San Antonio, Texas,
U.S.A.
Lé 8 févri, 1969.
Moussieu l'Rédacteu,
À St. Hélyi l'êté passé, j'vis un homme dans la Rue d'Drièthe tch'était soûl - du mains j'pense tch'i' y'était, viyant tch'i' n'trouvait pon l'trottouaithe large assez! I' craûlait d'un côté à l'autre. Ch'est seux tch'il avait bu pus qu'mé. Tout en craûlant i' chantait à tue-tête. Dans des temps i' tchittait à chanter et sé m'ttait à rithe comme un fo! Mais i' n'dîthait rein à pèrsonne, et i' n'pathaîssait pon du tout mêchant. Les gens tchi v'naient à sa recontre sus l'trottouaithe lus dêcârraient pour lî donner tout pliein d'run, et lé r'gardaient tchuthieusement. J'mé d'mandis combein liain tch'i' s'en allait aller d'vant d'être arrêté et condit à la stâtion par un Policeman. L'affaithe mé frappis comme étant assez tchuthieux d'vaie tchiquechose dé mème en pliein jour dans la ville dé St. Hélyi en mil neu chent souoxante-huit! Ch'est vrai qu'nou s'accouôteunme à vaie toutes sortes d'choses ches jours. Lé temps passé, par exempl'ye, quand nou viyait eune femme atout des courts chéveux nou n'pouvait pon en r'vénîn. À ch't heu, ch'est l's hommes tch'ont les j'veux longs!
En pâlant d'chant (ch't'êbédé-là, ma fingre, avait eune assez belle vouaix!), v'la tchi m'ramémouaithe qué j'ai connu d'mangnifiques chanteurs en Jèrri dans ma jannèche y'a eune souoxantaine d'années. J'm'èrsouveins d'aver 'té à l' Oddfellows' Hall à St. Hélyi (ch'tait-i' pon dans Don Street?) à des concèrts. J'tais êmèrvilyi d'ouï les belles chansons - d'habitude entouorre l'amour - chantées par des jannes filles tch'avaient d'supèrbes vouaix. Ieune prîncipalement m'reste dans l'idée. Oulle 'tait appelée I hear you calling me! J'sis à êprouver à mé r'souv'nîn du nom d'la d'mouaiselle tchi la chantait. Oulle avait eune si belle vouaix qu'nou l'éthait êcoutée toute la niet! J'sai bein qu'ou' mathyit un moussieu Angliais. J'vis san nom dans les décès dans les dreines dgiexaines années, si ma mémouaithe né m'trompe pon. Si j'tais en Jèrri, Moussieu l'Rédacteu, j'vouos d'mand'dais pèrmission dé m'laîssi examinner les vielles gâzattes pour èrvaie les noms d's artistes du chant d'chu temps-là. J'm'èrsouveins, étout, tch'i' y'avait eune démouaiselle Journieaux tch'était musicienne houors-lingne à l'êpoque.
Pour un mousse dé la campangne, ch'tait eune vraie fêté dé pouver aller à un concèrt ou au Myriorama dans l'Oddfellows' Hall. I' m'sembl'ye qué j'y sis acouo, à ieune dé ches séthées-là, et qué j'vai acouo l'janne Moussieu Charles Walter Duret Aubin arriver au haut des d'grés auve Lady Otway sus san bras. Tchi bieau coupl'ye! Moussieu Duret Aubin (j'm'èrsouveins tout à fait bein d'san p'pèe, l'Docteu et Juré-Justicier Duret Aubin) 'tait iun des pus bieaux jannes hommes dé san temps - et aussi charmant et av'nant comme il 'tait bé - et Lady Otway 'tait eune danme hardi distîndgie. I' s'adonnait qué j'tais assis dans iun des bancs dé d'vant chutte séthée-là. Ch'est probabliément la raîson qué j'm'en r'souveins si bein.
J'tais hardi intérêssi dans l'chant à l'églyise dé St. George quand j'tais tout mousse à l'êcole du Dînmanche, Messieux Ph'lippe et Charles L'Cornu, du Mangni d'Vinchelez, et Walter Pèrrée avaient d'belles vouaix. Pus tard, Jean Pèrrée - un n'veu au Sieur Walter - fut l'successeur dé s'n oncl'ye dans l'chant, et un aut' St. Ouënnais, tch'est acouo en vie dans sa huiptantaine, y'était étout - lé Sieur Jean Burlot. I' chantait la s'gonde et avait eune belle vouaix. Il 'taient bouans, li et Jean Pèrrée, à chanter à deux.
À l'églyise dé St. Brélade lé chanteux par excellence 'tait l'Sieur George Boomer, l'maître d'êcole. J'ai tréjous ouï tch'il avait 'té dans l'chant d'La Cathédrale dé St. Paul à Londres comme mousse. Il avait mathié eune démouaiselle Mayo, soeu du Sieur Thomas Mayo qu'j'avons touos connu. Il' 'taient les pathents d'Percy et Aubrey Boomer, professionnels du golf à St. Cloud en France.
Un p'tit pus tard, à l'églyise dé St. Simon, l'chant, à m'n idée, 'tait l'miyeu d'l'île. Les fréthes Le Geyt, Teddy Boielle, J. P. P. Gray (il 'tait jouailli dans Bath Street y'a eune vingtaine d'années), un Sieur Lucas tch'était boulandgi à côté d'l'églyise dans san vivant, man vièr anmîn Walter Jeandron, et deux-s'trais autres qué lus noms né m'veinnent pon à l'idée pour lé moment - touos d's hommes èrnommés pour lus belles vouaix - 'taient dans l'chant. Et pis, i' n'faut pon oublier Willie Brown tch'était dans l'chant à St. Mar dans ses dreines années. Il 'tait à St. Simon à c'menchi. Il avait eune belle vouaix d' Alto et pouvait souot'nîn chutte partie-là tout seu dans l'chant. Ch'tait un pliaîsi dé l'ouï dans touos l's Amen quand l'orgue jouait tout bas. Un aut' fanmeux Jèrriais tch'était-là dans man janne temps 'tait l'Sieur G. C. H. Le Cocq, qu'ou' connaissiz tous bein. Jé n'm'èrsouveins pon s'il 'tait dans l'chant en mème temps qu'mé. Ch'tait l'Sieur Robert Cory tch'était l'organiste-là dévant tch'i' s'en fûsse à St. Brélade, et l'Révérend Moses Godfray tch'était Vitchaithe.
Hélas! La mâjorité d'ches belles vouaix-là n'sont pus d'chu monde. J'aime tout d'mème penser tch'i' chantent quand mème acouo l' Sanctus dans l'chant céleste en mème temps qué jé l'chantons dans nouos églyises au Dînmanche au moment d'La Sainte Eucharistie!
George d'La Forge
Viyiz étout: