Y'a des gens tchi craient qu'Vendrédi l'treize apporte tréjous la mauvaise chance - séyiz don heutheurs qu'deux mille trais n'en a qu'iun duthant toute l'année, et chenna au mais d'Juîn.
Nos anchêtres 'taient bein supèrstitieurs - et la vie des fèrmièrs et des pêtcheurs 'tait gouvèrnée par un tas d'crianches. Un pêtcheux n'comptait pon les paîssons d'sa pêque dévant arriver, et nou n'mentionnait janmais les moulîns à bord - ni l'cliochi d'l'églyise, ni l'pain, ni la flieu, ni un couochon (respé).
Ch'est la mauvaise chance d'rêver d's oeufs ou d'crouaîsi des coutchieaux. Et nou n'dait janmais env'yer hors du pain, ni garder eun plieunme dé paon dans la maîson.
En pâlant dé plieunmes, nou soulait craithe qué ch'tait la mauvaise chance dé faithe sèrvi eune plieunme dé pigeon dans un ouothilyi - mais au jour d'aniet les ouothilièrs sont pustôt stoffés d'ouadinne dé polyestèr, Dgieu mèrcie.
Mêfi'-ous, les feunmeurs! Ch'est la mauvaise chance pouor trais à faithe sèrvi la même alleunmette à alleunmer des cigarettes. Mais nou dév'thait r'nonchi lé p'tun en tout cas, viyant qué la feunm'thie cause lé mauvais ma. Et chenna n'est pon eune supèrstition.
Né m'ttez pon eune pathe dé soulièrs sus la tabl'ye: né v'là tch'est la mauvaise chance, et il en est d'même auve un paraplyie étout. Tchulbuter eune tchaîse, ch'est la mauvaise chance étout, sustout pouor eune janne fil'ye tch'est à s'mathier.
Pouor finni, i' n'faut pon entreprendre autchun grand travas lé Vendrédi - et ch'est seux qué j'n'm'en vais pon êcrithe acouo eune articl'ye pouor la Gâzette du Sé Vendrédi tchi veint!
Geraint Jennings
2003
Viyiz étout: