Fort Lauderdale, Florida,
U.S.A.
Lé 17 mar, 1973.
Moussieu l'Rédacteu,
Quandi qué s'n homme 'tait dans la forge, Missis Pipet vînt vaie Manman tch'était assise sus l'sofa à ranner eune neuve pathe dé cauches dé les mettre, qu'oulle avait finni d'ouvrer pour Papa la séthée dé d'vant. "Bon! Ch'est vous, Missis Pipet," Manman lî dit. "Assiév'-ous dans la grand' tchaîse, don. J'sis bein contente dé vouos vaie!"
"Eh bein, Missis Le Feuvre," Missis Pipet lî dit, "comme ou l'savez bein, jé n'sis pon ieune pour aller vîsiter siez mes vaîsîns, mais j'sommes vénus dans l'quèrre pour qué Maît' George y mett' eune neuve féthâle, et m'n homme a décidé d'aver lé j'va féthé en mème temp, ch'est en tchi j'ai pensé qué j'veindrais vouos vaie en attendant."
"Ou-s-savez bein fait," Manman lî dit. "La forge, atout la feunmée et l'brûlîn d'corne quand i' sont à prépather l'chabot au j'va pour lé neu fé, n'a pon justément l'odeu d'dgieau d'colongne, et ch'n'est pon eune salle d'attente conv'nabl'ye pour les femmes."
"Ch'est vrai, quand nou-s-y pense," s'fit Missis Pipet. "J'mé sis mème démandée bein des fais pourtchi qué l's hommes aiment tant y passer lus séthées dans l'hivé à la pliaiche d'êt' au pid du feu siez lieu à garder compangnie à lus femmes!"
"Eh bein," Manman lî dit, "Pour l's hommes, ch'est difféthent. I' peuvent sé graie sans l'confort qu'eune femme apprécyie tant. Il' ont quâsi tous 'té à La Côte étant jannes, et pour ieux ch'est eune manniéthe dé rêunion où'est tch'i' peuvent lus entre-ramémouaither d'lus aventuthes dans la fraid auve les Robîns. Et i' n'lus en est d'rein d'donner un coup d'main atout l'gros marté quand George est à battre des fièrs dé tchéthues. Y'en a tch'avaient travailli dans les forges ichîn et à La Côte dévant lus mathier et lus mett' à fèrmer, et tchi sont contents d'pouver aîdgi à frapper en s'pâssant l'temps. Et à m'n idée, i' sont mus là qu'd'être à l'aubèrge. Mess Pipet y'a-t-i' 'té, à La Côte?"
"Nannîn," s'fit Missis Pipet. "Dans des temps, j'pense qué v'la tchi li'éthait fait du bein d'êt' duit par les Robîns là-bas. Ch'n'est pon qu'ch'est un mauvais homme. Jé n'peux pon m'en pliaindre. Il est bouan travailleux et i' n'est pon ivrouangne ni dêpenseux, et i' n'm'a fanmais dit un nannîn. Mais il est si douôle dans la maîson qué, dans des temps, j'en sis quâsi à but d'pacienche.
"I' mâche à londgieu d'jour, et il est tréjous à êcopi dans l'graie quand il est dans la maîson. I' laîsse ses habits partout. J'ai tréjous à pâsser man temps à r'mett' ses affaithes en pliaiche. I' laîsse ses braies sus l'but du liet. San veste et sa câsaque sont tréjous par les c'mîns. I' flianque des cauches sus l'plianchais dans l'mitan d'la chambre. Quand i' r'vînt d'l'églyise Dînmanche matîn et tch'il 'tait à s'dêchangi pour aller r'muer les vaques, i' mînt sa bouanne quémînse sus eune tchaîse et s'assiévit d'sus à dêlachi ses bottes. Il env'yit sa dgène emp'sée dans l'pot à flieurs qué m'mèe m'donnit pour man jour dé naîssance lé mais pâssé, et qu'j'ai mîns sus l'dgéridon en d'vant d'la f'nêtre en attendant pour y plianter eune doubl'ye gérémienne qué Mess Hubert "Genteel" m'a promînse. I' pendit san dû chapé sus la cârre du grand portrait d'ma grand'méthe du côté d'man p'pèe, et faillit à l'abattre dé d'ssus la muthâle.
"J'ai clièrgi un titheux pour tch'i' piêsse y mett' ses dgènes et ses mouochés et des p'tites affaithes dé mème. Hélas! I' faut vaie les bricoles dédans. Y'en a d'toutes les méthes - des clious, deux-s'trais vielles pipes tch'ont eune odeu tchi vouos fait l'ver l'tchoeu. D'la ficelle, des vielles brioches, eune vessie d'couochon tch'i' soulait faithe servi comme chipaudé. Sa Litourgie. Des bouaîtes d'alleunmettes à maîntchi vièdes, sa bouanne montre en or, du p'tun, un morcé d'bra tch'i' fit sèrvi à êtantchi l'sang quand i' copit l'ponchet en d'bitant un couochon pour mett' dans l'saleux l'hivé pâssé. San r'chu d'La Sociêté Agricole, des lettres dé san n'veu à La Côte tch'il éthait deu rêpondre y'a longtemps. Des boulets qué l'Docteu Beinn'clift lî donnit quand il avait ma dans l'corps, eune souothitchiéthe, san cèrtificat d'naîssance, la dent tch'il eut d'êrachie y'a chînq ans, un oeu d'faïence, un vièr dêmêleux, eune pétite bouaîtée d'baume pour mett' sus du ma, un' yi d'vèrre tch'apparténait à san défunt couôsîn tch'avait pèrdu s'n yi gauche dans eune bastaude d'êlection viyant qu'tchique îndividu l'avait appelé un rôsyi - et Bouan Dgieu sait tchi d'autre!"
"Enfîn," Manman lî dit, "I' pouôrrait êt' piéthe. Il a au mains l'avis d'garder tout chu butîn-là dans l'mème titheux. et s'i' n'vouos a janmais fit un nannîn, i' n'y a pon fort d'hommes comme li par les c'mîns!"
"P't êt' bein, ma fîngre," Missis Pipet dit à Manman, "et j'éthais peu faithe piéthe si j'avais mathié un ivrouangne. Mais il est temps qué j'm'en âge."
"Eh bein," Manman lî dit, "n'oubliez pon d'criyer en pâssant!"
George d'La Forge
JEP 12/4/1973
Viyiz étout: