Le Ménage ès Feuvres,
St. Ouën.
Lé 19 dé juîn, 1971.
Moussieu l'Rédacteu,
J'ai passé trais mais au Texas sans vaie eune goutte dé plyie, et les gens avaient fort à faithe pour garder l'hèrbe vèrte sus les p'loûses en d'vant d'lus maîsons. I' fallait êt' tréjous à arôser, et l'annonceux sus la télévision continnuait à dithe: “Pas d'sîngne dé plyie!”
V'là tch'i' m'faîsait penser au temps jadis - quand i' n'y avait pon d'radio ni d'télévision en Jèrri. Mais l's anciens n'avaient pon bésoin d'annonceurs ni d'âtivelles et d'machinnes pour lus dithe tchi sorte d'temps tch'était en v'nant. Les sîngnes 'taient là pour tout l'monde à vaie, et y'en avait à gogo. Par exempl'ye, n'en v'chîn tchitch'uns tch'étaient sîngnes dé plyie.
Quand un cor fait ma; quand nou-s-êtèrnue; quand les canards battent des ailes; quand les brébis bêlent, ou quand i' sautent et jouent d'eune manniéthe folâtre; quand les couochons portent du fain et d'la paille dans eune carre dé la cotte pour muchi; quand les boeufs s'liquent contre lus corps; quand la sie tchait souvent avaû la cheunm'née; quand nou ouait les raînottes; quand l's héthondes volent au ras d'tèrre; quand un cat s'lave driéthe l's ouothelles - et quand un cat mange dé l'hèrbe.
Un aut' sîngne dé plyie est quand la nouvelle ieune est du sanm'di. Heutheusement, v'la tch'i' n's'arrive pon souvent. Y'a un diton au sujet tchi nouos dit: “Leune dé sanm'di et fil'ye dé prêtre né veinnent qu'eune fais les sept ans!”
Quant ès ditons au sujet d'la plyie, y'en a tout pliein. N'en v'chîn tchitch'uns tch'ont 'té publyiyés dans les Bulletîns d'L'Assembliée d'Jèrriais par L'Académicien Fraînque Lé Maistre:-
Quand l'ciel est vèrrîn, j'avons d'la plyie; y'a d's appias au solé - ch'est sîngne dé plyie; quand eune âne brait, ch'est sîngne dé plyie; quand les pièrres mucrissent (en d'dan) ch'est sîngne dé plyie; les bibets piquent - j'éthons d'la plyie d'main; des vents au sud, quouaiqu'i' n'tchaie pon d'plyie, prannez tréjous vouot' paraplyie. (Et pâlant d'paraplyie, l's anciens criyaient tch'i' n'fallait pon en mett' iun sus eune tabl'ye, ni l'ouvri en d'dan d'eune maîson - pour éviter l'hèrtchîn et l'brit!)
N'en v'chin acouo:-
Quand la plyie passe méjeu, toute la journée i' plieut; quand l'achie prend trop fort, ou n'duthe pas; quand les cos chantent et les mêles sûffi'yent, j'avons d'la plyie; pie tchi crie, sîngne dé plyie; p'tite plyie abat grand vent; sîngne dé plyie quand nou ouait L'Port (Lé Port est eune partie des Grèves dé St. Ouën, et ch'est quand la mé y travâle qué nou dit qu'nou l'ouait); lé solé est blianc - sîngne dé plyie; la plyie d'févri est l'sang d'la tèrre, ou plyie d'févri vaut du feunmyi; quand l's alouettes lus piquent (au vol), ch'est sîngne dé plyie; quand solé est charmé, ch'est sîngne dé plyie; d'la plyie des vents d'amont, mithacl'ye qué tout n'en fond quand Nièr Mont met san bonnet, la plyie veint d'vant la niet; i' n'tchait janmais trop d'plyie d'vant Noué; les moûques piquent - j'avons d'la plyie; d'la plyie à solé l'vant, i' r'f'tha bé d'vant longtemps; plyie matinnale n'est pas journale; plyie bouoillonnée est dé longue duthée; lé temps est pris, ch'est pour d'la plyie; des moûques d'un jour à voltilyi partout, sîngne dé plyie; la plyie veint dans un temps mouoilli; quand i' tchait d'la plyie, faut faithe commes les Français - faut la laîssi tchaie!; quand i' plieut lé jour St. Ph'lippe, i' n'faut ni tonnieaux ni pipes; poudre d'mar et plyie d'avri font grange et grainyi remplyi; et quand les crapauds dêhalent, ch'est sîngne dé plyie.
Ch'est eune bouanne chose qué nou n'sé fie pon d'autre sus les crapauds pour nouos annoncer la plyie, car il' ont presqué dispathu, les vièrs crapauds - bouans vièrs Jèrriais tch'il' 'taient - et l's anciens et crianches dispathaîssent à grands pas étout. Ch'est pour chutte raison-là qué j'sis à les mentionner ichîn - dé mème i' s'sont r'cordées dans la gâzette comme les Bulletîns pour les généthâtions à v'nîn tchi prendront la peine d'êtudier la langue Jèrriaise et la manniéthe dé vivre dé nouos anciens.
Et dans l'temps à v'nîn comme dans l'temps passé, quand i' tchèrra d'la plyie sus l'Minnistre, ou d'goutt'ta sus l'Lecteu, un diton tchi veurt nouos dithe qué L'Bouan Dgieu traite tout San monde d'eune sorte. La preuve en est qué d'pis tch'il env'yie d'la plyie pour les filles dé Ste. Mathie. Il env'yie d'la né pour les filles dé La Trinneté, dé Bouanne Niet et d'Gouôrray; d'la grille pour les filles dé Grouville et d'La Ville; du vent pour les filles dé St. Cliément; d'la brousse pour les filles tchi lus r'troussent, et mème d'la bliâse pour les filles tchi n'ont pon d'drâses et pour les cheinnes dé St. Anastâse!
Pour en finni, disons don tch'i' plieut, la glinne meut, lé co chante et Marie danse!
George d'La Forge
Viyiz étout: