Ah! Je n'sis pas coumme li,
Je n'peux pon m'en réjoui.
Ch'est une minzèthe
Dans l'vêzine;
Tous sembl'yent jouer
Au sien qu'est l'plièthe,
Et tant d'musique
Dounne l's'hystériques!

J'mé rappelle bein du temps
D'y'a vingt ou vingt-chinq ans!
Qu'nou z'tait à s'n'aise,
Chatchun siez sé,
La pipe au bé,
Dans sa grand tchaise,
Ov sa Chronique,
Et sans musique!

Annièt qu'chest difféthent!
N'y'a pon un seul moment
S'maine ou Dimanche
Sans do.. ré.. mi.. !
Si l'un finit
L'autre erquemanche!
Tréjous astique..
Fichue musique!

Y'a une èrchervellée
- Ch'est une fille de journée -
Tchi, dès sièz heuthes,
Dèchithe les airs
Ov san Wagner.
Souvent j'en plieuthe!
Oh! qué l'vier nick
Prenje sa musique!

Touos les matins ch'est d'même;
Pas d'paix même en Carême!
Sa chance s'sa belle
Si tchic matin
Je n'mets pon fin
A mad'moueselle
Et sa musique
Ov une d'mié brique!

Mais d'vant qu'chette-là s'sait horte
Y'en a de toutes les sortes;
Tout l'long d'la route,
A chaque piano..
Sol.. la.. si.. do..
Et tous dêroutent!
Ils 'n'ont la trique
Fichues musiques!

Grimpées sus lus scabelles
Des digottes de hardelles
Tapotent.. Tapotent
Mi.. fa.. sol.. la..
J'lus veurs pas d'ma..
Mais piesse une botte
Ou une buanne trique
Cliore lus musique!

Tout l'jour ch'est la même chose,
Pas un moment j'né r'pose,
'Sitôt qu'l'êcole
A prins l's'aviers,
Touos les pus viers
Au piano volent..
Et lus musique!
Ch'est d'tchi tragique!!

Quand l'heuthe des r'pas arrive
Souvent ch'n'est qu'pain et chives
Qu'les pouorres hoummes mangent
Autant d'do.. ré..
N'graient pas l'diné.
Faut qu'nou s'arrange
Et qu'nou s'en lique! -
Maudite musique!!

J'affolais une séthèe
Et j'fut faithe une touannèe
Pour être trantchille.
Boustre d'mêtchi,
Ch'tait sol.. la.. si..
Par toute la ville.
Ah! vilaine clique
De joueux d'musique!

Mes ouothelles en bourdonnent,
Tout l'temps des pianos sonnent,
Et mé j'enrage,
Faut qu'j'y mette fin,
J'n'y peux pus t'nin!
J'men vais en v'yage:
J'pars en Afrique
L'iyain d'la musique!

Elie
3 Août 1908