Trenton,
Michigan, USA.
Lé 12 d'avri, 1980.
Moussieu l'Rédacteu,
J'veins d'èrchéver deux gâzettes dé Jèrri en même temps, les cheinnes du sept et du quatorze dé févri, et la preunmié chose qué j'vai en ouvrant la cheine du quatorze est l'annonce du décès d'Moussieu l'ex-Député Walter John Simon, du Vau d'La Mathe à St. Pièrre. I' n'y'avait qu' siex ans d'âge entre li et mé. J'sis bein avolé dans ma huiptante-neuvième! J'offre mes sîncéthes condoléances à Madanme Simon et à ses êfants.
Lé Sieur Walter Simon 'tait un moussieu d'belle présence. Il 'tait av'nant et charmant et respecté par tout l'monde. Et comme touos les vièrs Jèrriais, il 'tait hospitalyi. Hélas! Chutte vielle race dé Jèrriais dispathaît à grands pas. Si ma mémouaithe (vielle comme les rues à ch't heu!) né m'joue pon d'farces, i' m'sembl'ye qué san p'pèe fut Député d'St. Pièrre étout. J'lé connaîssais tout à fait bein car i' v'nait consulter l'Connêtabl'ye Francis Vibert Le Feuvre (pus tard Juré-Justicier) au sujet d's affaithes dé pâraisse quand j'tais Ségrétaithe du Connêtabl'ye y'a eune septantaine d'années. Ch'est en tchi lé Sieur Walter t'nait d'san p'pée pour aver sèrvi sa pâraisse auve distînction pour bein d's années.
J'tais hardi întérêssi en liêsant dans l'articl'ye dé “Meridian”. “Calling all Norsemen”, dans la même gâzette, qué dans “Le Courier de la Manche et des Iles Anglo-Normandes” les rédacteurs dé chutte nouvelle publyicâtion dîsent qué les trais léopards dé Nouormandie sont lus point dé ralliement (“rallying point”). V'là tchi m'ramémouaithe qu' avau l's années j'ai suggéthé qu' la couleu d'Jèrri dévthait êt' les trais léopards à la pliaiche dé la Crouaix d'St. André. Comme l'affaithe en est, i' n'y'avait êvidemment pon assez d'Jèrriais dé m'n opinnîon, et dans la nouvelle couleu adoptée l'année pâssée, ouaithe qué les léopards sont montrés dans un p'tit êtchusson, ch'est acouo la crouaix d'St. André tch'en gangne.
Eune aut' articl'ye par “Meridian” au sujet d'vivre à 91 ans (“How to live to 91”) mé donne eune nostalgie. Lé portrait d'eune bouannefemme dé nénant'tch'un ans à vraitchi atout sa chûviethe mé fait vouler r'vaie les vièrs temps. Tchi privilège dé vivre jusqu'à ch't' âge-là! Et d'pouver bouler eune chûviethe chèrgie d'vrai! Né v'là la vie qu' la sîmplyicité et la trantchilité du temps pâssé apportait au monde. Sans doute, jé n'prétends pon qu' tout l'monde vivait à ch't' âge-là. Mais l'manque d'un tas d'sou faîsait l'monde couoyer et vivre trantchilement. Ergardez la difféthence au jour d'aniet. Tout pliein d'sou par les c'mîns, tout pliein d'machinnes à faithe lé travas tchi soulait êt' fait par les gens à la sueu d'lus front, tout pliein d'motos à porter l'monde ichîn et là à la pliaiche dé faithe sèrvi lus pids d'driéthe!
I' faut garder la grand' porte freunmée à la clié à ch't heu, et deux Juges ont tant d'peine à jugi l'nombre d'malfaiteurs présentés d'vant La P'tite Cour tch'i' nouos dîsent tch'il en faut un traisième. Et eune prison trais ou quat' fais pus grande qué la vielle, dans tchi qu' man grand-pèthe Cap'taine Jean Ph'lippe Giffard avait 'té gardgien, est dêjà dêcliathée trop p'tite pour havrer les malfaiteurs dé nouos jours.
J'ai tout d'même envie d'l'èrvaie, l'vièr Jèrri, même atout ses avâries modèrnes et s'n excès d'motos et d'touristes, et j'ai à peine la pacienche d'attendre jusqu'au dgiex-sept dé mai, date dé m'n arrivée dans l'Île - Dieu voulant, sans doute, car nou s'sait janmais tch'est tchi vouos pend sus la tête d'un jour à l'autre.
George d'La Forge
Viyiz étout: