Moussieu l'Editeu
Y'a eune tchestchon qu'j'ai yeu l'idée d'vos d'mandé y'a dêja longtemps. Est-che vrai qu'j'allons bétôt r'avé notre Milice?
Je d'mande parsque y'a ben l's'années j'tais corpotha dans la Compagnie d' Saint Ou et j'me r'souvains d'ben des choses concernant la Milice de ches temps-là, quand j'avions la rouge câsaque et ches fichus helmets tchi fallait mettre pour l'Inspection et la Grand'R'veux.
J'ai yeu ben des bordées d'fun dans la Milice. Tchiquefais j'avions un Officyi dans notre Compagnie et tchiquefais n'y'en avait pas, mais v'la tchi n'faisait autchune difféthence sinon que quand j'nos trouvions seulement avec le sergent du staff, ch'tait les sergents et les corpothaux tch'avaient à mettre lûs mains dans lûs pouchettes quand y tait tchéstchon d'payé une fais à béthe ès garçons, eune chose tchi s'arivait châque bordée qu'la Compagnie déshallé.
J'ai ouï dithe par des gens ch'y n'savent pas mûs que n'y'avait autchune discipline dans l'Régiment du Ouêst, mais chenna ch'n'est pas vrai.
Sans doute nou viyait tchiquefais les Saint-Ouennais en marche pour l'arsénal de Saint Pierre ou Saint Mathie avec lûs câsaques dêboutonnées et des bowlers ou des chapiaux d'paille sus la tête au lieu des helmets ou des castchettes militaithes. Sans doute étout le drill n'était pas trejous exactement comme il est explitchi dans les livres. Et à la Grand'R'veux je n'voudrais pas dithe que la ligne de notre Compagnie tait pûs draite que chonna.
Mais, auprès tout, ches p'tites choses-là n'content pas. L'important ch'est d'pouvé tithé drait et n'avait pas d'peux de s'battre et j'n'avions jamais d'peux d'être trouvés en d'faut sûs ches points-là.
La Merrienne voudrait dithe que la Milice tait la ruine des jeunes garçons, mais ch'est du niolin. J'avions tait mathiés bétôt siez mais quand j'fut mint Corpotha et j'mé r'souveindrai tréjous que quand je r'vint y'annoncé la grande nouvelle ou tait pûs ordguilleuse que si j'avais tait nommé Connêtablye d'la pâraisse.
Ch'n'tait pon d'la p'tite biéthe que d'être Corpotha dans la Compagnie d'Saint Ou dans chu temps-là et la Merrienne le savait ben. Le sam'di ou s'en fut en ville et quand ou s'en fut au tchulte le préchain jour oulle avait sus la tête un bonnet tchi causit tant d'jalousie que l'prédicateur eut à s'en mêle.
Mais oulle a r'oublié tout chenna et à la ouï pâslé les Miliciens d'aut'-fais n'taient jamais contents si n'taient pon à béthe ou à s'entre quétillyi.
“Et,” comme ou s'fait, “quand y'avait du travâs à faithe ch'tait ben drôle mais y'avait tréjous un drill tchi duthait jusqu'à miniet.”
Nou n'gâgne rein d'ardgumenté avec le bouonnefemme quand ou s'met d's'idées dans la tête, car n'y'a jamais yeu d'mule pûs têtoigne. Mais ou peut dithe chen qu'ou voudra. Service dans la Milice ne faisait pas d'ma à un garçon tch'avait la tête ben pôsée sus ses êpaules, et tch'y savait s'comporté.
Nou dit que n'y'avait autchune discipline, mais ch'n'est pas vrai. Sans doute un bouon Saint Ouennais se respectait trop pour salué un officyi et nou n'a jamais r'oublié la bordée que l'régiment du Ouest r'fûsit d'marchi à la Grand' R'veux, mais si j'avions yeu eune djèrre contre Djernézi, j'lûs éthâimes montré des soudards comme nou n'en éthait pas trouvé ailleurs, épis ben seûx.
La Merrienne vos fait ben ses compliéments et espéthe que yun d'ches jours ou trouv'thez l'temps d'pâssé par siez nous pour gouôté des merveilles.
PH'LIP
25/1/1947
Viyiz étout: