Lé nom d'l'empliaichement veint des mots Vièr Norrouais, grâr (gris) et nes (capée), la grise capée – eune description parfaite du lieu veu d'la mé.
Lé Châté fut probabliément bâti d'vièrs 1330 quand Messire Jean des Roches 'tait lé Gardgien des Îles. Sus trais bords il est protégi par des falaises et sus l'quatrième par eune fôsse. Les muthâles sont bâties en pièrre des envithons et sont pus êpaîsses du côté d'la tèrre.
Èrgardant l'corps dé garde, protégé par san pont-lévis et hèrche et par deux fortes tours à châque bord, nou-s-éthait creu qué l'châté éthait 'té difficile à prendre. Pouortant, i' y'avait des d'fauts – i' n'y'avait pas d'portes dé sorte pouor des contre-attacques, l'habitacl'ye 'tait rein qué deux sîmpl'yes bâtisses, auve des pus p'tits appentis contre les muthâles et, sustout, i' n'y'avait pas autcheune provision d'ieau en d'dans des muthâles.
Lé Châté fut prîns par les français en 1373, et quasîment dêmoli sait duthant ou auprès l'otchupâtion française dé l'île dé 1461 à 1468. En 1483, lé Seigneu d'St. Ouën fut autorisé dé fortifier san mangni et ch'tait împrobabl'ye tch'i' put faithe chenna si l'châté 'tait acouo d'usage.
En 1806, eune stâtion dé sîngnaux fut înstallée ichîn pouor pâsser des messages à Dgèrnésey, tchi nou peut vaie au nord-vouêt.
Viyiz étout: