Trenton, Michigan,
U.S.A.

Lé 26 d'mai, 1973.

Moussieu l'Rédacteu,

Quand j'èrvîns en Jèrri y'a vîngt-siez ans, ieune des preunmié pèrsonnes qué j'rencontris 'tait eune charmante veuve tchi m'dit: Ervén'ous d'La Côte?

Nannîn, j'li dis, j'èrveins d'l'Améthique. Mais j'y'ai 'té souvent, à La Côte. J'y'étais mème lé mais pâssé!

Eh bein, ou m'dît, av'ous rencontré un homme tch'a nom Nicolas Hardeley, là-bas? I' s'en allit là-bas y'a eune chînquantaine d'années et pèrsonne n'en ont janmais r'ouï pâler!

Ch'est drôle, j'lî dis, comment qu'les Jèrriais pathaîssent craithe qué j'ai deu vaie lus pathents ou anmîns à La Côte. Sav'ous tch'i' y'a pus liain à aller d'un but à l'autre du Cannada tch'i' n'y'a à v'nîn du Cannada en Jèrri?

Oh mais, ou m'dît, êtes'ous à m'dithe la véthité? J'ai ouï qu' ou-s-êtes farceux!

Ch'n'est pon mé, tch'est l'farceux d'la fanmile, j'lî dis. Ch'est man fréthe Françot, et il est acouo en Améthique. Et man fréthe Sydney, tch'est au Cannada, est l'pus malîn et l'pus têtu d'la fanmile. Mais tch'est tch'i' vouos fait craithe qué jé n'sis pon à vouos dithe la véthité quand j'vouos pâle dé la grandeu du Cannada?

Eh bein, ou m'dît, i' faut m'estchûser. Jé n'savais dgéthe qué l'pays 'tait si grand. Il est bein pus grand qu' tout Jèrri, don?

Man Doue d'la vie!, j'lî dis, nou pouorrait mett' tout Jèrri dans ieune des grandes villés comme Toronto ou Montréal! Bouan Dgieu sait où'est tch'il est à ch't heu, vouot' Nicolas.

Eh bein, ou m'dît, jé n'peux pon dithe tch'il 'tait man Nicolas, ouaithe qué j'tions quâsi engagis quand i' s'en fut à La Côte. Ch'est-i' drôle, la vie, quand nou-s-y pense. Comme nouos l'disait Moussieu Pépîn, nouot' bouan Recteu - dans san vivant - 'L'homme propose, mais Dgieu dispose!' J'sai bein qué j'peux m'confier en vous. Nou n'conte pon ses affaithes à tout l'monde, car y'en a qué quand nou lus dit tchiquechose nou pouorrait aussi bein l'mett' dans la gâzette! Mais pour vouos dithe : Mes pathents voulaient m'mathier à Amice Patriarche viyant qu' san p'pèe avait un tas d'sou à la banque. J'tions bouans anmîns, l'Amice et mé, et i' v'nait souvent mé r'condithe, mais un bouan jour ma tante Mélie m'fit à connaître au Nicolas dé tchi j'vouos pâle.

Un bieau garçon, l'Nicolas. Vouot' Papa, tch'avait 'té à La Côte quand i' navidgeait, lé connaîssait bein, et il' en pâlaient souvent, d'La Côte. J'mé sis souvent d'mandée si ch'tait ches convérsâtions-là tchi mîndrent à Nicolas dé s'y'en aller. Enfin, eune séthée qu' nou n'viyait lèrme, i' choppit sus eune pièrre dans la route auprès d'siez nous et s'êtalvachit tout san long et s'teurtrit la g'vil'ye du pid. I' mênagit à gabather jusque siez nous, et p'pèe env'yit man p'tit fréthe siez san p'pèe pour lî dithe dé v'nîn lé qu'si atout lus hérnais. Dans l'entrétemps j'li frottit la g'vil'ye atout d'l'ieau d'vie camphrée.

Lé lendemain, j'allis siez li vaie comment tch'il 'tait. Et l'préchain lendemain étout, et touos les préchains jours dévant tch'i' pûsse sé r'mâter sus ses pids d'driéthe. Tant pus qu' j'allais l'vaie, tant pus j'oublyais Amice! I' n'y a pon d'doute qué j'mé trouvis enamouothachie d'Nicolas, et eune séthée quand i' r'quémenchit à marchi et qué j'tions dans l'gardîn parmi les flieurs et au cliai d'la leune, j'tais si êmouée que mes sentiments 'taient pus forts qué mé, et soudainement et quâsi sans l'saver, j'mé pendis à san co et j'lî dis :-

'Si tu m'aimais, et qué j't'aimais,
Mé voudrais-tu, si j'té voulais?
Ah! Bouan Dgieu vielle qué j't'aie.
Car j't'aime et j'té voudrais!'

"Lé pouorre Nicolas d'vînt si ênèrvé tch'i' n'savait pon tchi m'dithe. Ch'est seux tch'i' m'aimait tant tch'i' fut prîns sus sa pathole! Lé lendemain i' m'dît tch'i' s'en allait à La Côte pour faithe forteune, et tch'i' r'veindrait m'chèrchi quand ou s'sait faite. I' s'en allit à Paspédgia à bord du Dawn, un bieau navithe à vailes, et janmais pèrsonne n'en ont r'ouï pâler.

"Pus tard, j'mathyis Amice Patriarche, man preunmié galant, et j'fis pliaîsi à mes pathents en mème temps. Mais j'eûnmes à travailli dû pour gangni nouot' vie, et i' n'est pus, man pouorre Amice. Tch'est tch'éthait janmais pensé qu' la banque où'est qu' san p'pèe avait pliaichit touos ses sou allait faithe banqueroute? En êffet, nou peut dithe qué l'homme propose, mais qu' Dgieu dispose!

George d'La Forge
 

Viyiz étout: