, mais s'i' n'en ouiyaient rein i' sortaient sans crainte.

L'originne dé chutte tradition est qué du temps du rouai Edouard VI en 1551 les clioches des douze églyises fûtent descendues et vendues à un marchand d'St. Mâlo. Lé navithe tchi portait la cartchaîson en France coulit et fut, comme nou dit, pèrdu corps et beins. Ch'tait souo-disant un jugement du ciel pouor lé sacrilège des églyises. Enfin, né v'là la légende.