San Antonio, Texas,
U.S.A.
Lé 14 dézembre, 1968.
Moussieu l'Rédacteu,
Nou n'en finnit janmais, d'reunminner, quand nou-s-est au pid du feu à l'entou d'l'âtre dans l'vièr ménage à St. Ouën. En r'gardant l'tou d'mé, j'm'èrsouveins qué sus l'côté ouest d'la salle, où'est qu'j'ai pendu un portrait d'La Batâle dé Jèrri, y'avait, dans l'temps d'ma grand'grand'méthe y'a pus d'septante ans, eune grand' carte géographique tchi montrait les deux “hémisphères” du monde. I' m'sembl'ye qué j'la vai acouo, auve ses deux rondasses ieune à côtè d'l'autre. Ou' n'tait pon enfrêmée, mais oulle 'tait cliouée à un bâton d'rond bouais haut et bas, et oulle 'tait si jaunie par l'âge et enfuntchie par la feunmée d'bein d's années, qué nou-s-avait d'la peine à dêchiffrer la p'tite êcrituthe dessus. Oulle 'tait acouo-là quand jé c'menchis à aller à l'êcole siez Miss Mabel Maugi, pus tard Missis George L'Boutilyi (oulle est acouo en vie à 90 ans ou pus), à l'âge dé sept ans. La grand'grand'méthe 'tait décédée par chu temps-là, et m'n oncl'ye Charles (1834-1911) démeuthait tout seu dans l'ménage. Il avait mîns san liet l'long d'la muthâle, et la carte restit pendue en d'ssus. Dans l'vivant d'ma grand'grand'méthe, i' couochait dans l'aître à liet dans la salle mème. M'n oncl'ye Charles (il 'tait rêéllement man grand oncl'ye) avait 'té à La Côte, mais il 'tait r'vénu pour souangni d'sa m'mèe quand man grand-grand-péthe Jean Thomas mouothit. J'allais l'vaie d'temps en temps, et quand jé c'menchis à pouver liéthe j'm'appèrchus qu'l'êcrituthe sus chutte carte-là 'tait en Angliais. I' m'veint à l'idée, ichîn en Améthique, qué tchique èrprésentant d'conmêrce d'Angliétèrre avait mênagi à vendre eune quantité d'ches cartes-là en Jèrri et qu'ch'est r'mèrquabl'ye quand nou pense qu'un tas des gens tch'i' l's avaient acatées - et j'm'èrsouveins d'en aver veu plusieurs quand j'allais auve Manman siez les vaîethîns - n'pouvaient ni liéthe ni êcrithe!
Eune fais qué j'pus liéthe un mio, chutte carte-là m'fascinnait hardi, car j'viyais les noms des pays du monde dessus, mais m'n oncl'ye Charles né pouvait pon comprendre pour tch'est qué j'passaîs tant d'temps à r'garder la vielle carte!
I' n'y avait pon d'chambres à haut dans chu temps-là. Ch'tait l'galtas du ménage, et nou-s-y montait par eune trappe tch'était dans la cârre du pliafond à drouaite dé l'âtre. J'mé r'souveins, étout, qu'l'appartènement d'l'aut' côté d'allée, tch'est la biblyiothèque d'à ch't heu, n'tait pon aménagie ouaithe tch'i' y'avait eune belle âtre d'dans. Oulle 'tait plieine dé fain ou d'êtrain dans l'vivant d'ma grand'grand'méthe.
Ma grand'tante Jane (1843-1909) démeuthait d'l'aut' but du Ménage ès Feuvres dans chu temps-là (j'vouos pâle dé y'a pus d'septante ans). Oulle 'tait vielle fille et gardait êcole-là; ch'est à dithe qu'ou' souangnait des p'tits êfants des vaîthîns et lus apprenait lus a b c s'il' 'taient grand assez. Ou' n'avait qu'deux appartènements et ou' d'meuthait et couochait dans iun et garder s'n êcole dans l'autre. J'allions, Papa et Maman et mé, baithe du thée et passer la séthée siez lyi eune fais par an. Ch'tait eune grande occâsion pour mé, car ou' nouos donnait des p'tites finnes beurrées et d'la gâche. San liet 'tait l'long d'la muthâle du nord (i' n'y avait pon d'porte-là dans l'temps), et oulle avait un grand portrait pendu sus la muthAle, et d'ssus du liet, d'La Batâle dé Sébastopol. J'tais si fascinné par chu portrait-là étout qu'ou' m'laîssait m'assiéthe sus l'liet pour qué j'pûsse lé vaie d'pus près - la veue des lampes à r'garder toute la séthée quandi qu'les grand' pèrsonnes bavardaient au pid du feu!
L'grand oncl'ye Charles m'ttait des braies d'bâthin à pliatchet et eune c'mînse dé molleton. I' gardait sa barbe comme touos l's anciens d'chu temps-là et amathait san vièr chapé d'feûtre souos san moton atout un but d'ficelle. Dans chu temps-là, i' y'avait eune pétite êtabl'ye auprès du pits. Lé pîngnon donnait à la porte. I' gardait eune vaque dédans, l'abrévait à l'auge tch'est acouo dans chein tchi reste d'la muthâle à l'est du bel, auprès au pits, et allait la m'ner à paître dans l'Clios d'Jacques.
J'ai tréjous connu La Bèrgéthie, lé p'tit triangl'ye atout ses fossés l'long d'la route et au fond du gardîn en d'vant d'la maîethon. Ch'tait-là qué l's anciens soulaient affliotchi lus brébis pour les traithe ou les tondre. I' pathaît qu'oulle est la seule bèrgéthie tch'a survêtchut l'passage du temps dans l'Île. Malheutheusement, ou' n'appartcheint pon du ménage à ch't heu. Ou' fait partie du clios à côté tchi fut vendu par l's anchêtres du temps jadis. I' faîthaient la fraude, pathaît-i', et b'vaient comme des trous viyant qu'la litcheu n'lus couôtait rein! Quand i' v'naient à court dé sou i' vendaient un clios, et i' n'reste qu'quatre vrégies sus souoxante au ménage! Ch'est eune chance tch'il est acouo dans la fanmile des Feuvres!
George d'La Forge
Viyiz étout: