Les Pages Jèrriaises

Lé mithacl'ye du fidgi

La Bouonne Nouvelle s'lon Mar, Chapitre 11

 

Vèrsets 12 à 26

Et lé lend'main, quand i' sortîtent dé Béthanie, il eut faim,

et ayant veu au liain un fidgi auve des fielles, il allit vaie s'i' trouv'thait tchiquechose sus li, mais quand i' vînt au fidgi, i' n' trouvit rein excepté des fielles, car ché n'tait pon la saîson des figues.

Et Jésû l'adréchit: "Qu'pèrsonne né mange pus rein dé té!" et ses discipl'yes l'ouîtent.

Et il' arrivîtent à Jérusalem, et Jésû allit au templ'ye et s'mînt à pitchi hors les cheins tchi vendaient et acataient dans l'templ'ye et i' renvèrsit les tabl'yes ès agents d'change et les sièges ès cheins tchi vendaient des colombes.

Et i' n'pèrmettit à autcheune pèrsonne d'porter des beins dans l'templ'ye.

Et il ensîngnit et lus dit: "N'est-i' pon êcrit: 'qu'ma maîson s'sa app'lée eune maîson d'priéthe pouor toutes les nâtions', et ou l'avez faite un hant d'lârrons.

Et l's êcrivains et les prêtres prîncipaux l'ouîtent et chèrchîtent comment tch'i' pouôrraient l'dêtruithe, car il' avaient peux dé li pa'ce qué tout l'peupl'ye 'tait êtonné auve chein tch'il ensîngnait.

Et l'sé, i' sortit d'la ville.

Et l'matîn, quant i' pâssaient, i' vîtent lé fidgi tout êmorti des réchinnes.

Et Pièrre, tchi s'ramémouaithit dé chein tchi s'pâssit, li dit: "Maît', êv'chîn lé fidgi qu'tu maûdis s'est êmorti."

Et Jésû li rêponnit: "Ayiz fouai en Dgieu,

car j'vos l'dis en véthité: lé chein tchi dit à chutte montangne 'Sais enl'vée et pitchie dans la mé' et tchi n'a pon d'doute dans san tchoeu mais tchi crait qué tout ch'qu'i' ditha, s'sa, étha tout ch'qu'i' ditha.

Né v'chîn pouortchi qué j'vos dis: tout ch'qu'ou d'mandez en priéthe, s'ou criyiz qu'ou l'èrchév'thez, ou l'èrchév'thez en véthité.

Et quand ou priez, pardonnez, s'ous avez autcheune chose contre autcheune pèrsonne à seule fîn qu'vot' Péthe tch'est dans les cieux vos pardonne vos offenses étout.

Et s'ou n'pardonnez pon, vot' Péthe tch'est dans les cieux n'pardonn'na pon vos offenses nitout."

 

Vèrsets 12-19

Lé jour d'auprès quand i' sortîdrent dé Béthannie, i' fut prîns d'faim et i' vit un fidgi un p'tit but pus liain tch'avait des fielles et i' s'en fut pouor vaie s'il y trouv'thait tchiquechose, mais quand i' vînt là i' trouvit raîque des fielles car l'temps des figues 'tait pâssé. Et Jésû pâlit et dit au fidgi, "Qué janmais autchuns n'èrmangent dé frit d'té!" Et ses discipl'yes lé ouîdrent. I' vîndrent don à Jéthusalem et quand Jésû eut entré dans l'templ'ye, i' cachit hors touos les cheins tchi vendaient et tch'acataient dans l'Templ'ye. I' gav'lit les tabl'yes des cheins tchi baillaient du change et les tchaîses des vendeurs d'pigeons. Et i' n'voulait pon lâtchi autchuns porter autchun vaissé par l'Templ'ye. Et i' lus pâlait et lus dîthait, "Ch'n'est-i' pon êcrit: 'Ma maîson s'sa app'lée eune maîson d'priéthe par touos les peupl'yes'? Mais ous en avez fait eune tâne à larêneurs!" Et quand l's êcrivains et les grands prêtres ouîdrent chenna, i' traichaient pouor lî faithe ma, mais i' 'taient gênés par cause qué tout l'peupl'ye 'tait ravi d'ses prîncipes. Et quand vînt l'sé Jésû sortit d'la ville.

 

Vèrsets 22-24

Et Jésû rêponnit et lus dit, "Ayiz la fouai du Bouôn Dgieu. Véthe j'vos l'dis qué l'chein tchi ditha à chu mont-chîn, 'Sors d'ilo et flianque-té dans la mé!' et tchi n'es'sa pon à j'en sai entouor mais tchi craitha qu'chein tch'i' dit sé f'tha, tout chein tch'i' ditha, li, s'sa fait. Et v'là pouortchi qué j'vos dis: tout chein qu'ou d'mandez en priant, s'ou criyiz, ou l'éthez et i' vos s'sa fait.

 

Viyiz étout:

 

Les Pages Jèrriaises