Fort Lauderdale,
Florida,
USA,
Lé 15 d'avri, 1972
Moussieu l'Rédacteu,
Y'a d's Améthitchains comme y'a des Jèrriais, d'certain âge sans doute, tchi manquent la simplyicité d'la vie d'aut'fais. Un ancien m'disait l'aut' jour; "La mémouaithe est la leunmiéthe du bouan vièr temps. Ses rayons êcliaithent nouos pas troubliés d'aujourd'aniet et nouos donnent lé couothage d'affranchi l'dans tch'attend les pas du lendemain i' n'y a pon d'heuthes pus heutheuses qué les cheinnes que chutte mémouaithe-là nouos donne. Vouos r'souv'nous du temps qu'eune pèrsonne né viyait pon d'nécessité d'aver deux salles dé bain dans la maison, ni pus qu'un seul moto, dans l'garage, ni pus qu'eune femme à la fais?
"La grand' difféthence entre lé village et la ville du temps jadis est qué l'village pouvait s'vanter d'n'aver qu'un seul imbécile et un seul ivrouangne. Les seules pèrsonnes tch'avaient l's heuthes dé travas des bantchièrs. Les gens m'ttaient pus d'fouai dans la gangne dé Dgi qué d'êt' sus la pâraisse, et nou marchait pus souvent dans l'pité qué sus du pavé. Si nou voulait tchiquechose qué nou n'avait pon héthité, i' fallait travailli pour gangni des sou pour pouver l'acater.
"Dans chu temps-la nou n's'attendait pon qué l'gouvèrnément s'en allait vouos bailli la leune. Lé docteu 'tait si embarrassé à visiter les malades a domicile tch'il avait d'la peine à garder d's heuthes fixes pour les cheins tch'allaient l'vaie dans s'n office. Et i' n'tait pon payi la maintchi du temps. J'm'èrsouveins d'aver ouï l'bouanhomme Docteu Bélanger dithe tch'i' v'nait d'accouochi eune femme dé san septiéme êfant et tch'i' n'avait pon 'couo 'té payi pour san preunmyi ouaithe qué ch'tait li tchi l'avait acouochie pour touos les sept! Nou viyait pus d'drôles dé pèrsonnalités par les c'mîns qu'à ch't heu, car les gens avaient l'couothage d'êt' îndependants et ieux-mêmes pûtôt qu'd'êprouver à faithe pus d'teurs et aver pus d'motos et pus d'dettes qué lus vaisins!
"I' n'tait pon bésoin d'êt' en dette pour acater maison, meubl'yes, télevision et moto a crédit d'vant s'mathier. Nou-s-acatait l'nécessaithe un mio à la fais, argent comptant, à m'suthe qué nou-s-avait sauvé les sou. Ché n'tait pon rare pour un êfant d'êt' né dans l'mème liet où'est qu' san grand-grand-péthe avait passé l'pas. Autcheune pèrsonne tch'avait du pain et du beurre sus la tabl'ye 'tait satisfaite qué la vie valait la peine et tch'i' fallait en r'mèrcier l'Bouan Dgieu. I' n'y avait qu'siez l'apotitchi qu'nou pouvait acater des boulets et d'la méd'cinne. Quand nou viyait un garçon et eune fille bras d'ssous, bras d'ssous dans la rue nou pouvait vaie à coup dg'yi létché des deux tch'était l'garçon. Eune tassée d'café n'couôtait qu'chîn sou, mais l'café avait tout aussi bouan goût comme lé chein tchi couôte tchînze sou la tasse dé nouos jours. Eune janne fille pouvait convier sa grand'méthe à eune séthée d'thiâtre ou d'cinnéma sans aver peux que l'langage dé d'ssus la strade ou l'êcran n'li fîsse honte.
"L's anciens tch'avaient à pâsser les dreines années d'lus vieillèche dans eune âsile dé viel gens ou à l'Hôpita, 'taient les cheins tchi n'avaient pon d'êfants. Il 'tait temps pour un mousse à aver eune neuve pathe dé braies quand les clius sus ses vielles avaient bésoin d'clius! Presqué toutes les fanmiles acataient à crédit à la boutique duthant la s'maine, et lé p'pee allait payi l'compte - en argent comptant - lé sanm'di au sé. I' n'y avait qu' les riches tch'avaient des sou à la banque, et j'ai ouï dithe tch'i' n'taient pon si bouans payeurs comme les cheins tchi gangnaient lus vie à la sueu d'lus fronts.
"Si nou viyait eune veue alleunmée dans eune maison auprès mînniet, les vaîsîns allaient vaie s'i' y'avait tchi'tch'un malade, et ouffraient dé lier lé j'va dans l'quèrre pour aller qu'si l'docteu. Un homme pouvait travailli pour n'importe tchi fabrique ou patron sans aver à payi partie d'ses gages à un sŷndicat, et ouaithe tch'i' n'gangnait pon l'quart des sou tch'i' gangne à ch't heu, i' ménageait à êl'ver eune grand' fanmile. Un village n'avait qu'un agent d'police, et sa pus grand tâche 'tait d'condithe l'ivrouangne du vaîsinné siez li au sanm'di au sé pour tch'i' n'tchaie pon dé d'ssus l'pavé dans la route et p't êt' sé rompre l'co"
"Touos les gens du vaisinne [lus entré-] connaissaient, et ch'tait [pûtôt] lus habitude dé craithe du [bein] du vaîsin qué craithe du ma. L'églyise avait 'té bâtie par les péthes et grand'péthes des gens d'nouot généthâtion, et touos les baptêmes, mathiages et sèrvices d'entèrrements avaient lieu d'dans. Ouaithe tch'i' n'y avait pon pathelle chose comme la dgiême du minnistre, i' n'avait pon à acater ses ledgeunmes - ch'tait au chien tchi li'en donn'nait l'pus."
J'éthais peu li dithe qué la simplyicité d'la vie avait dispathu en Jèrri comme ailleurs et, étout chose acouo pus tragique, que les vrais Jèrriais dispathaîssent en Jèrri!
George d'La Forge
Viyiz étout: