I.

Sounn' donc, sounneux! - Fuôt' ton violon, -
Que ten archet halle un' chanson
De li, coumm' li seul peut dounné.
Coumm' n'ya qu'violon qui peut chanté!
Sounn' donc, sounneux!

II.

Men âme est triste. Il l'y faudrait
Une achie d'lerm's. Chla la r'fêrait..
Mais 'las! les plieurs ne veul'nt pas v'né;
O violon! tâch' d'les fair' coulé!
Sounn' donc, sounneux!

III.

Bein fait, sounneux! - Tuas réussi! -
Ah, de qui paids m'vla soulagi!....
Mais, farceux - qu'êch'? - tu voudrais m'faire
Rir' bétôt tant que j'veins de braire?
Bein, - sounn', sounneux!

IV.

Drôl' de sounneux! - Je ris - je plieure -
Just' comm' tu veux; et v'lo à cht'heure
Tu m'excit's tant que j'puorais m'rué
Sus l'premier v'nu et m'fair' rossé...
Arrêt', sounneux!

V.

Mais, O nouffet! - Joue, joue, j'ten prie -
Continue tes sons d' chorchell'rie!
Et montre, après cris déchênés,
Coumm' cris d'amour peuv'nt êtr' chantés!
O sounn', sounneux!

VI.

Et, dis tout bas à ton violon
D'emprunter d'Là Haut SA chanson!....
Mercie! - Joue! - joue!...Je freum' les yeux -
O joie! - I' m'sembl' que j'sis ès cieux, -
Sounn' - sounn' - sounneux!

L.

Man âme est triste, i l'y faudrait
Eune achie d'lèrmes. Ch'là la r'féthait...
Mais las! les plieurs ne veulent pas v'nin:
O violon, tâche d'les faithe couler!
Sounne donc, sounneux!

Bein fait, sounneux! Tu as rêussi! -
Ah, dé tchi paids lé v'la souolagi! ...
Mais, farceux - estch'qué tu voudrais m'faithe
Rithe bétôt tant qué j'veins dé braithe?
Sounne donc, sounneux!

Drôle dé sounneux! - Jé ris, jé plieuthe -.
Juste coumme tu veuthe: et v'lo a ch't heuthe
Tu m'excites tant qué j'pouorrais m'rué
Sus l' preunmyi v'nu et m'faithe rossé...
Arrête, sounneux!

Mais, o! nouffet! - Joue, joue, j't'en prie!
Continue tes sons d'chorchell'rie!
Et montre après cris dêchainés,
Coumme cris d'amour peuvent être chantés.
O sounne, sounneux!

Et dis tout bas à tan violon
D'emprunter d'Là Haut sa chanson!
Mercie! Joue! Joue! ... Jé freunme les yeux...
O jouaie! i'm sembl'ye qué j'sis ès cieux!
Sounne, sounne, sounneux!