Les Pages Jèrriaises

Quand J'fus pour Apprendre à Cachi un Moto

Eileen Le Sueur

Deux fais qué j'fus pour apprendre à cachi! Mais janmais d'autre! Ches deux îndividus-là n'eûtent qué dé m'laîssi m'tuer!

La preunmié fais j' apprîns auve un tout p'tit maigrolîn qui n' avait pas dé j'veux sus la tête. Et sus san nez il avait des naithes leunettes à solé - et - à vèrse broussait! J'lî d'mandis s'i' pouvait m'vaie et, qué, s'i' voulait mé montrer à cachi dé haller bein vite chenna dé d'ssus san nez! Ma fé, i' les halit, en disant qué ch'tait rein qu' pour aver la paix!

Quand i' vînt un temps, i' m'dit que j'allais gentiment bein mais dé t'nîn ma reue bein pus dû - à bouôn poignet d'main. "Là, touônnes ichîn à la drouaite," i' m'dit. J'touônnis, mais j'éthais deu laîssi ma reue èrvéni. Mais j'fis comme i' m'dit! Jé t'nais ma reue à pouongnie d'main, qué d'vant l'saver j'montîmmes et j'èrdévalîmmes dé d'sus l'fôssé eune démié-douzaine dé fais d'vant qué l'moto s'arrêtisse, quand l'engîn avait houtchi dans eune réchinne dé bouais!

Il eut peux, j'sai bein, mais j'eus peux étout, mé. Mais jé m'en allais pas danme lî dithe! Toute brave, jé m'touônne dé bord et j'lî dis: "Gas-dé-ouelle, j'en avons-t-i' êcappé d'eune belle"!

Et quand j'vis qu'i' n'mé rêponnit pas, j'lî fiche ma main dans l'ouothelle et j'lî d'mandis s'i' tait v'nu pour dormi ou pour mé montrer à cachi!

Sav'ous bein qué chu pouôrre corps, i' n'dormait pas - i' s'était êvanni! Quand i' r'prînt ses sens et qué les siens du garage 'taient v'nus à not' s'cours, i' dit qué pour pèrsonne au monde, i' n'm'èrmontréthait à cachi.

Au but d'eune sémaine ou deux j'en r'êprouvis un autre. Un gros vièr pataud qu'avait eune têtée dé j'veux justément comme eune grôsse jaune brînge à tapis et eune moustache comme un sèrgent mâjeur. San moto 'tait si p'tit qué quand j'étions les deux d'dans i' 'tait quâsi assis sus mé. Et i' m'soûffliait dans l'ouothelle justément comme un j'va câssé! Ma fé, un jour i' m'prînt par l'Esplanade. J'vos guarantis que j'tais ordgilleuse et qué j'allais vite, si vite qué j'passis par sus eune jaune lîngne sans la vaie! I' m'dit: "J't'en prie, arrêtes!" "Né v'là un "policeman" à nos faithe un signe." "Bah," j'lî dis, "fais comme mé...fait la minne dé n'l'aver pas veu!"

I' m'donne un coup sus lé g'nou et m'dit d'arrêter tout d'suite! Mais, i' m'fit pousser man pid pus dû sus l'accélerateur et d'vant l'saver j'étions pendus sus l'bord dé la cauchie rein qué par les deux reues d'driéthe! I' s'mînt à faithe d'ités cris qué j'fus oblyigie dé m'mârri. Et j'li dis:

"J'vos en prie, n'faites pas des cris comme ch'la... i' n'y'a pèrsonne dé mort!"

"Nan, pas 'couo, mais i' s'en va bein vite y'en aver, et j'n'ai pas envie qué ch'sait mé!"

À c'menchi tout l'monde qui v'naient nos vaie sé m'ttaient bein gênés pour nous, mais quand vînt un temps tous riaient! Sav'ous bein qu'un janne îndividu avait touônné la carte en driéthe ou'est qu'i' tait mins "A" pour apprenti et en rouoge craie i' y'avait mîns: "Les deux nouvieaux mathiés!"

Quand i' vînt un temps la mé montait. J'lî dis: "J'm'en vais bein vite dêhaler d'ichîn d'dans, mé!" Jé d'pichis la f'nêtre dé driéthe et par lé creux j'dêhallis, et dé d'ssus l'driéthe du moto j'sautis sus la caûchie. I' y'êprouvit étout, li. Ah, la tête et l's'êpaules i' les pâssit bein, mais quand vînt pour lé ventre et l'gros driéthe - n'y'avait pas moyen! Et i' fut oblyigi d'rester là jusqu'à qu'ieune des crannes vînsse lé haller.

Dé temps en temps j'allais l'êpier et i' m'faisait d'sièrs justément comme eune cannote qu'est à couer quand ou ouait d'l'ôrage! Auprès tout ch'la fallit aller en Cour, et quand l'Juge lî dit qué la préchaine fais i' pèrdrait sa licence, i' dit qu'i' n'y'éthait janmais eune aut' fais! Car janmais i' n'm'èrmontréthait! J'lî dis: "N't'en fai pas, man vi! Tandi qué man vièr griffon à deux reues pouôrra m'porter, un moto janmais jé n'cach'chai".

 

Eileen Le Sueur

 

Viyiz étout:  

Les Pages Jèrriaises