La Sèrbie gângnit la compétition Ûrovision ch't' année auve eune bouonne chanson, mais y'avait des pliaintes (et chenna sustout au Rouoyaume Unni tchi r'chut des mèrques dé raîque deux pays) qué touos les vaîthîns d'la Sèrbie votîtent pouor chutte chanson-là et qué chenna n'tait pon du fèrre-pliaie. Tout coumme la Sèrbie avait r'chu tant d'mèrques des pays du Vouêt qu'même si les pays d'l'Êst avaient 'té exclius d'la vot'tie la même chanson éthait gângni.
Parmi les gronmâcheurs, y'en avait tchi proposîtent qué si touos les pays Britanniques lus s'pathaient, y'éthait assez d'vouaix pouor contré-balanchi les cheinnes des Balkans. L'Angliétèrre, Galles, l'Êcosse, l'Irlande du Nord, l'Île dé Man, Dgèrnésy et bein seux Jèrri dévthaient voter s'pathêment. Lé Bailli avait dit dans san discours du Jour d'la Libéthâtion qué j'sommes un êtat pus souvérain qu'janmais, mais j'ai des doutanches qu'i' n'pâlait pon d'Ûrovision.
Si j'avêmes à voter en Ûrovision îndépendamment, j'éthêmes à présenter eune chanson à nous. Mais j'avons-t-i' assez d'hoummes habilyis en femmes ou d'poules tchi chantent en co pouor satisfaithe chein tchi pathaît êt' la tradition d'chutte compétition?
Au mains j'avons des sounneurs et des chanteurs. Lé grand concèrt du Jour d'la Libéthâtion m'né par l'Sieur Gérard L'Feuvre 'tait mangnifique et ch'tait bein d'ouï les poésies en Jèrriais liues par Ursula Taylor sus la strade. Et coumme tréjous, dans la Pièche d'la Libéthâtion la chant'tie d'Man Bieau P'tit Jèrri par Sadie Rennard 'tait un pliaîsi. Mais j'fus ravi d'liéthe qué, s'lon l'rapport dans la gâzette, ou chantit en Français. Nou-fait, Man Bieau P'tit Jèrri a des patholes en Jèrriais et en Angliais. L'antienne tch'est en Français est Ma Normandie.
La date-lînmite d'la compétition pouor chouaîsi officiellement eune antienne est la fîn du mais d'Juilet. Les cheins tchi veulent nonminner lus antienne préféthée sont encouothagis d'env'yer lus formes pouor chutte date-là. Nou peut sé d'mander si la compétition s'sa organnîsée pustôt coumme la cheinne d'Ûrovision. Nou-s'en va-t-i' voter par pâraisses? "Né v'chîn les rêsultats du vote Saint Cliémentais: dgiêx mèrques... douze mèrques... "
L's Êtats ont fliantchi hors les r'formes êlectorales proposées à ches drein, mais i' n'ont pon considéthé la pôssibilité d'aver d's êlections à l'Ûrovision. Si nou pouôrrait télévoter pouor les Sénateurs, l's êlecteurs s'saient pus entchéthinnés sans doute - sustout si les candidats lus habilyaient en costeunmes d'argent auve d'l'êtinchelle. Mais viyant l'pouôrre rêsultat d'l'entrée du Rouoyaume Unni en Ûrovision ch't' année, i' n'vaudrait pon s'habilyi en hôtesse d'l'air.
Geraint Jennings
2007
Viyiz étout: