L'Hiver

Quand le sombre et freid hiver
N'a quasi que d'vos ag'ver;
Quand la nèi bllanchit la terre,
Et qu'la g'lèe fendrait la pierre;
Quand l'ongllie vos tchient les deights,
qu'ous soufflièz coume un pourpeis:
Ah! souvenous de la minsethe;
N'oubllièz pon votre frethe.

Ergardèz chu pouore avé,
Grélottant, tremblliant de freid;
I cllopine du pid gauche;
I n'a ni sôlèr ni cauche;
Demandèz-li s'il a faim;
Bâillèz-li un crotin de pain:
Ah! souv'nous de la minsethe;
N'oubllièz-pon vot' frèthe.

Ous l'app'lèz un vagabond!
Nou crie d'sus et châtqun l'grond;
Et v'la qu'a ni pèth' ni mèthe,
Car l'prumié ne fait que bèthe,
Et la mèthe est un satan;
Du q'mench'ment jusqu'au but d'l'an.
I n'veit rein que d'la minsèthe;
Et pourtant il est vot' frèthe.

Il est pièr' qu'un orphélin,
I' n'sait pus à qui dev'nin;
Avous peux que l'avé vole?
Enviez-le à quique êcole;
Ous pouorrèz par le travas
Le prev'nin du mauvais pas;
S'ous voulèz l'empêchi d'bèthe,
Seyiz-li pour pèthe et frèthe.

Ah! richard, dans ten parleux,
Tu n'veit pon le malheutheux;
Te crôlant dans ta grand' tquaithe,
N'ayant que tei-même à pllaithe;
Tu te tâne en un caud lièt,
Rein n'te gène et rein n'te gnièt;
Tu n'sai rein de la minsèthe
Qu'est le sort de pus d'un frèthe.

AALG

Vèrsion modèrnîsée:

L'Hivé

Quand l'sombre et fraid hivé
N'a quâsi qué d'vos ag'ver;
Quand la né blianchit la tèrre,
Et qu'la g'lée fendrait la pièrre;
Quand l'onglyie vos tcheint les dés,
qu'ou soûffliez coumme un pourpais:
Ah! souv'n-ous d'la mînséthe;
N'oubliez pon vot' fréthe.

Èrgardez chu pouôrre avé,
Grélottant, trembliant d'fraid;
I' cliopinne du pid gauche;
I' n'a ni saûlé ni cauche;
D'mandez-li s'il a faim;
Bailliz-li un crôtîn d'pain:
Ah! souv'n-ous d'la mînséthe;
N'oubliez-pon vot' fréthe.

Ou l'app'lez un vâcabond!
Nou crie d'ssus et châtchun l'grond;
Et v'là tch'a ni péthe ni méthe,
Car l'preunmié n'fait qu'béthe,
Et la méthe est un satan;
Du c'menchement jusqu'au but d'l'an.
I' n'vait rein qu'd'la mînséthe;
Et pourtant il est vot' fréthe.

Il est piéthe qu'un orphélîn,
I' n'sait pus à tchii dév'nîn;
Av'-ous peux qu'l'avé vole?
Envyez-lé à tchique êcole;
Ou pouôrrez par l'travas
Lé prév'nîn du mauvais pas;
S'ou voulez l'empêchi d'béthe,
Séyiz-li pour péthe et fréthe.

Ah! richard, dans tan parleux,
Tu n'vai pon l'malheutheux;
Té craûlant dans ta grand' tchaithe,
N'ayant qu'té-même à pliaithe;
Tu té tâne en un caud liet,
Rein n'té gêne et rein n'té niet;
Tu n'sai rein d'la mînséthe
Tch'est l'sort dé pus d'un fréthe.

Viyiz étout: