J'ramonti la rue d'drière,
Et à l'tou du marchi;
Pis, comme la nièt dev'nait naire,
I' fallit m'rappréchi.

Je m'en vins auprès de l'auberge
Ouèqu' la 'bus s'arrêtait,
Mais oulle avait déja sa charge,
Et je n'pus pon monté.

J'attendis l'tour de la préchaine,
Et dès qu'oulle arrivit,
Après bain d's efforts et d'la peine,
Dans un coin je m'couli.

Après une grande pous'sie, -
L's uns assis, l's autres d'but, -
Chacun, comme une pouque mouillie,
S'pliéchi du mus qu'i' pu.

Ch'était un bouon moyen pratique
Pour éprouvé l'effet
Que l'gaz acide carbonique
Produit sus l'chervé.

Dans chu temps-là, les crinolines
Prenaient un bain grand run,
Et causaient dans les mousselines
Un divers désarrun.

Ch'tait quand la 'bus était remplie
Qu'nou les viyait d'travers,
Et - quand l'affaire était pressie -
Prendrent des pliés divers.

Tous avaient, pour comble d'minsère,
Un tas de grand pagniers;
Nou n'savait pon iou s'assière
Quand nou v'nait les derniers.

Dans les bras d'une pouorre femme
Un baby se d'battait;
Et, catiné sus une damme,
Un p'tit tchian s'épuchait.

Deux hommes pâlaient l'un à l'autre
De banques et d'banquiers;
Se disait iun: "Ch'est dans la nôtre
Qu'les profits sont bain cliairs."

L'autre - un fermi - châquait la tête;
I' n' viyait pon comment,
En menant un commerce honnête,
Nou faisait guix du chent.

I' pâlait d'acatee d'la rente,
Mais le prémi li dit:
"J'avons quiqu's actions en vente,
Je peux vouos en fourni."

"Je vouos prie d'voulai bain m'craire,
Et d'en faire l'acat;
La banque abonde en numéraire,
Et jamais ou n'droqu'ra."

"J'avons des hommes à la tête
Qui sont d'grands financiers;
Souos lus soins la banque ne prête
Qu'à d'grands particuliers."

"Lus actions sont honorables,
Et portent le cachet -
Empreint en traits ineffaçables -
De la moralité."

"En outre, ils ont d'la conscienche,
Et n'sont pas pour trompé;
I' nouos montrent par lus balanche
Que tout va tréjous drait."

"Dans lus transactions, j'observe
Qu'i' gna rain de cachi;
Tout est expliqui sans réserve,
Et sus l'livre aligni."

"Ils ont deux fonds qui vont d'conserve;
Iun donne un biau rétour,
L'autre est un grand fond de réserve
Qui s'accrait d'jour en jour."

"Ch'nest pas comme ches compagnies
Qui n'ont que du passif,
Et qui pour cachi lus folies,
Portent tout à l'actif."

"Dans nouos affaires tout prospère
Jamais i' ne s'ra dit,
Que devant l'Juge-Commissaire
Not' banque se traini."

L'fermi dit: "L'affair' parait belle,
J'm'en vais l'dire à Betté;
Demain, en sortant d'la chapelle,
Je pouorrons en r'pâlé."

Un homme, plien de mouilléture,
Au même instant entrit:
Il 'tait chergi d'huile et d'peinture,
Mais personn' ne s'carri.

En s'touonnant, une crinoline
Le happi par le pid,
Et sus les gnouors de sa vaisine
San pagni s'renversi.

Ou s'écriyi: - "Maufait achocre!
Ou-z-êtrueullez sus mé
Vot parafine et vot' jaun' d'ochre,
Tout mon fait est ruiné!"

Deuss' trais égouffirent de rire;
Mais l'pouorr' corps, tout confus
Et ne sachant pon trop bain qu'dire,
Ramassi tout d'san mus.

A la fin, bain engniés d'attendre -
Presqu' êtouffés là d'dans -
La voix du cacheux s'fit entendre,
Et j'partim's à l'instant.

Jérôme de l'Ile