Fallbrook, California,
USA.
Lé 5 dé févri, 1977.
Moussieu l'Rédacteu,
Ch'est r'mèrquabl'ye com-comment qu' des gens d'Jèrri s'trouvent ichîn et là partout l'monde. Sanm'di pâssé j'vouos êcrivais d'ichîn en Califournie et l'sé du mème jour j'tais à dîner à Ensenada au Mexique, à deux chents milles d'ichîn, en compangnie du Sieur Stanley Parkin, lé Sieur Adrian Troy et sa danme et sa m'mèe et ses trais êfants, Madanme Downey (née Henry en Jèrri) et s'n anmie Mdlle. Barbara Kilstrom tchi n'est pon Jèrriaise mais tchi connaît Jèrri tout-à-fait bein, et l'Sieur Triggs et sa danme, née Eva Maugi Carré à St. Ouën.
Comme nou peut s'y attendre, la convèrsâtion 'tait hardi entouorre Jèrri. Eune tchuthieuse chose est qué les trais fis au Sieur Parkin fûdrent nés dans la mème maison qu' mé tch'avait 'té bâties ès Landes à St. Ouën par man Papa et où'est tch'i' forgeait quand j'fus né. Oulle avait nom La Forge dans chu temps-là, mais par lé temps qué l'Sieur Parkin l'acatit oulle avait 'té nommée Mosgiel.
La route d'ichin à Ensenada est hardi belle, étant l'long d'la mé quâsi tout l'long du c'mîn. D'ichîn, où'est qué j'sommes près du Mont Palomar, fanmeux à cause dé s'n obsèrvatouaithe, nou-s-y va par San Diego et nou-s-entre dans l'Mexique par Ti Juana. La ville d'Ensenada, comme toutes les grandes villes Mexitchaines, est pittoresque, et les Mexitchains sont av'nants et d'bouanne heunmeu. I' sont mangnifiques musiciens. Ès r'pas dans l's hôtels nou mange au son des violons et dgitares, et les belles pièches comme La Paloma, La Golondrina et Estrellita sont tréjous parmi les favorites. Ensenada, dans l'État dé Baha California, jouit d'un supèrbe clyînmat, et ch'tait pliaîsant d'penser qu'eune grand' partie d'l'Améthique 'tait souos la né et l'gliaichon et qué j'tions tous à la c'mînse au bieau solé. Ch't hivé est iun des piéthes connus en Améthique pour bein d's années. Il' ont mème ieu d'la né en Floride, mais La Califournie en a êcappé d'en par ichîn. La tempéthatuthe n'a pon 'té fort mains d' 75 à 80 dépis m'n arrivée ichîn y'a trais s'maines.
Les gâzettes du 16 et 30 dé dézembre veinnent d'arriver. J'tais bein content d'pouver vaie l'accompte dé la Séthée Jèrriaise à l'Eisteddfod, et j'sis ordgilleux d'vaie qu' eune belle et charmante St. Ouënnaise, Mdlle. Audrey L'Feuvre, gângnit tant d'prix. Né v'la-t-i' pon bouanne preuve qué v'la tchi vaut la peine dé saver la langue Jèrriaise? Et j'vai qué ch'tait un St. Ouënnais tch'était adjudicateu, Moussieu Percy L'Masuthi, et tch'i' s'atchittit d'sa tâche, comme i' fait dans tout ch'tch'il entréprend, supèrbément. Ch'est eune tâche tch'est difficile et qué jé n'voudrais pon souos autchun accompte.
Né v'la acouo un aut' vièr Jèrriais (et St. Ouënnais) au r'pos êtèrnel lé Sieur Philip Syvret, et j'fais part dé man r'gret et d'mes condoléances à Madanme Syvret et ses filles. La dreine fais qué j'vis l'anmîn Ph'lippe Syvret 'tait en Jèrri l'êté pâssé et i' m'pathaîssait en mangnifique santé à nénante ans. Il avait eune bouanne mémouaithe et ch'tait tréjous un pliaîsi d'pâler auve li du temps jadis. Un aut' mio d'Jèrri a dispathu.
Acouo un mort par accident d'moto en Jèrri. Et ch'tait l'Jour dé Noué!
Les Jèrriais sont acouo dueurs. J'vai dans la gâzette qu' eune trentaine 'taient à lus bangner l'Jour dé Noué. Ouaithe qué la tempéthatuthe dé la mé 'tait 47 dégrés i' né d'vait pon y faithe caud. Quand j'tais janne en Jèrri j'allais m'bangner à la mé l'preunmyi d'avri jusqu'au mais d'octobre. Quand j'm'en fus d'meuther siez parrain et marraine d'Aubert à La Mouaie à St. Brélade, ch'tait à La Corbièthe qué j'allais nouer touos les Dînmanche l'arlévées. Dans chu temps-là ch'tait Mêssieux John Francis Frederick d'Aubert (lé fréthe à man parrain), Ph'lippe Monnamy, et un nommé Torpy tch'étaient gardgiens du phare. J'ai r'mèrtchi qué l'fis du Sieur Torpy, Wilfred John, mouothit l'onze dé novembre en ville. Sén âge n'était pon mentionnée dans l's annonces des décès, mais i' d'vait 'êt' dé m'n âge à tchiquechose près car j'tions à l'Êcole dé La Mouaie en mème temps.
J'tions grands anmîns Alfred Monnamy, iun des fis au bouanhomme Ph'lippe, et mé, et sa m'mèe avait tréjous un vèrre dé lait à m'attendre quand j'sortais d'l'ieau. Alfred Monnamy d'vînt frégatin et avait finnit ses douze ans quand le dgèrre quémenchit en 1914, mais étant dans la rêsèrve il eut à r'joindre san navithe dé dgèrre, et quand la dgèrre fut finnie i' r'vînt en Jèrri et mathyit Mary Lewis dé La Mouaie. I' sont au r'pos êtèrnel à ch't heu.
Ch'est danmage qué nou n'peut pon êt' janne deux fais, car j'aimethais pouver r'vivre ches bieaux jours dé ma jannèche en Jèrri!
George d'La Forge
Viyiz étout: