Trenton,
Michigan,
U.S.A.
Lé 22 d'septembre, 1979.
Moussieu l'Rédacteu,
“Tch'est qu' les naviguants font pour sé pâsser l'temps en mé?” jé d'mandis à Papa eune séthée au pid du feu y'a eune huiptantaine d'années.
“Eh bein,” i' m'dît, “il en font d'toutes les sortes. Sans doute, y'a tréjous les cheins tchi jouent ès cartes, et quand i' jouent pour des sou les pèrdants daivent souvent les sou d'lus viages ès gangnants par lé temps qué l'navithe arrive en port.”
Et pis y'a les cheins tchi d'veinnent réligieux. J'en avions iun, eune fais, tchi d'vînt Salutiste. Il êprouvit à convèrti touos l's autres. Il avait 'té convèrti li-même par eune Cap'taine dé l'Armée du Salut - eune hardi belle femme. I' nouos disait qu' ou r'sembliait à un ange et qu' oulle avait d's ièrs comme des êtailes. Ou li'avait donné un tabouothîn pour tch'il aîdgîsse ès aut' naviguants à chanter. Touos les Dînmanches matîn i' c'menchait à liéthe la Bibl'ye en haut dans l'châté auprès dêjeuner, et pis il êprouvait à nouos faithe chanter des cantiques mais i' faîsait tant d'brit atout san tabouothîn qué nou n'comprannait pon les mots des cantiques.
Le deuxième Dînmanche j'nouos en feûnmes sus l'pont pour nouos dêfaithe dé li. L'embête en 'tait qu' eune fais sus l'pont, l'Cap'taine vouos trouvait tchiqueschose à faithe quand-même qué nou n'était pon d'quart. Quand l'Salutiste nouos siut à haut l'Cap'taine lî dît tch'i' n'voulait pon d'brit sus l'pont et d'env'yer chu drôle dé p'tit tambour hors bord ou l'donner à sa janne fille eune fais à tèrre, et pis d'sé mett' à aîdgi au couque à p'ler ses patates. I' dît au Cap'taine tch'i' n'avait pon l'drouait d'nouos faithe travailli au Dînmanche. 'Tch'est tch'i' tch'a dit d'ité niolîn?' l'Cap'taine lî dît. 'Les Saintes Ecrituthes,' lé nouvieau convèrti lî rêponnit. 'Ou n'avez qu' à liéthe les Commandements'. 'J'm'en vais t'en donner, mé, des commandements - va-t-en dêliêment dans la cabouse aîdgi au couque!' “Mais je n'sis pas d'quart!” i' dît au Cap'taine. 'Eh bein tu y'est à ch't heu', l'Cap'taine lî dît. 'Etre à êprouver à convèrti d's honnêtes naviguants? I' n'y'a pon un mêtchi pus méthitouaithe au monde qué d'navidgi! Si tu n'est pon content j'm'en vais t'mett' à tèrre en Afrique ou'est tch'il' ont bésoin d'missionnaithes'.
Lé Salutiste n'êprouvit pus à nouos convèrti, mais i' faut dithe tch'il 'tait un raide bouan garçon et tch'il allait à la Salle quand j'tions à térre.
Un aut' naviguant tchi touannit r'ligieux 'tait êprins des Mormons. Il avait liu d'tchiquebord tchi pouvaient mathier pus d'eune femme et i' s'mînt dans la tête dé les joindre et d'mathier eune femme dans touos les ports où'est qu' nou-s-allait dêchèrgi d'la cartchaîson. Dé même, il éthait un siez-li et eune femme à l'souangni toutes les fais qu' nou-s-îthait à tèrre.
Ma fîngre, i' nouos en pâlit tant qué touos les naviguants dans l'châté tchi n'étaient pon mathiés c'menchîdrent à penser qué ch'tait eune bouanne idée. Les cheins tch'étaient mathiés avaient bieau lî dithe tch'i' fallait quâsi êt' un ange pour sé graie auve ieune, sans pâler d'aver à pliaithe à eune démié-douzaine, i' n'ouiyait pon dé ch't ouothelle-là et né v'là-t-i pon tch'il êprouve à s'mathier en arrivant à Tèrre-Neuve. Mais l'minnistre lî dît tch'i' fallait donner tant d'jours d'avèrti et pis s'faithe crier dans l'églyise trais Dînmanches dé siette. Comme nouot' navithe n'allait pon êt' là pus qu' eune sémaine i' décidit d'arrêter jusqu'à nouot' préchain arrêt d'vant prendre eune femme.
Arrivés à Puerto Cabello en Vénézuela i' rencontrit eune janne fille du pays tch'était prête à l'mathier, mais i' sont Catholiques Romains là-bas et l'prêtre èrfûsit d'les mathier viyant tch'i' n'tait pon d'lus réligion. Quand i' dît au prêtre tch'i' s'en allait êt' Mormon i' faillit êt' mîns en prison!
I' mênagit à s'mathier à Buenos Ayres à eune femme tch'était brunâtre d'couleu et tch'avait un yi tchi disait m'luque à l'autre. Ou d'meuthait dans eune pétite cauminne en d'hors dé la ville, et i' lî donnit la maîntchi des sou d'san viage pour li'aîdgi à gabather jusqu'à san préchain viage. Et l'lendemain d'san mathiage i' dêcouvrit qu'oulle avait eune démié-douzaine dé mousses en d'ssous d'sept ans tch'étaient à l'appeler 'Papa' et i' fut content d's'en r'vénîn à bord!
I' s'en allait justément en mathier eune autre à Martinique dans l's Antilles Françaises en r'vénant d'Buenos Ayres quand i' rencontrit un vrai Mormon tchi lî dît qu' les Mormons eûdrent à tchitter à mathier pus d'eune femme y'a bein d's années viyant qué ch'tait contre la louai fédérale des Etats-Unis d'en mathier pus d'ieunne.
I' pèrdit l'ambition d'êt' Mormon, et il eut tant d'dêpiet dé s'êt' mathié d'même auve eune Argentinne tch'était méthe d'eune racachie d'mousses tch'i' tchittit la mé et né r'fut janmais au large!
George d'La Forge
Viyiz étout: