“Tch'est qu'i' peut dessinner l'mus dans ta classe à l'êcole, Douard?” j'lî d'mandis l'aut' jour: “Ch'est lé p'tit Ph'lippe Monamy, p'pèe:” i' m'dit. “Eh bein, ch'n'est pon ravissant, ma fé!” j'li dis: “Iun d'ses anchêtres 'tait un fanmeux artiste!”
“Il est bouan à dessinner, p'pèe,” Douar continuit: “Mais i' n'sait pon ses leçons a la maintchi du temps. Il aime tant à dessinner tch'il a tréjous un mio d'papi entre les pages dé san livre sus s'n'êcritouaithe, et pis, quand j'sommes à apprendre tchiquechose i' passe san temps à dessinner toutes sortes d'affaithes en cachette! L'aut' jour la maitresse 'tait à nouos donner eune leçon dé d'dans la Bibl'ye et ou' s'apèrchut tch'il 'tait à dessinner. Ou' l'fit lî montrer l'mio d'papi. Il avait dessinné un avion auve trais hommes assis en driéthe et iun en d'vant. Quant ou' lî d'mandit tch'est qu'i' 'taient, i' lî dit qué ch'tait trais soudards romains!”
“Et tch'est qu'est en d'vant?” ou' lî d'mandit: “Eh bein, ch'est Ponce, lé Pilote!” i' lî rêponnit!
“Tch'est qué j'féthions sans les garçons à nouos faithe rithe dé temps en temps?” Mérayieu m'dit quant i' fûtent couochis: “J'mé sis souvent d'mandé la même chose quand j'ai veu des coupl'yes tchi n'ont pon d'êfants!” j'lî dis. “Ch'est un drole dé p'tit bouan'homme, qu'un garçon! Nou les vait partout, - p'tits et grands, - à grappîner, à grîmper, à lôvier ou à couorre! I' sont cadlinnés par grand-péthes et grand'méthes et gâtés par lus méthes!”
“Un p'tit garçon est heutheux auve la fache et les mains sales. D'l'ieau pour sé laver lî fait mal-au-tchoeu, mais i' n'l'y-a rein tch'il aime mus qué d'varvotter dans d'l'ieau sale! Quand ses bottes sont bliatchînnées, i' prend san pliaisi à marchi dans les mathes en s'n'allant à l'êcole ou à l'églyise! Il a l'appétit d'un j'va et la digestion d'eune machinne-à-battre, - l'énèrgie d'un dêfoueux d'patates, la tchuthiothité d'un cat, les poumons d'un faitheux d'vendues et l'înmaginnation d'un député d'la ville! Dans des temps il est craintif comme un tchian fouôté, et tchiquefais il est prêt à s'quétilli pour un rein!”
“Quand nou l'forche à vouos aidgi contre san gré, il est si gauchet qu'janmais i' n'fait bel êffet, et quand nou n'veurt pon êt' embêté d'li, n'l'y-a pon mouoyain d's'en dêfaithe! S'il est trantchil' nou sé d'mande s'il est malade, et quant i' fait trop d'brit nou lî fait des rouaux sus l'co!”
“Il aime la crème à la glace, l's'ôtis qu'nou lî d'fend d'touochi, lé jour dé Noué, les comiques, lé mousse dé l'aut' bord d'la route, l's'animaux, san p'pèe, et l'Samedi matîn! I' n'aime pon fort l'êcole du Dînmanche, les livres sans portraits d'dans, les leçons d'musique ni l'copeux de j'veux!
“S'nou veurt dormi au matîn i' s'lève dé bouanne heuthe et fait un tas d'tappage dans la maiethon. I' n'est janmais prêt à s'couochi, et bieau tch'il est téjous tard pour ses r'pas i' veurt êt' lé preunmyi à sé l'ver d'la tabl'ye!”
“I' peut mettre assez d'attivelles dans ses pautres pour les dêfoncer, et y trouver acouo assez d'run pour y fouorrer ses pattes quant i' fait fraid! Des brioches, du cliou, deux-s'trais cappeurs, eune êlingue, des crayons, des chucrîns a la maintchi êgliamis, un topîn, des marbres, un ouaithé tch'il a trouvé mort dans la route, - pour lé donner au cat, - trais ou quat' vèrges dé ficelle, et Bouan Dgieu sait tchi d'aut' hâsi!”
“Nou pouorrait même dithe qu'un garçon est comme lé gabat à Gabeldu, - i' mèrque Nord quand l'vent est Su'! Mais, damne! Nou l'manquethait s'i' n'tait pon là quand nou r'veint d'travâs au sé! Il est l'esprit tchi domînne vos affections, tchi vouos attendrit l'tchoe et vouos adouochit l'caractéthe!”
George d'la Forge
Les Chroniques de Jersey 4/4/1951
Viyiz étout: