Trenton, Michigan,
U.S.A.
Lé 4 dé juîn, 1966.
Moussieu l'Rédacteu,
"Il est affronté comme eune bélette, chu mousse-là!", Manman m'disait eune séthée au pid du feu quand j'tais mousse ès Landes à St. Ouën. "Et jé n'voudrais pon t'vaie l'hanter!"
"Tchi mousse?", Papa lî d'mandit.
"Lé mousse à Pierre Pallie, du Bouôlé," ou' li dit.
"Bon!", s'fît Papa, "Tch'est tch'il est à faithe par ichîn?"
"Il est à passer tchiques sémaines siez s'n oncl'ye à Millais," Manman lî dit. "En m'en allant à La Ronde Cotte vaie Missis Cap'taine Le Blianc hièr l'arlévée, il 'tait à pitchi des navets dans la porte au bouanhomme Giot tch'est malade au liet. I' d'meuthe tout seu. Quand j'lî dit tch'i' n'dév'thait pon faithe d'ité, i' m'dit. 'Mêl'ous d'vouos affaithes, vous, vielle pie'. Si j'avais peut lî mett' la patte sus l'co j'l'éthais talmoûsé, chu mauvais p'tit sujet-là! J'sis en-mème d'en pâler au Chent'nyi!"
"L'marchi n'en vaut pon la chandelle!", Papa dit à Manman. "Laîsses-lé pitchi ses navets. Iun d'ches jours tchitchun s'en va l'gaffer et li haler sus l's ouothelles. L'malfaiteux fait tréjous eune oeuvre tchi l'trompe! Tch'est tch'est dév'nu d'sa méthe, don, à chu mousse-là? Ch'tait-i' eune femmes dé par-ichîn?"
"Mais oui!", Manman lî dit, "Oulle 'tait d'L'Êta. Ou' n'a pon ieu d'chance dans la vie, chutte pouorre femme. Oulle a tréjous travailli comme eune négrêsse. Oulle 'tait orphéline à l'âge dé dgiex ans. San p'pèe mouothit d'La Maladie du Rouai quand oulle avait huit ans, et sa m'mèe mouothit d'eune enflammation d'poumons deux ans pus tard. J'ai tréjous ouï qué l'péthe 'tait pièrcheux et tch'il' 'taient pauvres comme un rat d'églyise. Il allait à san jour, mais pèrsonne né voulait l'emplyiyer viyant tch'il 'tait ouaînâtre comme eune mule. La bouannefemme, dgia, 'tait bouanne travâl'rêsse. Quand ou mouothit, la fille s'en fut d'meuther siez eune tante au Bouolé, et quand oulle avait dgiex-huit ans ou' mathyit Pièrre Pallie. Il 'tait eune vîngtaine d'années pus vyi qu'lyi. I' n'tait pon bein avisé ni n'tout - ch'tait tout du paîsson d'cliavé - et quand i' mouothit ou' s'trouvit êpithotée et mînt l'garçon en pension d'tchiquebord et s'en fut sèrvante siez tchitchun en Dgèrnésy."
"Ch'n'est pon êtonnant qu'chu pouorre mousse-là est mal êl'vé," s'fit Papa. "I' n'a ni péthe ni méthe, pour en bein dithe, et il a pèrdu san compas. Iun d'ches jours i' pouorrait bein s'êdgéther et s'trouver dans l'êcole îndustrielle!"
"En pâlant du bouanhomme Mess Giot," j'dis à Papa, "Jean L'Cornu m'disait l'aut' jour qué j'avions d'meuthé dans la maîson où-est tch'i' d'meuthe. Est-che vrai?"
"Eh bein," Papa m'dit, "Oui, ch'est vrai, man p'tit, mais ch'tait d'vant qu'tu fûsses né. Ch'est la dreine maîson à gauche dévant arriver à La Ronde Cotte en s'n allant des Landes au carrefour des Chîn' Vèrges. Y'a ieu des Feuvres là d'vièrs temps. Y'a chent ans, l'but ouêst dé chutte pétite maiethon-là 'tait eune forge, et ch'tait un Jean L'Feuvre, couôthîn-germain à tan grand-grand-péthe Jean Thomas, tch'y forgeait. I' fut né en dgiex-huit chent vînt-trais et i' mouothit subitement à l'âge dé trente ans. Il avait 'té à la pêque, à ch'tch'i' pathaît, et en s'assiévant à tabl'ye i' dit à sa femme tch'i' n'sé trouvait pon bein, et tchiques munutes auprès i' halit san drein soupi."
"Jean L'Feuvre avait mathié Jane Vibert, fille d'Âmice. Il' eûdrent deux êfants, Jane et Jean. Jean s'en fut à La Côte, et pèrsonne né pathaît saver tch'est tch'en est dév'nu. Jane mathyit Michel Josse Gottard, un bouochi tch'avait sa bouochel'lie en ville. Ch'est d'mème qué chutte branque-là d'nouot' fanmile fut appelée 'Les Feuvres Gottard'."
"Mais, i' n'y a pon d'forge là à ch't heu," j'dis à Papa.
"Nan," i' m'dit. "J'n'ai janmais ouï si pèrsonne forgit là auprès la mort dé Jean L'Feuvre. J'nouos en feûnmes démeuther là, ta Manman et mé, quand man travas sus la cauchie en ville fut finni, mais y'avait longtemps qu'la forge avait 'té freunmée dans chu temps-là. J'tions là quand chutte maîson-chîn et la forge fûdrent bâties et qué j'nouos en vînmes ichîn, oü-est qu'tu-as 'té né."
"Tch'est qu'tu fît sus la cauchie en ville?", jé d'mandis à Papa.
"Eh bein, man p'tit," i' m'dit, "Les cheunm'nées du 'Steam Packet', comme il' appelent lé stînme tch'a rempliaichi les navithes à vailes tchi veinnent d'Angliétèrre en Jèrri, 'taient trop hautes, pathaît-i', et les bourgeais eûdrent un forgeux d'la ville à êprouver à coper l'haut. Ches cheunm'nées-là 'taient faites d'acier tch'était hardi dû, et l'forgeux prîns si longtemps à êprouver à en coper ieune, viyant tch'i' n'pouvait pon garder un bouan tranchant sus ses chîthés à fraid, tch'il' env'yîdrent pour mé. Quand i' m'vîdrent tremper m's ôtis et coper l'haut d'ches cheunm'nées-là dans p'tit temps, i' trouvîdrent un tas d'aut' travas pour mé! Pour êt' pus prés du travas j'nouos en allînmes démeuther à La Preunmié Tour pour eune volée. T'n oncl'ye Adolphus fut né quandis qué j'tions là. Nou peut dithe tch'il est villais viyant tch'i' fut né dans la pâraisse dé St. Hélyi, mais i' n'a janmais 'té villais dans l'âme!"
George d'La Forge
Viyiz étout: