Le Ménage ès Feuvres,
St. Ouën.
Lé 15 d'Octobre, 1977.
Moussieu l'Rédacteu,
J'm'en r'vais en Améthique, et jé s'sai là-bas par lé temps qué chuttre lettre pathaîtra dans la gâzette. Comme d'amors, j'sis oblyigi dé d'mander à un tas d'mes bouans anmîns dè m'pardonner pour n'aver pon ieu l'temps d'aller lus dithe à la préchaine dévant m'en aller. Ieune dé mes grandes fautes, et ch'est la même turlutte touos l's ans, est qué j'laîsse trop à faithe à la dreine minnute dévant m'embèrtchi en avion pour lé viage d'èrtou au Nouvieau Monde.
Est-ous content d'vouos en aller? les gens mé d'mandent. Eh bein oui, sus un sens, j'lus dis, car, pour mé, ch'est la rêunion auve ma fanmil'ye. Sus l'aut' sens, j'èrgret d'aver à tchitter un tas d'mes bouans anmîns ichîn en Jèrri. Mais j'ai crouaîsi l'Atlantique tant d'fais qué j'sis dév'nu accouôteunmé au changement d'pâtuthe, et si j'en vai l'heuthe ou me r'vèrrez en Jèrri l'êté d'l'année tchi veint.
En r'gardant l'feu dans la grande âtre d'la salle ches dreines séthées dans l'mênage, j'pense à toutes les mémouaithes dé man janne temps qué j'm'en vais emporter auve mé dans l'Nouvieau Monde. Tant pus qu' j'y pense, tant pus j'mé dis qué l'Jèrri qué j'tchitte à ch't heu n'est pon chu paîsibl'ye paradis sus tèrre que j'connaîssais dans mes p'tits jours!
L'âtre même mé fait penser au vièr temps. Ch'est un bouan feu d'bouais souos la cranne tchi m'garde compangnie à ces sé. Quand j'tais mousse ch'tait aut' affaithe. J'allais auve ma grand'-grand'-méthe qu'si des couêpieaux dans les clios pour brûler d'dans. Nou les ramâssait par pannelées. Et nou brûlait du vrai sé, et du bouais à feu étout, sans doute. Mais l'radgîn d'feu qué j'sis à r'garder à ch't heu monte quâsi dans la cheunm'née et est là pour man pliaîsi et ma compangnie. Mais dans l'temps d'ma grand'-grand'-méthe, née Lîsabé L'Brun (1806-1895), les gens éthaient couoyé l'bouais. Ch'tait un p'tit feu pour apprêter les r'pas et pour sé garder les pids cauds au sé en attendant dé s'couochi.
L'grand-grand-péthe Jean Thomas sé gardait caud auve sa c'mînse dé molleton sus ses êpaules, et la grand'-grand'-méthe atoute san châle, et sa couêffe restait tréjous sus sa tête. I' m'sembl'ye qué j'la vai acouo assise au coin dé ch't âtre atout san po à s'no à côté d'lyi et un rouoge mouoché sus ses g'nouors en cas qu'un d'gout s'êcapîsse du but d'san nez!
Quand j'vai les femmes ès entèrrements, nueu-têtes et en habits d'divèrses couleurs, j'pense au temps qu' les femmes portaient l'deu pour trais ans, la preunmiéthe année la fache couvèrte atout un vouaile dé crêpe tchi d'scendait jusqu'ès g'nouors.
Les méthes allaient tréjous à l'églyise pour êt' èrlévées auprès la naîssance dé lus êfants. Ouaithe qué les Wesleyens fûssent en grand nombre dans la pâraisse, la grand' partie d'ieux avaient lus êfants baptisis dans l'églyise, et les méthes y'allaient pour êt' èrlévées étout.
Au Dînmanche, quand j'vai lé p'tit nombre d'êfants dans l'École du Dînmanche et tch'i' dgaingue dé mousses lé tou des maîsons mênommées St. George's Estate à jouarder à la pliaiche d'êt' dans l'églyise, j'pense au temps qué les pathents faîsaient les mousses aller à l'Êcole du Dînmanche et tch'i' y'avait six ou sept classes dé garçons dans l'côté sud d'l'églyise, et l'même nombre d'filles dans l'côté nord, et qué l'bouan vièr Maît' Elie Maugi 'tait Surîntendant d'l'êcole.
Ch'tait rare qu' un mousse eûsse pus qu' deux fas d'habits, iun pour touos les jours et l'aut' pour lé Dînmanche. Ch'tî-là 'tait pendu souangneusement dans l'armouaithe à haut et 'tait fait sèrvi seulement pour aller à l'églyise et ès fêtes.
Au sanm'di matîn, lé mousse dé la maîson bliatchinnait les bottes et les souliers dé touos les membres dé la fanmil'ye. I' faillait êcopi sus l'bliatchîn et l'mett' sus l'tchui atout eune pétite brînge, et pis frotter à tigue dé corps atout la grand' brînge pour lé faithe èrlithe!
Et quand j'pense ès sou qué j'vai les mousses gaspilyi ches jours, j'pense au temps qu'un oncl'ye mé donnait deux sou la s'maine pour garder sa bicyclette nette touos les jours. I' fallait la netti au sé, sans doute. Et eune fais i' m'donnit quat' sou, mais i' m'dît dé n'lé dithe pon à pèrsonne - dé peux qué ch'fûsse considéthé comme un précédent.
Mais né v'là man feu tchi s'dêteint. Il est temps d'tchitter ma rêvach'chie du temps jadis et d'aller m'couochi.
À la préchaine. J'vouos r'êcrithai d'Améthique!
George d'La Forge
Viyiz étout: