Deux limelles ou'l avait et buon tithe bouchon,
Un p'tit épinoque-dents, et y'un qu'était raidde bon;
Et pis en cas q'tan j'va euss une pierre dans l'chabot,
Pour la r'hallé bein vite il y r'avait un cro,
A ma Brioche.

Ou'l avait une grosse melle étou, au bas du manche
Pour la pendre à un quiou qu'nou cachait dans une pianche;
Une petite piaque d'êtain, pour grimé sans nom d'sus,
Et un mot pour dé mé jamais j'né d'mand'dais mus,
Qu'ma vieille Brioche.

Ma vieille Brioche et mé combein q'javons travlé,
En D'jernési, en france, à manchotté, au vraic,
Qué ch'fusse dans un baté ou bein rein qu'à la plisse,
Partout la yoù qu'jallais, i' fallait qu'oul allisse
Ma vieille Brioche.

Quand j'men allais au vraic, d'vant sorti ded siez nous,
Dès qu'j'avais lièt l'hernais, dans ma pouchette tréjous.
Deux trais fais j'tâtais, pour m'asseûthé qué j'l'avais,
Car jamais ou savez, jé n'éthais voulu m'graie,
Sans ma Brioche.

Et pis quand v'nait d'jès heuthes j'avais bésoin d'mangi,
J'm'assiévais tout buonnement sus tchic buon gros rotchi,
J'dêhallais d'une pouchette deux-treis galettes dé vraic
(D'la faichon d'ma buonne femme) et d'l'autre, bein satisfais,
Ma vieille Brioche.

Yune des limelles - la p'tite - n'a pas oquo servi,
Sinon d'même a copé qu'javais à mangi,
J'copais don mes galletes, j'êcaillais des bênis,
Et d'même j'faisais buonne chère jusqu'à d'jès heuthes et d'mie,
Ov' ma Brioche.

Et y a-ti rein pus c'mode pour faithe un manche de fouet
Sou z'en avez besoin qué d'coppé sus l'fossé
Une belle branque bein d'lond'gheur, pour bein nea la chêpé
Pour la dréchi bein draite et les bourgeons copé
Qu'une buonne Brioche.

Jamais j'nai y'eu d'estampe et pour tchi en avé?
Une buonne manièthe ch'est vrai pour les pattes sé brulé,
Pour mettre mes iniatiales ès manches dé bêque ou d'ouette
N'y'a qu'à les copé d'dans, la d'jabbe est bein vite faite
Ov' ma Brioche.

Pour decrotté ses bottes, ou gratté des souiediches
Pour raccourchi la coue ès vaques ou bein ès g'niches.
Pour êcallé les îtres, des poules ou poulets tué
Pour faithe toutes sortes d'choses, lé miyeuth ôti qu'yié
Ch'est ma Brioche.

Combein qu'ou m'a aidji à faithe dé buon fricots;
Combein qu'oul a gratté d'biau horfi et d'maq'thiaux;
Et l'bèl est bétôt plien, d'êcalles, d'îtres et d'ormers
Sus tchi j'ai fricoté oprès q'jé l's'avait ou'ert
Ov' ma Brioche.

Combein d'bind'ghies d'caboches et d'laitues qu'j'ai copé,
Combein d'cabots d'patates et d'cârottes qué j'ai p'lé,
S'ou faisait du pâté ma buonne femme mé disait:
"S'tu'en veur faut qu'tu'age cherchi des pommes suthes et les p'lé
Ov' ta Brioche."

Combein d'verjus tenvri et d'crayons apointis
Ov' chutte puorre vielle brioche lé pus c'mode des ôtis.
I' faut qu'tout l'monde avouent sa grande utilité
Car même les mousses mé disent: "Papa, fait un suffiet
Ov' ma Brioche."

Comment qu'jé m'graiethais sans, j'voudrais ma fingre savé.
J'la manq'thais bein souvent, j'veur pas même la prêté,
Dé peue qué j'la perdrais et qué j'n'la r'vaie pus.
Men adresse et man nom j'ai fait êcrithe dessus,
Chutte vieille Brioche.

Elie