Si ch'tait la chifournie du temps pâssé ès veil'yes, au jour d'aniet y'a d'la musique à touos les bords: d'nos stâtions d'radio à la clob'thie. Et si ch'est chanter des cantiques dé Noué ou "Man Bieau P'tit Jèrri" et d'aut's chansons patriotiques ès fêtes et séthées, nou peut s'rêjoui d'not' héthitage musicale.
La technologie nos offre la musique tréjous d'amain. Les joueurs d'mp3 sont hardi conv'nabl'yes. Lus mémouaithe peut cont'nîn l'êtchivalent d'eune ais'lée d'disques en pliastique ou d'un tas d'CDs - eune satchie d'sŷmphonies ou eune racachie d'rock. Et nou-s'est libéthé par chutte technologie: nou peut s'êtrav'ler l'ventre au solé dans l'gardîn, dans iun des pars en Ville ou sus la grève, à êcouter d'la musique s'lon san chouaix ou par la jouêthie à Dgi l'adèrt sans aver à changi dé disque ou d'èrtouônner la cassette coumme ch'tait l'cas auve les vièrs walkmans. Et la nouvelle technologie aîgue ès cheins tch'aiment êcouter les Proms étout, car nou peut r'êcouter touos les concèrts en lîngne à san laîsi.
L'Êté n'est pon raîque la saîson des Proms car j'avons étout des concèrts au grand air. Lé festival Jersey Live à La Trinneté au c'menchement du mais d'Septembre a gângni eune bouonne réputâtion et attrioque des dgaîngues dé hors Jèrri et des sonneurs d'ichîn pouor pliaithe ès jannes gens, et ès mains jannes étout. Parmi les grands noms ch't' année sont Basement Jaxx, The Kooks et Dizzee Rascal, et y'a des sonneurs d'la France: la dgaîngue Gablé présente d'la musique pus à co expéthimentale, mais s'i' lus en vont apporter lus aspithateu sus la strade chutte fais, nou n'sait pon. La chant'rêsse Emily Loizeau propos'sa sans doute dé tchi pus traditionnel. Et y'étha étout les dgaîngues dé Jèrri coumme Kevin Pallot, Les Chent'nièrs et les rockeurs BlackStats.
Véthe, y'a du talent. Coumme Wace êcrivit: "Cist sout de nature de chant, Unches hom plus n'en sout, ne tant: De tuz estrumenz sout maistrie Si sout de tute chanterie" (Ch'tî-chîn savait la natuthe du chant: n'y'avait pon d'houmme tch'en savait pus ni tant. I' 'tait maît' dé touos l's înstruments et savait tout entouor la chant'tie). Sonnez don, sonneurs!
Geraint Jennings
Viyiz étout: