Trenton
Michigan, USA
Lé 3 d'juilet, 1982
Moussieu l'Rédacteu
"Souos l'Hôlouoge" dans la colonne tréjous întérêssante dé ''Meridian'' dans la gâzette du trais d'juîn y'avait un mangnifique portrait d'la Milice Rouoyale dê Jèrri en Grand' R'veue sur l'sablion dans les Grèves de la Ville en mil neu chent neuf. Eh bein, j'tais iun des miliciens dans chutte Grand' R'veue-là. Oulle avait lieu touos l's ans lé 24 dé mai.
Ou n'allez sans doute pon mé connaître parmi touos ches soudards, mais j'vouos asseûthe tch'i n'y'en avait pon un aut' dans toute la Milice en r'veue tch'était pus heutheux et ordgilleux qu'mé chu jour-là dans ma rouoge câsaque et man ''casque'' atout un pitchet sus l'haut, et m'n arme à l'êpaule atout la baïonnette au but.
Ch'tait au c'menchement dé 1908 qué j'fus appelé à m'présenter à l'arsénal dè St. Pierre (jé d'meuthais à St. Brélade dans l'temps) pour faithe man sérvice d'èrcru. J'n'avais pon seize ans d'vant lé 29 dé septembre, 1907, trop tard pour êt' appelé ch't' année-la. J'fus mîns dans les sîngnaleurs, et à la fîn du tèrme d'înstruction j'eus la chance dé gângni la tchulyi d'argent présentée par Les Êtats pour lé miyeu d'ma classe. Étant à court dé sîngnaleurs dans l'Bataillon du Ouest, i' mé d'mandîdrent si j'voulais être accoutré sus l'coup et aller au camp dans l'bataillon. I' ne mé prîns pon longtemps à dithe ''oui'' ! La Grand' R'veue dé 1909 'tait ma deuxième.
J'vouos ai probabliément raconté tout ch'la d'vant, et j'vouos d'mande de m'pardonner si j'sis à vouos enn'yer auve tout chu d'vis entouorre man sèrvice dans la Milice Rouoyale mais j'en r'tcheins d'si pliaîsantes mémouaithes qué j'ai d'la peine à m'empèchi d'en pâler.
A ch't [heu] qu' les gâzettes m'apportent les nouvelles par avion, j'ai la chance dé m'garder pus au ras d's'êvènements tchi s'pâssent en Jèrri. Dans la cheinne du 17 dé juîn, j'tais content d'vaie qué lé Lieut'nant Christopher Whiteley (fis d'nouot' estînmé Gouvèrneur Sén Excellence Messire lé Général Peter Whiteley), bliessé à la dgerre des Îles Falkland, n'est pon en dangi d'sa vie et tch'i' s'en va sé r'faithe. Lé Général Whiteley, un moussieu charmant et affabl'ye, pathaît êt' bein êtablyi dans l'amiêtchi des Jèrriais, et ch'est seux qu' ou-s-étiez touos gênés pour la seûtheté d'san fis et des Jèrriais, et du Prînce Andrew d'Angliétèrre, à la dgèrre. J'espéthe tch'il en sont touos r'vénus sains et saufs, dé chutte dgèrre.
En pâlant des Îles Falkland ch'est hardi êntérêssant d'liéthe, souos ''Meridian'', dans la gâzette du 10 d'juîn, qué lé livre dé l'Avocat Raöul Lemprièthe nouos dit qué Francis de Carteret, Seigneur dé La Trinneté, 'tait Lieut'nant à bord dé la frégate HMS Tamar quand, en 1764, lé Cap'taine dé chutte frégate otchupit l's îles au nom d'l'Angliétèrre et tch'il ont 'té souos la couleu Britannique 218 ans. Ch'est en tchi nouos gâzettes ichîn en Améthique sont en erreur quand i' dIsent tch'il ont 'té rein qu' 150 ans souos l'gouvèrnément Angliais.
Nou vait d'drôles dé choses dans la gâzette dé temps en temps. Dans la même, par exampl'ye, i' y'a l'cas du motoriste tchi mordit le nez au conducteux d'taxi tch'était l'avant à li. I' méthite bein les tchînze jours de prison qué l'Magistrat lî donnit. En Améthique, i' fut l'rîsibl'ye cas d'un homme condamné pour aver mordu un tchian, mais j'n'avais pon 'couo veu un cas où'est qu'un homme eûsse mordu l'nez d'san sembliabl'ye !
J'mé d'mandé si j'm'en vais r'connaître Jèrri si ma santé m'pèrmet d'y'aller ch't' année. La même gâzette nouos donne des portraits des travaux dans la grève à côté d'la caûchie Albert. Mais pour mé ch'est pûtôt difficile d'envisagi comment qu' ch'la pathaît en rêalité. Appathemment, un neu talustre ou ''brise-lames'' est en train de construction tchi s'en va en fîn d'compte êt' mathié à l'entrée d'la caûchie. Eune entréprînse formidabl'ye ! Est-i' pôssibl'ye qué iun peut êt' bâti fort assez pour supporter les ravages dé la mé quand les tempètes et vents ravageux lus y mettent ?
Et la Parade ? Comment qu' ou pathaît dépis qu' les nouviaux ''grattes-ciel'' des Etats sont en pliaiche ? Ch'est eune bouanne chose qué l'Genéral Don est là comme sentinelle à garder s'n yi d'ssus. J'ai tréjous ouï qu' ch'est li tchi fut l'architecte des grand' routes dé l'Ile, et i' dait admither l'architectuthe des nouvieaux bâtisses. Quant à mé, j'n'ai pon fort d'admithâtion pour ches grands carrés bâtisses tchi sont ''functional'' (mot Angliais) comme i' dîsent ichîn en Améthique, mais tchi n'ont autcheune bieauté ni d'caractéthe d'appathence autrément.
George d'La Forge
Viyiz étout: