Lé Départément d'la Pliann'nie et d'l'Envithonnement organîsit un weekend entouor lé transport au Mûsée d'Stînme à La Trinn'té lé 3 et 4 dé Juîn 2000. Nou-s'avait fait eune s'maine d'êvénéments et, parmi tout chenna, y'avait des lectuthes par l'Professeu Begg, un êconomiste dé transport.

L'Professeu Begg vînt du Rouoyaume Unni pouor explyitchi les dreins avis du gouvèrnément du Rouoyaume Unni entouor lé transport, et ch'tait raide întérêssant d'ouï chein qu'les autorités font en Angliétèrre et en Êcosse.

Au mûsée duthant l'weekend, lé train faîsait des touônnées, bein seu, mais y'avait des stâlles et d's exhibitions.

Y'avait eune vaituthe tchi fait sèrvi lé pouver solaithe. Chutte vaituthe avait gângni tchique compétition, mais nou n'lé vèrrait pon bétôt par les c'mîns d'Jèrri - ch'est pus futuristique et ou n's'en va pon rempliaîchi les vaituthes qu'j'avons achteu. Mais, ch'est la technologie tch'est du pus grand întéthêt, et j'vèrrons chutte technologie d'batt'ties et d'panneaux solaithes faits sèrvis dans lé transport à v'nîn.

Tch'est qu'i' y'avait d'pus pratique? Y'avait deux bikes êlectriques qu'nou pouvait aller sus.

  

I' couôtent dans les sept chents louis, et don i' n'sont pon pus chiéthes qu'les bikes à montangne bein chiéthes qu'nou-s'acate achteu.

I' sont pus b'santes qu'eune bike ordinnaithe - envithon vîngt-trais kilos - mais en pédalant nou trouve qu'lé pouver êlectrique fait la pédall'lie bein pus aîsi. Ch'est êtrange à c'menchi car nou pédale un p'tit mio et nou-s'avanche quâsi coumme si nou-s'avait pédalé dû. Ouaithe qu'jé n'fîssions qu'eune p'tite touônnée du bel, i' sembl'ye qu'l'avantage est bein pus r'mèrquabl'ye en allant amont un mont.

Nou peut touônner hors lé pouver êlectrique et pédaler tout sîmpl'yement, mais pus nou pédale, pus lé pouver êlectrique vos aîgue.

Chenna pouôrrait convaincre les gens d'faithe pus d'lus viages sus bike, j'crais.

Les boulants êlectriques n'étaient pon les seuls exempl'yes d'altèrnatifs à la pétrole. La Pâraîsse dé St. Hélyi mouontrait ses vainnes à gaz. Ch'est l'avis d'la Pârâisse qu'i' faut rêduithe la pollution en Ville et don la meunicipalité est à changi ses boulants et à întroduithe des boulants tchi font sèrvi l'gaz. Et ch'est eune bouonne idée d'la pointe dé veue des contribuabl'yes étout viyant qué l'gaz est mains chi qu'la pétrole.

La police sont d's anmîns d'l'envithonnement étout. I' mouontrait eune vaituthe êlectrique. Y'a des gens tchi craient qué ch'est bouon étout pouor happer les crînminels - les policemen peuvent lus appréchi des malfaîteurs sans trop d'brit!

Pouor les handicapés, y'avait eune tchaîse à reues tchi lus aîgue à aller sus la grève. Rouôler sus l'sablion n'est pon aîsi pouor les gens tchi font sèrvi eune tchaîse à reues, mais ch't' învention aîgu'tha l'accès.

Y'avait un tas d'gens - et d'mousses sustout - tchi lus rêjoissaient d'faithe eune touônnée dans l'train. Mais tchi feunmée! Si l'message du weekend 'tait d'rêduithe lé ma fait par lé transport, ch'n'est pon l'train tchi lé f'tha.

Mais ch'tait eune opporteunité dé distchutter les problièmes du transport et du trafi en Jèrri.

Duthant l'weekend l'entrée au mûsée 'tait gratuit. L'mûsée fut fondé par Mess Don Pallot, et y'a un tas d'vielle machinn'nie à vaie.

Y'a des tracteurs...

...des tchéthues...

...des vainnes, des hèrnais, des chiviéthes, et des tchithettes...

...des sprayeurs...

...des tondeuses, ou mowers...

...un prînseu pouor les raves à chucre...

...et un tas d'vièrs ôtis et machinnes.

Geraint Jennings
Juîn 2000